Puu Findi 20 - Ibani New Testament

Jizọs Kụ́rá Mmẹẹ́ Ndẹ́ẹ Oyia Si Findi Pa Taám

¹ Anịsáa a sookumuḅọ arịm sobie sághị kóróḅoarịḅọ, ọ ḅárabie ori sughu nyánágha póghóló kiri ma igodo findinyẹ ọlọm na pịghị iku ikólina nyẹ.

² Ọ ḅụọ nyáná ódódó ma kuum, olom sáá ódódó ma anị́ị́ ẹ́kpẹ́dua ma anịgha Satanị. Warị ịkóli suanyẹ pa o sua, kụ́rá mmẹẹ́ a ndẹ́ẹ oyia si findi.

³ Sookumuḅọ ma o gbi pa sughu nyánágha póghóló kiri ma bie suam ori ikasii pịghị ọ gbẹpalị, sị ọmịnị ine jẹ́ pa oḅori pa sẹ ma sịbịgha ḅara; ákị muu kụ́rá mmẹẹ́ a ndẹ́ẹ oyia si findi ma kara sáá láa. Anịsáa nnị ọ fị́ma ḅẹm kálá satuo ḅụ.

⁴ Anịsáa a tọgha imine arịm, anị ọ́gọ́nọ kpọrọfịnịapụ nnị kụrọ pa n pịrịm ḅẹẹ nnị ḅẹ́rẹ́kọọ. A pịghị n sịbị pẹ́lẹ́apụ ma biebẹ duma arịm ḅẹẹ nnị Jizọs diepágháma karakárá ma na Tamuno ẹ́gẹ́rẹ́ ma dugho wásámam. Na nnị susi ḅáláfama nama ma pịrịgha anịgha n tẹ́mẹ́ sị pa anị pa biekóróma bẹnyẹ, anịgha anị ilíghíma nyáná nna fụ́ḅára ogbo anịgha nna ḅara. Nnị pịghị ḅoo dumam sị Krais na taa ámányánáapụ ḅara kụ́rá a mmẹẹ́ ndẹ́ẹ oyia si findi.

⁵ (Mịnaapu ma sima, isi fịịapụ mamgba fịị ḅụ sághịgha ákị muu kụ́rá a mmẹẹ́ ndẹ́ẹ oyia si findi ma kara sáá láa.) Mịma anịị parị fịị ḅụ sághị ma.

⁶ Karịiḅi na tọ́ntọ́ fịnị parị fịị ḅụ sághị ma bie sọapụ pịrịm, Mmẹẹ́ kárámá fịị ma nna ḅụ kụ́rọ nyanagha; nnị Tamuno na Krais igwagwaapụ sọbẹm, nnị pịghị ori na taábẹm kụ́rá a ndẹ́ẹ oyia si findi.

Satanị Sọ́ḅa

⁷ Kụ́rá a ndẹ́ẹ oyia si findi ma ḅọ́rọ́fáma sáá, nnị Satanị ma fímabẹm ori ikóliwarịbie,

⁸ ọ pịghị pághábẹm sị muu oḅori pa tuminikiri gbọrụ ḅụ n gálágáláma sẹ ma sịị, mịná sẹ ma anịị Gọgu na Magọgu. Satanị nnị kị́nị́mamgba akuoo kobiri pa ọ́mụ́gbi ḅoobẹm. Nna kịẹbịpị sọ́ḅọ́rọ́ posie aka fịnị onwo.

⁹ Nnị tuminikiri ma nwángị ikélémam na pịghị Tamuno ḅẹlẹma opu ama ma. Kụ́ma fịnị sághị sobie kóróḅom sị n dọ́ghụ́ma.

¹⁰ Anịsáa oḅori pa n sị ẹ́kpẹ́dua ma nnị ọ pa ọpọlịḅuruma pa dọghụarị kọrịfịnị ésiḅe bie gbi suam, n ḅáláfama nama ma na iruo ikiakoroapụ ma gbi suamaa ngaa, nnị n pa tọ́rụ́siarịmabẹm dii na ḅáa na ákị muu ḅẹsá ḅẹsá láa.

Kunema Ḅẹ́rẹ́kọọ

¹¹ Anịsáa a ḅoo opuma dụḅa pị́na imine arịm na pịghị anị ọ́gọ́nọ kpọrọfị́nị́ḅọ. Tuminikiri na so na mangịm ọ fịnị angaá n pịghị mịnị jẹ́ pa fịnịngaa nyanagha.

¹² A pịghị fịịapụ ma arịm, duḅaapụ na káláapụ na sẹ́fịnịarị imine ma tórúku. Nnị tọgha diri findim anịsáa n pịghị jẹ́ diri findim, duma diri. Fịịapụ ma nnị n sịbị ḅẹ́rẹ́kọm n mịẹmáa nyẹ ḅụ ḅọ́rọ́ diri mamgbabie n gịẹ kóróma ḅara.

¹³ Anịsáa tọ́rụ́ ma anị bie fịnị fịịapụ mamgba pághámaḅom, fịị na duaama nna bie fịnị fịịapụ mamgba pághámaḅom. Nnị nnị kị́nị́mamgba sịbị ḅẹ́rẹ́kọm nnị mịẹ maá nyẹ ḅụ ḅọ́rọ́.

¹⁴ Anịsáa fịị na duaama ma nnị n gbi pa kọrịfịnị ésiḅe ma ḅụ gbi suam (Mịị kọrịfịnị ésiḅe ma anịị mmẹẹ́ kárámá fịị ma).

¹⁵ Nnị nna ẹrẹ gịẹghaapụ dumaapụ ma diri bie nnị n pa kọrịfịnị ésiḅe ma ḅụ gbi suam.