Kolosiapụ 2 - Ibani New Testament

¹ A biim ḅẹ́ ọ nimi a ọmịna sịbị go na pịghị Laodisiya ḅụ fịnịapụ sịbị go a tọ́rụ́siarị fịrịnwangị ọ pịrị lamamáa ḅara na pịghị jẹ́ éné na tọ́rụ́ pa ị́yẹ́ árịghaapụ ma sịbị.

² A mịma mịẹm sị nnị tẹ́mẹ́kụ́rọ nyáná sị gbẹ́rẹ́ ḅẹlẹma ḅụ fịnị sị nnị ine bii fụ́fụ́ sị káara akanyaḅo nyáná, mị ḅara ma nnị Tamuno ḅọghunyẹ ma nimibẹm, anịị Krais ma ḅụgbọrụ.

³ Ọ ḅụ anịị Tamuno opu níminyẹ na níminyẹ ngọ gonyẹ́ gonyẹ́ ḅọghu fịnịnyẹ.

⁴ A mịma dugho ọ pịrịarị gbẹ́rẹ́ḅọ so ḅẹlẹ bịpị nyẹ nụná pa oḅori pa ọ sibịẹgha ḅara.

⁵ Karakárányẹ ḅẹ́ ojumẹnị ḅụ a ọmịnị na ofori, kụ́ma tẹ́mẹ́ ḅụ a ọmịnị na imii, anị pịghị i bieḅẹ́lẹ́maarị nimiḅo ọ gbụ́nụ́nụ́ ḅara pa ọmịna duma kọarị ḅara ọmịna minini pịghị Krais ḅụ sẹ kụ́rọ ḅara.

Bii Duma Krais Bie

⁶ Anịgosi, ọ Krais Jizọs daákịmaá ḅara ḅẹ́ ori anịị Kị́nị́nyánáḅọ, ọmịnị ọ ḅụ duma kọọ bịpị muu.

⁷ Ọmịna kune ọ ḅụ sọtẹ́lẹ́máa, ọmịnị ọ ḅụ duma kọọ, sị sẹ kụ́rọ tẹ́lẹ́ma ọmịna minini ḅụ, nnị anị pa ọ die ḅárá. Si bieḅẹlẹ imiẹḅa ọmịna bie bii fụ́fụ́.

⁸ O minima gbẹ́rẹ́ḅọ sọ ofori ofori na oḅori pa kị́nị́ sinyẹ nụná ḅụ ḅọ́rọ́ o kuu pa ịkóli bie sua, anịị tuminikiriapụ nyẹ mịẹmịẹ ḅara ḅụ saghị ḅoarị nyẹ, tuminikiri táarị sitẹ́mẹ́ ḅụ ḅọ́rọ́ kụ́ma Krais ḅara ḅụ saghị ḅogha.

⁹ Ḅẹẹ Krais ḅụ, anịị Tamuno káara ḅara pa ọ ḅụ die nyẹ ojumẹnị ḅụ,

¹⁰ n pịghị Krais bie káaraapụ pa o mịẹmam, ori anịị pịghị sịbịda táarịapụ na kụ́rọ gonyẹ́ gonyẹ́ pịrịḅọ.

¹¹ Ori na gbẹ́rẹ́ ḅụ ḅụ fịnị ḅụ anịị nnị ọmịnị tọ́ngọ̄ pẹ́lẹ́ nyẹ túminị́ ḅara pa pẹ́lẹ́ ngá nyẹ́gha, mịma anịị siiamịẹnyẹ duma ma pẹlẹsii, kụ́ma Krais ọ ḅara pa tọ́ngọ̄ ma pẹ́lẹm.

¹² Ọ mingi sara sáá nnị ọmịnị na Krais dipi gbolomam, mingi sara ḅụ n pịghị ọmịnị na Krais saghịmam, ọmịna minini Tamuno kụ́rọ ma ḅụ, fịị bie ọ sághịma ḅọ.

¹³ Gbẹ́rẹ́ sáá biri tẹ́mẹ́ ḅụ ọ fịị famam ọmịna sii gosi, ọmịnị ma pịghị ólóghó nyánágha Juughaapụ gosi. Kụ́ma mị́sa Tamuno ọmịnị pa duma bie suamam Krais ḅụ. Tamuno pịghị wámịna sii mamgba wáriso wa pịrịm.

¹⁴ Diri bie n gịẹ wámịna sịbị gbánā ologho ma na ologho ma bii nyẹ káakọsima wamịnị na fiagha nyẹ, pịghị asọ mgbẹsẹ wa pịrịnyẹ, ori anị saghị siim, anị ḅaupálị mgbẹsẹ sị́ ọgọnọ.

¹⁵ O táarịapụ na kụrọnyanáapụ ḅara nna ọ́mụ́gbinyẹ daákịfáma sáá, ọ mịẹm túminị́ n pa tọ́rụ́ pa nyẹdighinyẹ mịẹ, mgbẹsẹ sị́ ma pa n sọḅa.

¹⁶ Anịgosi minima sị gbẹ́rẹ́ḅọ sọ ḅẹ́rẹ́kọ ọ sịbị, o ḅuu ḅụ nyẹ anịgha ọ fịị fịịnyẹ anịgha tọ́ntọ́ éné, álálị fị gbolomanyẹ, anịgha ịwọ akalụ́ anịgha Ịnyọ́sárá Éné gbolomanyẹ.

¹⁷ Mịnanyẹ ma anịị toruku ḅoarị nyẹ ma tẹ́mẹ́; kụ́ma nyẹ ma ḅụgbọrụ, Krais bie anịị anị iminyẹ.

¹⁸ Minima kị́nị́ ḅẹ́rẹ́ pa ọ ḅárá sima, dughoarị ḅọ ḅẹ́, nḅọ nyẹ́nimiḅam, anịị nḅọ múnogha dawọ ḅụ árịarị nyẹ gosi na pịghị nḅọ nyána oḅori pa kị́nị́ sị ḅụ sitéréma ḅụ na pịghị susi soókumuapụ pịrị ḅụ. Mịná túminị́ ma nnị ḅara pụ́nụ́nyẹ nyanagha sị opuamịẹnyẹ mịẹarị nna kóróma ḅụ

¹⁹ mịị ḅọ mịnị Krais ọlọ sẹ́magha, anịị oju ma sịbịdáḅọ. Krais ma sughubie oju gbọrụ ma duma nyánáarị n pịghị iko na nda na, na kuromeni ḅụ ḅọ́rọ́ anị ọlọ gboloma, anị warị sẹnị Tamuno bii bii ḅara ḅẹẹ anị senị́ị́.

²⁰ Ḅọ́rọ́ ọmịnị Krais na fịịm, si dụapaghama nyáná tuminikiri táarị tẹ́mẹ́ ma ḅụ, o tegósi duma kọarị sọ́ḅọ́rọ́ ọmịnị pa tuminikiri bẹapụ, o tegó mini si mịná ologho ma ọ ḅụ kụ́rọ nyáná?

²¹ <<Ḅara pa anị kuu ma! Ḅẹ́lẹ̄ pa anị lama ma! Ḅara pa anị lama ma!>>

²² Mịnanyẹ ma anịị ḅo papanyẹ so bẹnyẹ nnị anị pa fịrị ḅụ sua sáá, mịnanyẹ anịị túminị́ ologho na túminị́ dienyẹ.

²³ Mịná ologho ma sọ́ḅọ́rọ́ opu níminyẹ anị bie imi, tegó anị bim tumḅọ sáá ngúmá anị pịrị, ḅụ́sitéréma, pịghị ojumẹnị ma pa ḅụọ sughubie sua, kụ́ma kụ́rọ nyanagha ine tumḅọ tarịarịnyẹ na n ḅo sikóróma pa ḅụọ sughubie sua.