Matiu 16 - Ibani New Testament

Túminị́ Ilíghíma Bim

¹ Farisiiapụ na Sadusiiapụ Jizọs damaḅom sị ọ daádighi ḅẹ́ ọ sobie saghị ḅo ilíghíma pa n die.

² Ọ pagharam, <<Éné ḅupiri sáá, so tọ́rụ́ ma saghị áwụ biarị sáá ọ ḅẹẹbẹm ḅẹẹ éné ma ibibẹm.

³ Dedebie, so tọ́rụ́ áwụ biamaẹrẹ warị oḅuto sua ọ ḅẹẹbẹm, irisé fiebẹm. Ọ nimim sọ tọ́rụ́ ma fịnị ḅara dughofindi. Kụ́ma sáá ma ilíghíma ọmịnị ine anị dugho findigha.

⁴ Tamuno nimigha silálá sii tuminikiriapụ ḅụ́gbérépuma ilíghíma biiarị, kụ́ma n gbẹ́rẹ́nyẹ sọ pa n diebịgha Jona ilíghíma ma siima.>> Jizọs warị anịsáa n wárịso sị soo.

Farisiiapụ Ma Na Sadusiiapụ Ma Yisti

⁵ Ọḅụduaapụ ma tọ́rụ́ ma sáḅá koro sáá ma ḅụ, nnị biekórómaḅogha sị fịtúrú akị.

⁶ Jizọs warị dugho n pịrị ḅẹẹ, <<Ọ tọ́rụ diinma, ọ ḅụẹbị Farisiiapụ ma na Sadusiiapụ ma yisti pịrị.>>

⁷ Nnị bịpị ḅụ mịma ḅẹ́lẹ́mam nnị ogbobie sị ḅẹẹ, <>

⁸ Jizọs nnị dughoarị nyẹ nimim warị gbíla, <

⁹ na ọ pa akanyaḅo nyanagha? Oḅiekórómagha sọ́nọ́ a fịtúrú kpo pa túminị́ oyi mmẹẹ́ ndẹ́ẹ na oyia si pịrị fịị, ndẹẹ́ a nkana ọ gbálā ḅo sị kọnyẹ́.

¹⁰ Ọ pịghị biekórómagha a sọ́nọ́ma fịtúrú kpo pa oyia ndẹ́ẹ pịrị fị na pịghị kọọ sị ọ gbálā ḅo ndẹẹa nkana.

¹¹ Anị tọ́rọ́fịnị ḅẹẹ, ọmịnị ine akanyaḅogha ḅẹẹ a fịtúrú gbólómanyẹ dugho ọ pịrịgha, Kụ́ma ọmịnị ọ ḅụẹbị Farisiiapụ ma na Sadusiiapụ ma yisti pịrị.>>

¹² Anịsáa anị n ḅo akanyaḅo nyẹ ḅẹẹ ori ḅẹgha ḅẹẹ nnị nna ḅụẹbị nnị pa fịtúrú mịẹarị yisti ma pịrị, kụ́ma n ḅụẹbị Farisiiapụ na Sadusiiapụ dienyẹ ma pịrị.

Krais Gboloma Sị Pita Dugho Págháma Nyẹ

¹³ Jizọs ḅo Sizariya Filipai párángáa láa sáá, ori ọrẹ ọḅụduaapụ gbilam, <>

¹⁴ Nnị pagharam, <>

¹⁵ Ọ warị n gbíla, <<Ọmịnị ọ tẹ́ dugho, ọ ḅẹẹ ịrị tụọ?>>

¹⁶ Saimọn Pita pagharam, <<Ịrị anịị Krais ma, dumafịnị Tamuno ma Tụwọ.>>

¹⁷ Jizọs pagharam, <

¹⁸ A dugho ị pịrịm ḅẹ́ ịrị anịị Pita (anịị okpo dapịrị pa siinyẹ), mịị okpo dapịrị ma ḅụ anịị a pịghị ị́yẹ́ sọsị nama bẹnyẹ, fịị kụrọmamgba opu ḅụ́pọ́ ma sọ pịghị anị sọḅabịgha.

¹⁹ A so ama ásẹ́mẹ́kiri igodo findinyẹ ma pa ị pịrịbẹm; sị ọkaka nyẹ gonyẹ́ gonyẹ́ tuminikiri, sobie sọ nnị pịghị anị kakábẹm. Ọ pịghị fiima nyẹ gonyẹ́ gonyẹ́ nnị pịghị anị fiimabẹm sobie.>>

²⁰ Anịsáa ọ warị ori ọḅụduaapụ birinụ́nụ́ ḅẹẹ nnị dugho gbẹ́rẹ́ḅọ sọ pịrịma ḅẹẹ ori anịị Krais ma.

Jizọs Ori Fịị Gbolomanyẹ Dughom

²¹ Anịsáa ma ḅụ saghị Jizọs warị saghị dughofindi ori ọḅụduaapụ pịrị ḅẹ́ ọ Jerusalem muu nyánam sị tọgha tọ́rụ́siarị árị sẹ́nịapụ ma na igwagwaalaapụ na ólóghó nyẹ́dieapụ ḅara, n pịghị ọ ḅaabẹm sị tẹ́rẹ́ kárámá éné ọ fịị ḅụ saghịbẹm.

²² Pita ọ pa angaá ḅọ́rọ́m sị sághị igani ọ pịrị. Warị ḅẹẹ, <>

²³ Jizọs tọ́rụ́ pighim sị Pita ḅẹẹ, <<Ị́yẹ́ ọḅụju sọọ, Satanị! Ịrị asọ mgbẹsẹ dapịrị sọ ị pịrịm; ḅẹẹ ịrị Tamuno ju ofori, kụ́ma túminị́ ju.>>

²⁴ Anịsáa Jizọs warị dugho ori ọḅụduaapụ pịrị, <<Ḅọ́rọ́ i dua bẹḅọ fịnịfịnị, anịḅọ ma n ḅọ ḅụ pighibẹm sị n ḅọ mgbẹsẹ sị́ dighi akị sị i dua.

²⁵ Ḅẹẹ, amịna duma dụaḅọ́rọ́ma dọghụḅọ gonyẹ́ gonyẹ́ anị ḅuumabẹm, kụ́ma amịna duma ḅuumaḅọ i sịbị gosi, anị dọghụḅobẹm.

²⁶ Anị tẹ́ sọ́nyẹ so tumḅọ pịrịbẹ ḅọ́rọ́ n ḅo tuminikiri gbọrụ ma nyánaḅom, kụ́ma n ḅo tẹ́mẹ́ ḅuumam? Anịgha tumḅọ tẹ́ pa n ḅo tẹ́mẹ́ na dima bẹ?

²⁷ Ḅẹẹ, Tumḅọ yii Tụwọ ma ọ ḅobẹm ọ Daa ma ipine ḅụ na ori sookumuapụ na, anịsáa ori ọ́rụ́ḅọ ọ́rụ́ḅọ gbẹ́bẹm n ḅo nwángịmáa fịrị láa ḅara ḅụ.

²⁸ A karakárányẹ ma dugho ọ pịrịm, jẹapụ mịnga sẹ́fịnịarịapụ fịịbịgha akị muu n Tumḅọ yii Tụwọ ma árị ḅoarị ori ásẹ́mẹ́kiri ḅụ.>>