Puu Findi 9 - Ibani New Testament

¹ Anịsáa sọ́nọ́ kárámá sookumuḅọ ma ori ọdụ ofurom, a warị gbẹ́rẹ́ ḅálōló arịị sobie sághị tuminikiri sóórókórómáa nyẹ. Nnị warị sughu nyanagha póghóló kiri ḅụ́pọ́ igodo findinyẹ pa anị pịrịị.

² Ḅálōló ma sughu nyanagha póghóló kiri ma findi sáá, onwi warị anị angaá sághị págháḅo sọ́ḅọ́rọ́ mánámāná fịnị dọghụarị angaá págháḅoarị onwi; póghóló kiri ma bie págháḅoarị onwi ma warị ịrụa ma na so ma kánákáná ma.

³ Onwi ma bie nyẹ́ sima ápịrịgbánị sághị págháḅo tuminikiri bie sọm n warị ámánẹ́ngịa nyáná kụrọ pa nnị pịrị.

⁴ Nnị dugho nnị pịrịm ḅẹẹ nnị nyẹ́ pa tuminikiri osuka ma láma ma anịgha ḅẹ́ jẹ́ sị; anịgha n dipinyẹ; nnị nyẹ pa lama bẹapụ anịị Tamuno ilíghíma ma nyánágháapụ nna fụ́ḅára ogbo.

⁵ Nnị kụrọ pa nyẹ́ sima ápịrịgbánị ma pịrịgha ḅẹ́ anị mịná túminị́ ma ḅá, kụ́ma sọ́nọ́ akalụ́ pa túminị́ ma pa tọ́rụ́siarịma. Nnị árị ḅụakụ ma sọ́ḅọ́rọ́ ámánẹ́ngịa tumḅọ tẹ́ angaá.

⁶ Mịná sọ́nọ́ akalụ́ ma ḅụ, n fịị dọghụbẹm, kụ́ma n fịị arịbịgha, n pịghị dọghụbẹm ḅẹẹ n fịị, kụ́ma fịị nna ḅụ mangịbẹm.

⁷ Nyẹ́ sima ápịrịgbánị ma fịnị ḅara anịị tẹ́lẹ́ma sị ọ́mụ́gbi dọ́ghụ́ ásụ fịnị ḅara; nna sịbị n suanyẹ sọ́ḅọ́rọ́ odoḅala pa mịẹ ogunu, nna toruku sọ túminị́ tórúku kịkam.

⁸ Ẹ́rẹ́ámáapụ sịbị núme fịnị ḅara anịị nna sịbị núme fịnị ḅara ọkụ nama aka fịnị ḅara anịị nna aka fịnị ḅara.

⁹ Nnị pa nna kúkúbie gbẹ́ẹ̄ nyẹ anịị nnị ikúlélu pa tẹ́mẹ́ kúkúbie gbẹ́nyẹ, nna pamba ma ḅụ ḅoarị ọwụ soḅọ́rọọ́ n tọgha ásụ, tọgha ọmụgbi árụ́ nụnụ pa ọ́mụ́gbi múuarị nyẹ.

¹⁰ Nnị otume nyanam ámánẹ́ngịa tẹ́arị ḅara pa tẹ́arị nyẹ, nna otume ma bie fịnị árị ma ine mịẹbẹm sị túminị́ sọ́nọ́ akalụ́ pa obii.

¹¹ Nnị ámányánáḅọ nyánam n táarịḅọ, anịị sughu nyanagha póghóló kiri ma didighiarịḅọ. Ori ẹ́rẹ́ Hiburu ẹ́gẹ́rẹ́ ḅụ anịị Abadon: Giriki ḅụ ori ẹrẹ anịị Apoliyọn dughoarị nyẹ bẹ ori, <>

¹² Parị opu ḅáláfama nyẹ ma ḅọ́rọ́mam; mịma ḅọ́rọ́fáma sáá, jẹ́ mmẹẹ́ opu ḅáláfama nyẹ tórúku ḅoarị.

¹³ Anịsáa suene kárámá sookumuḅọ ma ori ọdụ ofurom. A warị pụghọ naam odoḅala ẹ́bẹ ma ikpangi ḅụ sághị ḅoarị nyẹ. Tamuno ma tórúku fịnịnyẹ.

¹⁴ Pụghọ ma ọdụ ma ọlọ suene kárámá sookumuḅọ ma ḅẹ́m, <>

¹⁵ Ínia sookumuapụ ma, n tẹ́lẹ́ma pa mịị sáá ma pịrịapụ mịị éné ma, mịị akalụ́ ma na mịị kụ́rá pịrịapụ ma, nnị n fịịmam sị túminị́ ma pa tẹ́rẹ́ a kiri die n gbẹ́rẹ́ angaá ḅá.

¹⁶ Nnị dugho i pịrịm ḅẹ́ nnị tẹ́lẹ́ma warị ọ́mụ́gbiapụ ma anịị túminị́ púghú suene a ndẹ́ẹ oyia si findi.

¹⁷ Múnogha dáwọ ḅụ arịị ásụ ma na ásụ dọghụarịapụ ma mịị nnị fịnị ḅara: nna kúkúbie kikima nyẹ áwụ biam sọ́ḅọ́rọ́ fịnị, buluu biam sọ́ḅọ́rọ́ safaya, odoḅala bia ḅára biam sọ́ḅọ́rọ́ ọpọlịḅuruma. Ásụ ma sịbị akụ nama sịbị kịkam, nna bịpịbie fịnị na onwi na ọpọlịḅuruma sághị págháḅom.

¹⁸ Mịị tẹ́rẹ́ a tọ́rụ́siarị díghíarị ḅụḅáláḅálá ma anịị fịnị ma, onwi ma, na pịghị ọpọlịḅuruma ma ásụ ma bịpịbie sághị págháḅoarị nyẹ, tuminikiri gbọrụ ma pa tẹ́rẹ́ a kiri die gbẹ́rẹ́ angaá ḅáfamam.

¹⁹ Ḅẹẹ ásụ ma nna kụrọ nna bịpịbie na nna otume ḅụ anịị anị fịnịnyẹ, nna otume fịnị ḅara sọ́ḅọ́rọ́ sịbị nyáná ododó ine nyẹ pa kị́nị́ láama bẹnyẹ.

²⁰ Mịị tẹ́rẹ́ tọ́rụ́siarị díghíarị ḅụḅáláḅálá ma ḅaghaapụ sị kọapụ ma, n mịnị nna mịẹnyẹ ḅụ pịghịgha, n pa susi oru pịrịarị, na pịghị nnị odoḅala pa kara nyẹ na pị́naḅala nyẹ, ọjọ bala nyẹ, dapịrị na sị na, mịnanyẹ anịị n kárányẹ, ine nyẹ arịgha nyẹ, nyẹ naagha nyẹ anịgha ine nwángịgha nyẹ.

²¹ Nnị pịghị mịnị nna kị́nị́ḅáa sii ma ḅụ pịghịgha nna kirikiri egberi ikiakoro ḅụ pịghịgha nna yáakuu ḅụ ofori nwángị anịgha nna fúrú duma ḅụ.