Jems 3 - Ibani New Testament

Ḅẹ́lẹ̄ Ma

¹ Iyẹa mịnaapụ, ọmịna ḅụ tọghaapụ nyẹ́dieapụ sọ ma. O nimiḅara ma ḅẹ́, wamịnị nyẹ́dieapụ kụ́rọḅa ḅẹ́rẹ́kọ nyánábẹm.

² Wamịnị mamgba nyẹ mịẹ irima irimam, kụ́ma irimaghaḅọ amịna dugho bịpị ḅụ anị tumḅọ ma anịị kpain ḅo, n ḅọ pịghị n ḅọ oju gbọrụ ma ọlọbẹm.

³ Wa ikúlélu pa ásụ bịpịbie suam sị anị wamịnị osii bẹ ḅara, sị wamịnị anị daa wa mú bi ngaa muu.

⁴ Dighi onwiarụ dụḅa la ḅara, kụ́rọ fọ́rụ́ anịị anị dighi nwángịarị nyẹ, n dụpọ pa kárá gbẹ́rẹ́nyẹ anị n pa anị daa amaḅara na ẹ́rẹ́ḅara daarịnyẹ, árụ́ dọghụḅọ ma bi ḅara bi ḅara.

⁵ Anịị ḅẹ́lẹ̄ ma fịnị ḅara, anị ịrụm kụ́ma anị opuma bịpịkpọ kpọm. Pa dighi kálá fịnịnyẹ ine opu pịrị dọ́ghụ́ma bẹ ḅara.

⁶ Ḅẹ́lẹ̄ ma sọ fịnị kịkam. Anị ọ́ gbẹ́rẹ́ sii tuminikiri, gbẹ́rẹ́ angaá ḅụ fịnịarị wámịna oju bie, pịghị anị sii die wásámaarị wamịnị oju gbọrụ ḅụ. Anị fịnị pa wámịna duma gbọrụ ḅụ sua suam anịị kọrịfịnị bie saghị anị damaḅo fịnị.

⁷ Nama gonyẹ́ gonyẹ́, fíní, furo pa ikiriarị nama na nji na tumḅọ nnị na ngáman,

⁸ kụ́ma gbẹ́rẹ́ḅọ so na ine ḅẹ́lẹ̄ ma ọlọgha, anịma anịị ịnyọfagha siinyẹ, Kị́nị́ḅa lakpo anịị anị bie bii nyẹ.

⁹ Anị wa pa wámịna Nyánáḅọ Daḅọ ịmịẹḅam pa ọ pịrịarịnyẹ, anị wa pịghị pa kị́nị́ wiriarị nyẹ, Tamuno ọ ḅụ dighi tẹ́mẹ́apụ ma.

¹⁰ Ịmịẹḅam na gboonyẹ na mị gbẹ́rẹ́ bịpị ma bie saghị págháḅoarị. Ịyẹa mịnaapụ mịma ọkọfịnịbịgha.

¹¹ Gbẹ́rẹ́ ésiḅe ála mingi na ḅụ mingi pághámaḅoḅogha.

¹² Ị́yẹ́ mịnaapụ ile sị ine ẹ́lẹlẹ́ndẹ suabịgha, grepụ sị ine ile suabịgha anịgha ála bie fịnị ésiḅe ḅẹlẹ mingi pághámaḅo.

Sobie Saghị Kóróḅo Níminyẹ Bii

¹³ Ọmịna bie opu nyẹ́nimi pịghị akanyaḅo nyánáapụ imi? Ọmịnị ọkọọ fịnị ibi duma ḅụ pa anị die, ọ ḅụ sitéréma na opu nyẹ́nimi pa ọ mịẹarịnyẹ gonyẹ́ gonyẹ́ mịẹ.

¹⁴ Ḅọ́rọ́ i tẹ́mẹ́bie i nyẹ́mọnịarị, pịghị ákụ nyáná pịghị ịḅụ ịḅụ nimi, epele ti karakárá ma sịbị sẹ ma ḅẹ́, ị opu nyẹ́nimim.

¹⁵ Ọkọ fịnị opu nyẹ́nimi ma sobie saghị ḅogha, ọ́ mị tuminikiri nyẹ, ojumẹnị nyẹ pịghị sitẹ́mẹ́ nyẹ.

¹⁶ Nyẹ́mọ́ni na ịḅụ ịḅụ fịnị angaá, galagala na tọ́rụ́kịrịkị́rị́ siinyẹ, anịị anị angaá ma ḅụ fịnịfịnị nyẹ.

¹⁷ Kụ́ma ọ́gọ́nọ saghị ḅo opu nyẹ́nimi ma parị anị kpainm, anị pịghị diin ḅẹ́lẹ́mam, sárásárám, nangwọmiẹdim, anị pịghị tọ́rụ́kụrụkụ́rụ́ nyánam, ibi ibiamịẹnyẹ nyánam, anịị anị dipiapụ sughuarị nyẹ. Anị pịghị tọ́rụ́kúkúgha pịghị mmẹẹ́ a tọ́rụ kingigha.

¹⁸ Diin miẹmiẹapụ sị diin dipi pịghị karakárá ibiamịẹnyẹ sughu sughum túminị́ ma ogbobie.