Hiburuapụ 9 - Ibani New Testament

Susi Tuminikiri Tamunowarị

¹ Parị ọḅọọ ma susi ólóghó nyanam anị pighi susi yọ nyanam tuminikiri.

² Nnị Tamunowarị namam tórúku anga ma ḅụ anịị Tọ́ntọ́ Yọ pa sị ngaa. Parị bie ma anịị tọndọ gbananyẹ ma fịnị angaá na pịghị n pa agbā mịẹ Tamuno pịrị fịtúrú gbánā ịkasị sọ fịnị ngaa.

³ Mmẹẹ́ kárámá sị n pa Tamunowarị ma ḅụ́pọ́ gbẹ́ẹ̄ bịtẹ ma ọḅụju gbẹ́rẹ́ bie imi anị n pa Opu Tọ́ntọ́ḅa Yọ sị ngaa.

⁴ Anị bie anịị nnị odoḅala pa nama ẹdẹ ọgọ́nọ́ n pa insẹnsị dọghụma dọghụma nyẹ na pịghị ọḅọọ igbe, nyẹ gonyẹ́ gonyẹ́ n pịghị odoḅala pa gbẹm anị bie manna ma bie fịnị odoḅala ọmọngọ imi. Erọn agbara ányị́nyá suamaa nyẹ na pịghị mmẹẹ́ dapịrị nnị ólóghó ma gịẹ kórómanyẹ anị ọgọnọ.

⁵ Igbe ma ọgọ́nọ́ anị pamba sua sị n tẹ́mẹ́nyẹ ma anị diearị ḅẹ́ Tamuno anị ngaa imi mịná tẹ́mẹ́nyẹ ma nna pamba findi sara n siiḅụḅárasi pịrị angaá ma ḅụ wárim, kụ́ma, mị́sa anị tumḅọ nyẹ gonyẹ́ gonyẹ́ dughofindi bẹ sagha.

⁶ Mịị ḅara ma anịị n nyẹ gonyẹ́ gonyẹ́ dẹghẹ warị ḅara, igwagwaapụ ma tórúku bie ma sọmu sọmum Tamunowarị ma bie éné gonyẹ́ gonyẹ́ ḅụ si mú nna fịrị nwángịị.

⁷ Opu Igwagwaaḅọ ma ngéré anị biebẹ ju fịnị yọ ma sọ sọ ḅọ, o mịma mịẹarị gbẹ́rẹ́ sáá ngéré kụ́rá bie. Ori (ọmbịnyẹ́) ákịkịm ọ pa igwagwaá Tamuno pịrị ọ sịbị ọgọ́nọ́ na pịghị túminị́ ma nimigha si n mịẹ siiamịẹnyẹ.

⁸ Mịnga nnị dẹẹ kórómanyẹ mamgba ḅụ Tọ́ntọ́ Tẹ́mẹ́ ma ibima diearị ḅẹ́, Opu Tọ́ntọ́ḅa Yọ ma asọ na findigha, parị tọ́ntọ́ wárị ma pa sẹ́fịnịarị sa.

⁹ Mịma anị ḅara tughuma mị́sa ma pịrịarị ilíghíma, anị dughoarị ḅẹ́ n mịẹ Tamuno pịrị agbā na nama igwa n gwanyẹ ine tẹ́ghẹ̄arị tẹ́mẹ́bie mịẹ kpainmagha.

¹⁰ Mịná mịẹmịẹnyẹ ma fị́nyẹ na iru na pịghị tọ́rụ́kịrịkị́rị́ oju sịrị nyẹ ngéré gbólómam, mịnanyẹ mamgba anịị ojumẹnị ólóghó, anị kụrọ nyánam ákị mú Tamuno ḅo ịwọ nyẹ akuoo bẹ sa la.

Krais Anịị Kpain Igwaa Ma

¹¹ Krais Opu Igwagwaḅọ ḅara ḅụ ḅoo mị́sa wamịnị árịarị ibinyẹ ma pịrịmam, ọ fịnị fịrịnwangịarị Tọ́ntọ́ warị ma ibiḅaa, pịghị kpainm. Túminị́ ḅara pa nama warịịgha anị dughoarị ḅẹẹ anị mịị tuminikiri ḅụ gbẹ́rẹ́ nyẹ́gha, Tamuno tẹ́mẹ́nyẹ.

¹² Krais Tamunowarị ma bie ḅọ́rọ́ sáá, gbẹ́rẹ́ sáá ngéré anị ọ pa Opu Tọ́ntọ́ḅa Yọ ma so nyẹ ori oḅori na nambulo pulo pa mugha sị mú igwagwaá kụ́ma ọrẹ pulo anịị ọ pa mú sị gbámásó dụaḅọ́rọ́ma nyáná ḅo wa pịrịnyẹ.

¹³ Oḅori pulo na nambulo pulo na pịghị n dọ́ghụ́ma nambulo tụ́wọ fọọ anị n pa túminị́ ma sánị si, ọgọnọ n mịẹ siiamịẹnyẹ ma sịrịsii.

¹⁴ Mịma karakárányẹ sáá, Krais pulo mịma nẹ́ngịma nyẹ́ mịẹbịgha? Ori gbámásó Tẹ́mẹ́ ma ḅụ ḅọ́rọ́ ọrẹ oju pa kpain agbā mịẹ Tamuno pịrịm. Ọrẹ pulo wa sịrịbẹm ofori ofori mịẹmịẹnyẹ, ḅụ sị wamịnị ine dumafịnị Tamuno ma tẹ́ghẹ̄ bẹ ḅara.

¹⁵ Krais anị ịwọ ọḅọọ ma ḅara saghị ḅoḅọ, sị Tamuno simaapụ ine o minini gbámásó boma ma nyáná bẹ ḅara. Mịma ine kiriakịbẹm ọ fịịmam go, sị siiamịẹnyẹapụ ḅọ́rọ́ma nna siiamịẹnyẹ ḅụ, parị ọḅọọ ma sọ pa imi sa.

¹⁶ Tumḅọ ábálálá gịẹ sa n ḅara warị ori ngọ die bẹ ḅara, anị karakáram n die ḅẹ́ ngọ ma nyánáḅọ ma fịịmam tẹrẹmẹ nnị ori ngọ die.

¹⁷ Tumḅọ diri bie gịẹ kóróma ma ḅara nnị ori ngọ die bẹ ḅara ḅẹnyẹ ḅẹnyẹ ḅụ ofori, anị gịẹḅọ ma pa dumafịnị sa, anị ḅo kiri ákịbẹm diri ma gịẹḅọ ma fịịmaá sa.

¹⁸ Anịị parị ọḅọọ ma go kụ́rọ nyánányẹ anị ọmbịnyẹ́ ngéré pa fịrịwangịm gosi.

¹⁹ Mosis parị goo págháma túminị́ ma pịrịm ólóghó mamgba anị fịnị ḅara ólóghó diri ma bie. Anịsáa ọ warị nambulo tụ́wọ pulo na oḅori pulo akị sị mingi pa anị na gwaa na hesop sị ḅara na áwụ bia ánáná osuka pa su su sị pa ólóghó diri ma na anị angaá fịnị túminị́ ma sánị.

²⁰ Mịma anịị ọmbịnyẹ́ ma ọḅọọ ma, Tamuno tọ́ọ ọ pịrịnyẹ ḅẹ́ o kókó.

²¹ Anị gbẹ́rẹ́ ḅara ma Mosis ọmbịnyẹ́ ma sanim tọ́ntọ́ Tamunowarị ma ḅụ, na pịghị n pa fịrịwangịarị nyẹ mamgba ḅụ.

²² Karakáráma, ólóghó ma dua, nyẹ gonyẹ́ gonyẹ́ ọmbịnyẹ́ anị n pa anị siri fịafịamarịnyẹ, nnị ọmbịnyẹ́ osugha osugha tumḅọ ine siiḅụḅarasi nyánábịgha.

²³ Mịnanyẹ ma, sobie fịnị karakárá nyẹ́ ma kịkanyẹ ma, ibibẹm ḅẹẹ nnị ọkọfịnị anị gbẹ́rẹ́ ḅara ma igwaa pa anị mịẹ fiafiama, kụ́ma sobie nyẹ ma ibiḅaa igwaa bim.

²⁴ Krais o tumḅọ ḅara pa nama Tọ́ntọ́ yọ sọgha, mị anị karakárányẹ ma kịkányẹ, kụ́ma o so sobie múm si mú Tamuno tórúku fịnị wámịna sịbị go.

²⁵ Juuapụ opu igwagwaalaḅọ ma Opu Tọ́ntọ́ḅa Yọ ma sọsọm kụ́rá gonyẹ́ gonyẹ́ ḅụ ọmbịnyẹ́ nama pa. Kụ́ma Krais ori aningáa ma sọgha sámámgba sị ọḅụ pa igwagwaá.

²⁶ Anị ḅọ́rọ́ ọkọ ọkụ́ma, ọ tọgha tọgha igwa gwamam saghị tuminikiri saghị sa éné éné. Tụ́ma, mị́sa, anịsa mamgba kunema ḅụ, o ḅomam sị gbẹ́rẹ́ sáá, samamgba sii sịrị si, ori ọrẹ oju pa igwagwaá sii pịrị ḅara.

²⁷ N tọ́ọ wárịmam ḅẹẹ ọ́rụ́ḅọ ọ́rụ́ḅọ gbẹ́rẹ́sa pa fị́ị́bẹm, anịsa ma ḅọ́rọ́maẹrẹ, nḅọ Tamuno ḅẹ́rẹ́kọ siri daa.

²⁸ Anị gbẹ́rẹ́ ḅara ma n Krais pa igwa gwam gbẹ́rẹ́ sáá sị ọ tọgha tọghaapụ sii sịrị si. O pịghịma ḅobẹm mmẹẹ́ kárámá sa, sii gosigha, kụ́ma ori o kúruarịapụ ma dụaḅọ́rọ́ma bẹ ḅara.