Puu Findi 8 - Ibani New Testament

Ánáná Tụ́wọ Sọ́nọ́ma Kárámá N Gbẹpalị Agbā Ma Sim

¹ Ánáná Tụwọ ma sọ́nọ́ma kárámá sị n gbẹpalị agbā ma sii sáá, sobie yaghúu fịnịm ákị mú gbẹ́rẹ́ énékịẹnyẹ mpara láa.

² Anịsáa a wárị sọ́nọ́ma sookumuapụ arịị Tamuno tórúku sẹapụ, n warị sọ́nọ́ma ọdụ pa n pịrịị.

³ Jẹ́ sookumuḅọ, odoḅala Insẹnsị suanyẹ ọlọḅọ ḅoo ẹ́bẹ ma angásá sẹm. Nnị tọgha Insẹnsị pa ọ pịrịm ḅẹẹ sị ori anị dọ́ghụ́ma imine ma tórúku fịnị odoḅala ẹ́bẹ ọ́gọ́nọ, Insẹnsị ma kụ́nụ́ Tamuno túminị́ mamgba tẹ́ghẹ̄ na gwaa bẹ ḅara.

⁴ Insẹnsị ma onwi ma na Tamuno túminị́ ma tẹ́ghẹ̄ sookumuḅọ ma ḅara sághị iwóo Tamuno tórúku múm.

⁵ Anịsáa sookumuḅọ ma warị Insẹnsị suanyẹ ma ákị warị ẹ́bẹ ma ọ́gọ́nọ fịnị fị́nị ma pa anị sua bima, warị anị pa tuminikiri ma gbii. Tuminikiri warị sághị dari so alágbā fiem, sofịnị kọrịkọrị bim, tuminikiri warị jighe.

Sookumuapụ Ma Ọdụ Ofurom

⁶ Anịsáa sọ́nọ́ma sookumuapụ ma ọdụ ma ọlọapụ ma warị nna ḅụ tẹ́lẹ́ma nnị ọdụ ma ofuro bẹ ḅára.

⁷ Parị sookumuḅọ ma ori ọdụ ofurom, onwo mgbọ́lụ kịkama itii, na fịnị, ọmbịnyẹ́ pa gwaa nyẹ, anịị págháḅo nyẹ n warị anị pa tuminikiri ma gbii. Tuminikiri ma pa tẹ́rẹ́ angaá die gbẹ́rẹ́ angaá dọ́ghụm, sị ma pa tẹ́rẹ́ angaá die gbẹ́rẹ́ angaá dọ́ghụm, osuka gonyẹ́ gonyẹ́ dọghụ fámam.

⁸ Mmẹẹ́ kárámá sookumuḅọ ma ori ọdụ ofurom n warị dọghụarị opu tụ́ndụ kịkamanyẹ pa tọ́rụ́ ma bie gbii. Tọ́rụ́ ma pa tẹ́rẹ́ angaá die gbẹ́rẹ́ angaá pịghị ọmbịnyẹ́ sọm.

⁹ Tọ́rụ́ ma bie dumafịnị nyẹ pa tẹ́rẹ́ angaá die gbẹ́rẹ́ angaá fịfámam. Onwi árụ́ ma pa tẹ́rẹ́ angaá die gbẹ́rẹ́ angaá gulugulum.

¹⁰ Anịsáa, tẹ́rẹ́ kárámá sookumuḅọ ma warị ori ọdụ ofuroo. Opuma dụḅa ḅálōló fịnịtuu kọrị ḅara pa kọrịarị nyẹ sobie sághị sóórókórom warị tọ́rụ́ mamgba pa tẹ́rẹ́ a kiri die anị ḅụ gbẹ́rẹ́ angaá ḅụ koro, na pịghị mingi sághị págháḅo págháḅo angaá gonyẹ́ gonyẹ́ ḅụ koro.

¹¹ Ḅálōló ma ẹ́rẹ́ anịị, <> Mingi ma pa tẹ́rẹ́ angaá die gbẹ́rẹ́ angaá sághị akụụm, mingi ma ḅuu tọghaapụ fịịm tegó mingi ma sághị akụ́mam.

¹² Anịsáa ini kárámá sookumuḅọ ma warị ori ọdụ ofuroo. Ịrụa ma pa tẹ́rẹ́ angaá die gbẹ́rẹ́ angaá n nyẹ pa anị láamam, akalụ́ pa tẹ́rẹ́ angaá die gbẹ́rẹ́ angaá n nyẹ pa anị láamam, ḅálōló pa tẹ́rẹ́ angaá die gbẹ́rẹ́ angaá n nyẹ pa anị láamam, anịgo nna baá mamgba pa tẹ́rẹ́ angaá die gbẹ́rẹ́ angaá mịnị kọrịgha; éné ma pa gbẹ́rẹ́ angaá die gbẹ́rẹ́ angaá baá nyanagha dii ma sọ pa tẹ́rẹ́ angaá die gbẹ́rẹ́ angaá ḅo kánákánám.

¹³ Anịsáa, a warị dighi, a ọ́gọ́nọ ju fiighiarị ogbólílo ọwụ naam kụrọ pụghọ pa ilúghuarịnyẹ, <>