Kolosiapụ 3 - Ibani New Testament

Tọ́ntọ́ Duma Ngaa Ólóghó

¹ Anịsáa éné éné ọ Krais na fịị ḅụ saghịmáa ḅara, ọmịnị ọmịna tẹ́mẹ́bie pa sobie fịnịnyẹ ḅụ gbánaá Krais Tamuno ámáḅara angaá kpọrọfịnị angaá.

² Ọmịnị ọmịna kóróma pa sobie fịnịnyẹ ma ḅụ gbánā, kiribie fịnị nyẹ́maghaa.

³ O fịịmam gosi, ọmịna duma mị́sa n pa Krais na Tamuno bie ḅọghum.

⁴ Krais ọmịna duma ma, ọ ḅụ diepágháma sáá, ọmịnị sọ ọmịna ḅụ diepághámabẹm ipine ḅụ.

⁵ Anịgosi, mịẹsị anị fịị, tuminikiri ị́yẹ́ duma bie fịnị pụghọ tarịarịnyẹ ma: yáakuu ḅụ ofori nwángị duma, ámánwángị ịlọ́lị duma, ámánwángị pughotarị, siinyẹ pughotarị na oputọrụ mịma sị ḅara sọ́ḅọ́rọ́ susi n kara tamuno pịrị.

⁶ Mịnanyẹ ma gosi, Tamuno igani ḅo ọ bịpị pughughaapụ ma pịrịarị.

⁷ Parị ọmịnị mịị asọ ma nwángịm, ọ kọọ duma ḅara gosi.

⁸ Kụ́ma ọmịnị mị́sa mịnanyẹ mamgba ḅụ, ḅụ sií, mịnanyẹ ma anịị, bieoḅu, opu bieoḅu, sitẹ́mẹ́ nyáná jụghọ pịrị, kị́nị́ dughosima na ọmịna ịlọ́lị ẹ́gẹ́rẹ́kọọ.

⁹ Iruo ẹ́gẹ́rẹ́kọọ jụghọ jụghọ pịrịma ọmịnị ọlọm oju ma na anị mịẹ mịẹnyẹ sịghịmáa ḅara ma,

¹⁰ ịwọ oju ma sua sị árị ḅẹ́ sámámgba ọmịnị iwọarị, ọ pịghị sẹnịarị ḅara ọmịna Tẹ́mẹ́ḅọ nimi ḅụ sị pịghị ọ fịnị ḅara fịnị.

¹¹ Mịnga Girikiḅọ anịgha Juuḅọ ofori tọ́ngọ̄ pẹ́lẹ́ anịgha tọ́ngọ̄ pẹ́lẹ́ghaḅọ, biaapụ, tọ́rụ́ findighaapụ, ómóniapụ anịgha furoawọ, kụ́ma Krais ori nyẹ́mámgba pịghị nyẹ mamgba ḅụ imii.

¹² Anịgosi, Tamuno sẹlẹakị ọ ḅụ pịrị túminị́, tọ́ntọ́ pịghị ori ibima ḅẹlẹmaapụ ọ ḅụ́jịrịrị pa ọmịna suabịtẹ mịẹ, ibitẹ́mẹ́ nyáná, ḅụ sitéréma, diin duma na pịghị inema nyáná.

¹³ Ọmịnị ngịrịma nyáná jụghọ jụghọ pịrị pịghịị siiḅụḅarasipịrị nyáná siinyẹ pa ọ mịẹapụ gonyẹ́ gonyẹ́ pịrị. Ọ siiḅụḅarasipịrị nyáná Kị́nị́nyánáḅọ so siiḅụḅarasi ọ pịrị ḅara.

¹⁴ Mịná mịẹnyẹ mamgba ọgọnọ, ḅẹlẹma nyána, mịma anịị nyẹ mamgba kpọọ pa gbẹ́rẹ́nyẹ mịẹnyẹ anị kpain ḅara ḅụ.

¹⁵ Krais diin ọmịna tẹ́mẹ́bie ḅẹrẹtọ, ọmịnị gbẹ́rẹ́ ojuapụ ḅara ma, nnị ọ siim ḅẹ́ ọ diin ḅụ ngaa. Ọ pịghị ịmịẹḅam pa Tamuno ḅẹẹ.

¹⁶ O wáriso sị Krais ẹ́gẹ́rẹ́ ma bifụfụụ́ ḅara pa ọmịna bie ngaa nyẹ pa jụghọ jụghọ die pịghị opu níminyẹ ḅụ jụghọ jụghọ birinụ́nụ́, ọ núme diri ma súu pịghị núme súu pịghị tẹ́mẹ́ju núme suu ọmịna tẹ́mẹ́bie ịmịẹḅam pa Tamuno ḅẹẹarị.

¹⁷ Ọ mịẹnyẹ gonyẹ́ gonyẹ́, ḅọ́rọ́ ẹ́gẹ́rẹ́ ḅụ anịgha mịẹnyẹ ḅụ, nyẹ gonyẹ́ gonyẹ́ mịẹ Kị́nị́nyánáḅọ Jizọs ẹrẹ ḅụ, ịmịẹḅam pa Tamuno Daḅọ ma pịrịarị ori ẹrẹ ḅụ ḅọ́rọ́.

Krais Ọḅụduaapụ Nna Wárị Tákubiri Bẹ Ḅara

¹⁸ Taapụ ọ sịbị pa ọmịna deeapụ sughubie sua mịị ḅara ma anịị anị karakárá ḅara Kịnịyánáḅọ ma tórúku.

¹⁹ Deeapụ ọmịnị ọmịna taapụ ḅẹlẹma si kụrọ ḅara pa nnị na ngaa ma.

²⁰ Awọamaapụ nyẹ gonyẹ́ gonyẹ́ ḅụ, ọmịnị ọmịna nyingiapụ na daapụ bịpị pughu, ḅẹ mịma Kị́nị́nyánáḅọ ḅụ ḅẹlẹm.

²¹ Daapụ opuma ọmịna awọ iganima ma anịgha anị nna biesimabẹm.

²² Ómóniapụ, ọmịnị ọmịna nyánáapụ tuminikiri bịpị pughu nyẹ gonyẹ́ gonyẹ́ ḅụ, ọmịnị anị mịẹ nna tọ́rụ́ ọ ḅụ laarị sa ngéréghaa, ọmịnị nna ḅẹlẹma nyánáḅoo ḅẹ́ ḅara, kụ́ma ọmịnị anị mịẹ karakárá tẹ́mẹ́bie na pịghị osigha pa Kị́nị́nyánáḅọ ma pịrị ḅụ.

²³ Ọ mịẹarịnyẹ gonyẹ́ gonyẹ́ ọmịnị ọmịna tẹ́mẹ́ mamgba pa anị mịẹ, sọ́ḅọ́rọ́ ọ fịrịnwangị Kị́nị́nyánáḅọ ma pịrịarị ọ nwángị tumḅọ pịrịgha.

²⁴ O biekóróma ḅẹ́ ọmịnị ilanyẹ nyánáḅobẹm Kị́nị́nyánáḅọ ma ḅara gbẹ́nyẹ ḅara. Kị́nị́nyánáḅọ Krais ma anịị ọ fịrịnwangị pịrịarịḅọ.

²⁵ Irima nyẹ mịẹ ḅo gonyẹ́ gonyẹ́ n sima n ḅo gbẹ́bẹm n ḅo mịẹ irima nyẹ ma ḅụ, tórúku pịghị anị ḅụ ofori.