Jems 1 - Ibani New Testament

¹ Mịị diri ma, Tamuno ómóniḅọ na pịghị Jizọs Krais ómóniḅọ Jems ḅara anịị anị sághị ḅo nyẹ. A sịbịpị pa Tamuno túminị́ mamgba sịarị nnị gálágálámáapụ tuminikiri gbọrụ.

Minini Na Níminyẹ

² Ḅẹ́ anị o bieḅẹlẹma, tọ́rụ́kịrịkị́rị́ daádighi ọmịna asọ mgbẹsẹ sa.

³ Ọmịna míníni ine mị daádighi ma sọ́ḅa sa ọ nimim ḅẹ́ ọmịnị ngịrịma nyánámam.

⁴ Ọmịnị árị ḅẹ́ ọmịna ngịrịma ọ dighi mú kunema lam, si, nyẹ gonyẹ́ gonyẹ́ ḅụ ọ́ káarábẹḅara, ibima sẹ, pịghị gbẹ́rẹ́nyẹ sọ bibịẹgha ḅara.

⁵ Kụ́ma ḅọ́rọ́ ọmịna bie opu níminyẹ nyánághaḅọ imii, n ḅo Tamuno tẹ́ghẹ̄, ori ibima biiapụ mamgba pịrịbẹm nyẹ́kọ́magha pa.

⁶ Kụ́ma i tẹ́ghẹ̄ bẹ sa mịnị mmẹẹ́ tẹ́mẹ́ nyánáma. Mmẹẹ́ tẹ́mẹ́ nyánáarị ḅọ gonyẹ́ gonyẹ́ tọ́rụ́bie fịnị dinọngụ anị n ḅo kịkanyẹ, mingi dighi pịghị fọ́rụ́ ofuro ma ḅọ́rọ́arị nyẹ.

⁷ Anị tumḅọ ma n ḅọ sị ma ḅẹ́ n ḅọ gbẹ́rẹ́nyẹ sọ nyánáḅobẹm Kị́nị́nyánáḅọ ḅara.

⁸ Tẹ́mẹ́ mmẹẹ́ mmẹẹ́ mịẹarịḅọ ọrẹ asọ sọ gbụ́nụ́nụ́gha.

Simini Na Ngọ Na

⁹ O kúru a dugho ọ pịrị Krais asọ duaarị siminiapụ bieḅẹ́lẹ́bẹm, Tamuno n dighi sóghóloma sa.

¹⁰ Ngọ nyáná Krais duaarịapụ so bieḅẹlẹ naibim Tamuno n sitéréma sa. Ngọ nyánáapụ ma sọ ḅọ́rọ́ sọ́bẹm piri ngóngó ḅara.

¹¹ Ịrụa ma saghị sị anị ọfịrị pa dipinyẹ ma dọ́ghụ́maarị ḅara, anị ngóngó sóghóro koroarị, anị ibii sọ mịnị tọ́rụ́sọgha. Anị gbẹ́rẹ́ ḅara ma anị ngọ nyánáapụ ma sọ gulugulubeḅara, nnị ikelekelé nna éné bie fịrị nwángịarị sa.

Daádighi

¹² Daádighi ḅụ kụrọ sẹapụ, bieḅẹlẹ nna nyẹ sọọbẹm. Ọ daádighi ma sáḅá kórómaẹrẹ nḅọ Tamuno míníni ọ ḅẹlẹmaapụ ma pịrị duma nyánábẹm.

¹³ Wa ḅọ́rọ́ ọkọ fịnị daádighi bie sọ sọ wa dughobịgha ḅẹ́, <>. Tamuno siinyẹ pa ọrẹ a túminị́ daádighibịgha ori sọ pịghị kị́nị́ daádighi daádighigha.

¹⁴ Kụ́ma wa daádighi ḅụ sọarị, wamịnị ojumẹnị wa nụ́nụ́ sị pa ofori ofori pughotarịarị siinyẹ ḅụ suamaẹrẹ.

¹⁵ Anịsáa wa pughotarịarị siinyẹ ma fura sa anị sii yiim; sii ḅo sẹ́nị sa, anị fịị dighiḅọ ḅom.

¹⁶ Ị́yẹ́ ibi mịnaapụ ọ minima nnị oḅori pa ọ sịị.

¹⁷ Tamuno pịrịnyẹ gonyẹ́ gonyẹ́ ibim pịghị kpainm, sobie saghị ḅo nyẹ gonyẹ́ gonyẹ́ anị ibim pịghị kpainm Tamuno ḅara anịị anị saghị ḅoarị nyẹ.

¹⁸ Ọ tọ ḅara ḅụ ọ duma pa wa pịrịm, ori karakárá ẹ́gẹ́rẹ́ ḅụ ḅọ́rọ́ sị wa tarị kiri nyánábeḅara ọ tẹ́mẹ́nyẹ mamgba ḅụ.

Tamuno Ẹ́gẹ́rẹ́ Ma Náa Pịghị Anị Mịẹarị

¹⁹ Ọ mịma pa biekóróma ị́yẹ́ ibi mịnaapụ! Ibim ḅẹ́ kị́nị́mamgba álála nyẹ náa, kụ́ma álála ẹ́gẹ́rẹ́gha, pịghị álála bieoḅugha.

²⁰ Bieoḅu, Tamuno karakárá ibiamịẹnyẹ pághámaḅoḅogha.

²¹ Anịgo ọmịnị ọ ḅụ sighima ịlọ́lị duma na siiamịẹnyẹ gonyẹ́ gonyẹ́ ḅụ. Ọmịnị ọmịna ḅụ pa Tamuno bie suu, sị ọ pa ọmịna tẹ́mẹ́bie sua ẹ́gẹ́rẹ́ ma daakị, anịma anịị ine dụaḅọ́rọ́ma pa ọ pịrịbẹnyẹ.

²² Ọmịnị oḅori pa ọ ḅụ suama ḅẹ́, ọmịnị ọrẹ ẹ́gẹ́rẹ́ ma naábẹm, kụ́ma ọmịnị anị pa fịrị ḅụ suabịgha.

²³ Ọ ḅọ́rọ́ ẹ́gẹ́rẹ́ ma naam, kụ́ma anị pa fịrị ḅụ suaghaa, ọ kịkanyẹ ọ tẹ́mẹ́ dighinyẹ bie amịna ḅụ árị anị fịnị ḅara.

²⁴ Nnị ibiḅara pa nna ḅụ arịm, kụ́ma n tẹ́mẹ́ dighinyẹ ma wáriso gbẹ́rẹ́kiri n warị pa bieḅárámá n fịnị ḅara.

²⁵ Kụ́ma ḅọ́rọ́ ị kikiama túminị́ fiimaarị ólóghó ma dighi sị pịghị sa ngúma anị pịrị, ḅẹgha ḅẹ́ ị anị pughu fama sị warị pa bieḅárámá, kụ́ma anị pa fịrị ḅụ sua, Tamuno ị bomabẹm ị mịẹnyẹ gonyẹ́ gonyẹ́ ḅụ.

²⁶ Ọmịna bie sịḅọ imi ḅẹ́ nḅọ Tamuno nimim, kụ́ma ine nḅọ ḅẹ́lẹ̄ ọlọgha, anị tumḅọ ma Tamuno nimi ọ́ papanyẹ, n ḅo oḅori pa n ḅo ḅụ siim.

²⁷ Tamuno Daḅọ árị sị kpain pịghị karakárá Tamuno nimi, ọ́ nyingi na daa ófórigha awọ ma tákubiri, na pịghị dee oforighaapụ ma nna tọ́rụ́siarị ḅụ, pịghị minigha sị tuminikiri ma n ḅọ sima.