Jems 4 - Ibani New Testament

Tuminikiri Na Nangwọ Sọọ Ibighaa

¹ Ọ tẹ́ go jụghọ jụghọ na owusọarị pịghị ḅẹ́rẹ́fángálámáarị? Ọmịna ojumẹnị ḅẹlẹma nyẹ anịị sámámgba owusọarị nyẹ́gha ọmịna bie?

² Ị nyẹ dọ́ghụm, kụ́ma ine anị nyanagha, anịgo kị́nị́ sọ ị ḅáa dọ́ghụm, i kụ́rọ́ma pa nyẹ ma dọ́ghụm, kụ́ma í ine nyánaḅogha, anịgo i kam sọm, pịghị owusọ ị́ i dọghụnyẹ nyanagha tegó? I Tamuno ḅara anị bigha.

³ Ị pịghị gbíla sa, i nyánaḅogha, tegó i karakárá tẹ́mẹ́bie pa anị bigha, i biiarị nyẹ ma ọ́ pa ịḅụ ngéré na dụrụkụ́.

⁴ Ọmịnị ine Tamuno na sẹghaapụ, o nimigha ḅẹ́ tuminikiri ma na nangwọ sọọ anịị Tamuno na iruonaḅọ mịẹ? Dọghụḅọ gonyẹ́ gonyẹ́ ḅẹ́ n ḅọ tuminikiri na nangwọ sọọ, Tamuno iruonaḅọ sọmam.

⁵ Ọ tẹ́mẹ́ mmẹẹ́ mmẹẹ́ mịẹ dugho Tọ́ndiri ma ḅẹẹ, Tamuno karakáráma ọ pa wámịna bie sua tẹ́mẹ́ ma ḅẹ́lẹ́mam.

⁶ Kụ́ma Tamuno nyáná wa pịrị tọ́rụ́kụrụkụ́rụ́ kụrọm anị Tọ́ndiri ma dugho ḅara ḅẹ́, <>

⁷ Anịgo ọmịnị ọmịna ḅụ sịghị Tamuno ma súghúbie sua, ẹ́kpẹ́dua ma daá sẹmáa anịsáa ọ pịghị mangị sọ́bẹm ọ fịnịanga.

⁸ Kikia Tamuno damaḅo, ori sọ kikia ọ dámáḅobẹm. Ọmịnị ọmịna ḅara sịrị si siinyẹ bie, ọ pịghị ọmịna tẹ́mẹ́bie mịẹ fiafiama ọmịnị mmẹẹ́ a tọ́rụ́ kingi.

⁹ Ọ dụadu, ọ mịnị owuú, ọmịna dẹrị anị pịghị owuú nyẹ sọ, ọmịna bieḅẹlẹ ḅo pịghị tẹ́mẹ́sii ḅụ sọọ

¹⁰ Ịḅụ siterema Kị́nị́nyánáḅọ ma pịrị, ori sọ i sághị sóghólómabẹm.

Ḅẹ́rẹ́kọ Amịna Jẹ́apụ Pịrị Birinụ́nụ́

¹¹ O jụghọ jụghọ dughosima ma, ịyẹa mịnaapụ, ḅọ́rọ́ o jụghọ jụghọ dughosima anịgha ḅẹ́rẹ́kọ jẹ́ Krais duaarị mị́naḅọ pịrị, ọmịnị ólóghó ma dughosimaarị pịghị ḅẹ́rẹ́kọ ólóghó ma pịrịarị. Ịrị mịnị ólóghó ma koko ḅogha, kụ́ma ḅẹ́rẹ́kọ ólóghó ma pịrịarịḅọ.

¹² Tamuno ori ngéré anịị ólóghó pịrịḅọ pịghị ḅẹ́rẹ́kọḅọ ori ngéré anịị ine dụaḅọ́rọ́ma bẹḅọ pịghị tumḅọ guluguluma bẹḅọ, kụ́ma ịrị tụọ jụghọ gúlúgúlúmaarị ḅọ?

Birinụ́nụ́ Bịpịkpọ Gosi

¹³ Ọmịnị i pughuu, ọmịnị ḅẹarịapụ ḅẹ́, <>

¹⁴ Ị nimigha sa, ị́yẹ́ dumafịnị bẹ ḅara ḅáāẹnẹ, onwi fịnị ḅara ma anịị ọmịna dumafịnị ḅara, anị gbẹ́rẹ́ kálábiri págháḅom, warị anị gbẹ́rẹ́kiri ẹmẹẹfáa.

¹⁵ Mịị o dugho ḅẹnyẹ, ḅẹ́ ḅọ́rọ́ Tamuno mini mini, wa dumafịnị si mịma, anịgha i siinyẹ mịẹbẹm.

¹⁶ Kụ́ma mị́sa ọmịnị opu ibiamịẹnyẹ mịẹarị pịghị bịpịkpọarị, anị bịpịkpọ mamgba karakáragha.

¹⁷ Anịma ẹrẹ́sị, wa nimi sị miẹnaibi ibinyẹ ma mịẹgha sa, anị warị mịẹsị wa siiapụ sọọ.