Matiu 5 - Ibani New Testament

Tụ́ndụ́ Ọ́gọ́nọ Jizọs Ibi Oku Dugho Wásámam

¹ Mị́sa Jizọs túminị́ kpo ma árị sáá, ọ tụ́ndụ́ angásá múm sị kpọrọfịnị. Ori ọḅụduaapụ ọ damaḅom,

² ọ warị saghị nyẹ pa n die ḅẹẹ:

Tụ́ma Bieḅẹlẹ

³ <

⁴ Karịiḅi fịnị duaduarịapụ pịrị, tegó, nnị nna bie mịẹ diinmabẹm!

⁵ Karịiḅi fịnị nna ḅụ sitérémaapụ pịrị tegó tuminikiri ma nna nyẹ sọ́bẹm!

⁶ Karịiḅi fịnị n pịrị nna tẹ́mẹ́ gbọrụ pa dọghụarịapụ ḅẹ́ nnị Tamuno dọghụnyẹ mịẹ, Tamuno n binyẹ ma mịẹ muu sịḅịlamabẹm!

⁷ Karịiḅi fịnị lolomakúkúbie nyánáapụ pịrị tegó, Tamuno pịghị lolomakúkúbie pa nnị diebẹm!

⁸ Karịiḅi fịnị aka na egberi na duma nyánágháapụ pịrị, tegó nnị Tamuno árịbẹm!

⁹ Karịiḅi fịnị diin mịẹmịẹpụ pịrị, tegó n Tamuno awọ pa n sịịbẹm!

¹⁰ Karịiḅi fịnị n pa tọ́rụ́siarịmaarịapụ pịrị karakárá ibiamịẹnyẹ gosi, tegó so ama ásẹ́mẹ́kiri ma nna nyẹẹ!

¹¹ <

¹² Bieḅẹlẹ dụrụkụ tegó ọmịna gbẹ́ẹ̄ nyẹ opuma dụḅam sobie, ḅẹ́ anị gbẹ́rẹ́ ḅara ma anịị nnị ọ tórúku fịnị ikiakoroapụ ma pa tọ́rụ́siarịma ḅara.

Tuminikiri Fụụ Na Baá Na

¹³ <<Ọmịnị anịị tuminikiri fụụ ma, kụ́ma ḅọ́rọ́ fụụ anị ḅẹ́lẹ̄ ḅuumamam nnị tọ́rọ pa fụụ pa anị mịẹbẹ? Anị mịnị ḅẹ ibi, ḅẹ ibi ḅụ ofori, anịmanakaragha nnị anị ḅúuma sị túminị́ anị nánga.

¹⁴ <<Ọmịnị anịị tuminikiri baá ma, kálá tụ́ndụ́ ọ́gọ́nọ fịnị opu ama ine ḅọghubịgha.

¹⁵ Anị gbẹ́rẹ́ ḅara ma túminị́ tọndọ tọndi tọ́ndigha sị anị pa bọlị sughubie sua. Anịmanakaragha n pa tọndọ gbánágbáná nyẹ ḅụ gbánām sị anị baá pa warị ḅụ fịnịapụ gonyẹ́ gonyẹ́ pịrị.

¹⁶ Anị gbẹ́rẹ́ ḅara ma wáriso sị ị́yẹ́ baá opuma bia túminị́ toruku sị nnị ị́yẹ́ ibifịrị arịị sị ị Daá sobie fịnịḅọ ma túmíní.

Mosis Ologho Gboloma Dienyẹ

¹⁷ <

¹⁸ A karakárányẹ ma dugho ọ pịrịm, akị muu so na kiri ma ẹmẹẹfa sáá láa, ịrụḅa nyẹ ẹ́gẹ́rẹ́ ma ḅụ, ịrụḅa nyẹ n diri bie gịẹnyẹ ma ẹmẹẹ́fabịgha ólóghó ma ḅụ akị muu nyẹ gonyẹ́ gonyẹ́ kiriakị sáá láa.

¹⁹ Mịná ólóghó ma ḅụ, anị ḅụ ịrụḅa nyẹ kaá ḅo gonyẹ́ gonyẹ́ pịghị ọkọ pa jẹ́apụ die ḅẹ́ nnị ọkọ mịẹ, ịrụḅaḅọ anịị nnị pa n ḅọ sị bẹnyẹ so ama ásẹ́mẹ́kiri ma ḅụ. Kụ́ma mịná ologhó ma kokoarịḅọ gonyẹ́ gonyẹ́ pịghị mịná ologhó ma pa jẹapụ diearị, mịị ḅọ ma duḅaḅọ anịị nnị pa n ḅọ sị bẹnyẹ so ama ásẹ́mẹ́kiri ma ḅụ.

²⁰ Ḅẹẹ a dugho ọ pịrịm ọmịna karakárá ibiamịẹnyẹ Farisiiapụ ma na ólóghó nyẹ́dieapụ ma nganyẹ nẹngịgha nẹ́ngịgha ọ jẹ́ éné jẹ́ éné so ama ásẹ́mẹ́kiri ma sọbịgha.

Bieoḅu Gboloma Dienyẹ

²¹ <<Ọ́ kọ́kọ́ náa ma, ḅọlọ sáá éné éné n dugho túminị́ ma pịrịm, <Ọ kị́nị́ ḅáma, kị́nị́ ḅáḅọ́ gonyẹ́ gonyẹ́ ḅẹ́rẹ́kọ siri tórúku sẹ́bẹm.>

²² Kụ́ma a dugho ọ pịrịarị amịna mị́naḅọ dighi bieoḅu ḅọ gonyẹ́ gonyẹ́ ḅẹ́rẹ́kọ siri tórúku sẹ́bẹm, pịghị jẹ́nyẹ, amịna mị́naḅọ owiḅọ ḅẹḅọ, <Ịrị oforioforị tumḅọ,> Juuapụ ámáḅẹ́rẹ́dughoapụ ma dáabẹm. Kụ́ma kị́nị́ ḅẹ́ ḅo, <Ịrị oḅoriḅọ!> ẹ́kpẹ́duaama kọrịfịnị bie sọbẹm.

²³ <

²⁴ Ị́yẹ́ agbaa ma wáriso ẹ́bẹ ma tórúku. Parị muu ị mị́naḅọ owitụ́wọ na diin mịẹ, anịsáa ḅoo ị́yẹ́ agbaa mịẹẹ.

²⁵ <<Álála ḅẹ́rẹ́ pa ị sịbị gbánā ḅọ na ḅẹ́rẹ́fáma. Anịị mịẹ ḅẹ́rẹ́ ma na ḅẹ́rẹ́kọ́wárị mugha sáá, ḅẹ́rẹ́kọḅọ ma pịghị ine i saghị ámákúrúapụ ma ḅarabie suabẹm sị nnị i saghị ikóliwarịbie sua.

²⁶ A karakárányẹ ma dugho ị pịrịm, ikóliwarị ma bie ị págháḅobịgha akị muu ị́ nnị ị sịbị pẹ́lẹ́ igbii gbọrụ ma gbẹ́ẹ̄ fama sáá.

Amadọghụ Gboloma Dienyẹ

²⁷ <<Ọ kọkọ náa ma ólóghó diri ma dughonyẹ ḅẹẹ,

²⁸ Kụ́ma a dugho ọ pịrịm tọ́rụ́ pa ọ́rụ́ḅọ dighi sị a nyáná dọghụḅọ gonyẹ́ gonyẹ́ amadọghụ ológhó kórómam n ḅo tẹ́mẹ́bie.

²⁹ Ḅọ́rọ́ ị́yẹ́ ámáḅara tọ́rụ́ ị mịẹbẹm ḅẹ́ i siinyẹ mịẹ, anị sọghusi pa ḅuuma. Anị ibiḅam ḅẹ́ ị́yẹ́ oju gbẹ́rẹ́ angaá faá, anịmanakaragha sị ị́yẹ́ oju gbọrụ káara sị nnị i pa ẹ́kpẹ́duaama kọrịfịnị bie gbii sua.

³⁰ Ḅọ́rọ́ ị́yẹ́ ámáḅara i mịẹbẹ sị i siinyẹ mịẹ, anị pẹ́lẹ́ ḅuuma. Anị ibiḅam ḅẹ́ ị́yẹ́ oju gbẹ́rẹ́ angaá faá, anịmanakaragha sị ị́yẹ́ oju gbọrụ káara sị nnị i pa ẹ́kpẹ́duaama kọrịfịnị bie gbii sua.

Yaasịghị Dienyẹ

³¹ <

³² Kụ́ma a dugho ọ pịrịm, amịna taḅọ sịghịḅọ gonyẹ́ gonyẹ́ na a jẹ́ owitụ́wọ na múnogha sa a mịẹm sị arị amadọghụḅọ sọ; pịghị n sịghị ọ́rụ́ḅọ ma yaaḅọ gonyẹ́ gonyẹ́ amadọghụ ólóghó ma kóróm.

Nyẹ Kuḅufị Dienyẹ

³³ <<Ọ́ kọ́kọ́ náa ma n dugho olom sáapụ ma pịrịm, <Ị nyẹ kuḅufị mịẹ dọghụnyẹ kaa ma, kụ́ma árị ḅẹẹ í kuḅufị Gbámásóḅọ ma pịrịnyẹ ma mịẹm.>

³⁴ Kụ́ma a dugho ọ pịrịm, jẹ́ éné jẹ́ éné nyẹ kuḅu fị́ma: so kuḅufị ma, tegó anịma anịị Tamuno ma imine;

³⁵ Anịgha tuminikiri pa nyẹ kuḅufị ḅẹ́ anịma anịị Tamuno ḅụ́ọ́gbána ịkasị, anịgha Jerusalem pa nyẹ kuḅufị ḅẹ́ anịma anịị opu Ámányánáḅọ ma opu ama.

³⁶ Pịghị ị sịbị pa nyẹ kuḅufị ma tegó i ine gbẹ́rẹ́ sịbị núme mịẹbịgha anị pị́napị́na anịgha anị mịẹ anị kúrúkúrú.

³⁷ Árị ḅẹ́ ị́yẹ́ innh, innh dighi ị́yẹ́ errnh errnh, errnh errnh mịma nẹ́ngịma nyẹ fịnịfịnị anịị anị ẹ́kpẹ́dua ma ḅara saghịḅom.

Sughubi Gboloma Dienyẹ

³⁸ <

³⁹ Kụ́ma mị́sa a dugho ọ pịrịarị sughubi dọ́ghụ́ma i miẹsima ḅọ ḅara. Ḅọ́rọ́ tumḅọ i ḅụ́rọ́ ị́yẹ́ ámáḅara lughu ḅụ, ị́yẹ́ ẹ́rẹ́ḅara lughu pịghị n ḅọ pịrị n ḅo ḅụ́rọ́.

⁴⁰ Ḅọ́rọ́ tumḅọ ị pa ḅẹ́rẹ́kọ siri múm sughubie i suabịtẹ gosi, n ḅo pịghị ọ́gọ́nọ i suabịtẹ ma sọ akịị.

⁴¹ Ḅọ́rọ́ tumḅọ kụrọ tọ́rụ́ ḅụ i ḅẹ́ ḅẹẹ i nana gbẹ́rẹ́ tunbi muu, n ḅo na mmẹẹ́ tunbi muu.

⁴² Tumḅọ i ḅárábie nyẹ bi sa gonyẹ́ gonyẹ́ n ḅọ pịrịị, pịghị i ḅárabie nyẹ ḅọlọ dọghụapụ dighi tọ́rụ́sima.

Ị́yẹ́ Iruonaapụ Ḅẹlẹma

⁴³ <

⁴⁴ Kụ́ma a dugho ọ pịrịm: ị́yẹ́ iruonaḅọ ḅẹlẹma, sị pịghị tẹ́ghẹ i pa tọ́rụ́siarịmaarịapụ pịrịị,

⁴⁵ sị ọmịnị ọmịna Daá sobie fịnịḅọ awọ sọọ bẹ ḅara. Ọ mịẹm sị ori ịrụa bia siiapụ na ibiapụ ḅụ pịghị mịẹsị ori iti ibiamịẹnyẹapụ na siiamịẹnyẹapụ ḅụ kóró.

⁴⁶ I ḅọ́rọ́ ị ḅẹlẹmaapụ ḅẹ́lẹ́mam i tẹ́ gbẹ́nyẹ nyánáḅọ ḅẹ́? Ásẹ́mẹ́kiri ósó igbii biiapụ nnị anị gbẹ́rẹ́ ḅara mịẹgha?

⁴⁷ I ḅọ́rọ́ sịbịpị pa ị́yẹ́ amịna owiapụ ngéré sị, ị tẹ́ mịẹ jẹ́apụ nẹ́ngị? Tamuno nímighaapụ ma nnị anị gbẹ́rẹ́nyẹ mịẹgha?

⁴⁸ Anịgosi kpain fịnị, ị́yẹ́ Daá sobie fịnịḅọ kpain fịnị ḅara.