Hiburuapụ 8 - Ibani New Testament

Ịwọ Óḅọọ Ma Opu Igwagwaaḅọ

¹ Wa dughoarị nyẹ́mámgba ḅẹarị ḅẹẹ wa ọkọfịnị igwagwaalaḅọ nyánam Opu Tamuno opu imine ma ámáḅara ḅụ kpọrọfịnị ḅo sobie.

² Ori Opu Igwagwaḅọ fịrị nwángịarị tọ́ntọ́ḅa yọ ma ḅụ, anịị tụ́ma tọ́ntọ́ Tamunowarị, Tamuno ọ ḅara na nama nyẹ, túminị́ ḅara pa nama nyẹ́gha.

³ Opu Igwagwaaḅọ gonyẹ́ gonyẹ́ n tọ nḅọ pịrịm ḅẹẹ ori agbā mịẹ pịghị nama pa igwagwaá Tamuno pịrị. Wámịna opu igwagwaaḅọ ma anị ḅụ́gbẹm si ori sọ nyáná o pa pịrịbẹnyẹ.

⁴ Ọ ḅọ́rọ́ tuminikiri imi, ori igwagwaḅọ fịrị nwángịbịgha, igwagwaapụ imi sa, Juuapụ ólóghó tọghaapụ ḅẹẹ nnị mị agbā ma mịẹ.

⁵ Nnị nwángịarị fịrị agbamieapụ ḅara, anị dada sobie fịnịnyẹ ma fịnị ḅara fịnịgha kụ́ma anị anịị kịkam. Anị n go Mosis birinụ́nụ́nyẹ ọ tọ́ntọ́ tẹ́ghẹ̄ wárị ma nama dọghụ sáá ḅẹ́ ori, <>

⁶ Kụ́ma mị́sa nnị igwagwaḅọ fịrị pa Jizọs pịrịmam, nna angaá nyẹ ma nẹ́ngị nyẹ, anị gbẹ́rẹ́ ḅara ma Jizọs sua gboloma ọḅọọ ma Tamuno na ori a túminị́ ogboku ibiḅam tegó nnị ibiḅaa mini nyẹ ḅụ anị wárim.

⁷ Ḅọ́rọ́ parị ọḅọọ ma ḅẹnyẹ ḅẹnyẹ anị laagha gbẹ́rẹ́ḅọ sọ mmẹẹ́ kárámá ọḅọọ ma dọghụbịgha.

⁸ Kụ́ma Tamuno irima nyẹ dọghụ pághámaḅom ọrẹ a túminị́ ḅụ, ọ ḅẹ́ sa ḅẹ́, <<Éné ma ḅoarị Tamuno dugho ḅara, a ịwọ ọḅọọ gịẹ bẹnyẹ irị na Izirẹlịawọ na pịghị Juda awọ.

⁹ Anịị a nnị na tádọ́apụ na gịẹ ọḅọọ fịnị ḅara fịnịbịgha. A ḅara ḅụ n saghị pághámaḅo sa Ijipiti bie, nnị sẹ́ kụ́rọ a nnị ná fị ọḅọọ ma pịrịgha, anị ẹrẹ́sị irịsọ a tọ́rụ waghisim n fịnị angaá.

¹⁰ Kị́nị́nyánáḅọ ḅẹ́m ḅẹẹ mị́sa mị anị a Izirẹlịawọ na fị bẹ ọḅọọ, ḅoarị sáá, a ị́yẹ́ ólóghó pa nna kúkúbie suabẹm. A pịghị nna tẹ́mẹ́bie ḅụ gịẹ kórómabẹm. Ịrị nna Tamuno sọ́bẹm nnị pịghị ịyẹa túminị́ sọ́bẹm.

¹¹ Gbẹ́rẹ́ḅọ sọ amịna mịnaḅọ diebịgha, anịgha dugho n ḅo na kikiama angaá ḅo pịrị, Nnị Kị́nị́mamgba i nimibẹm, nna ḅụ ịrụḅa ḅo akị mú dụḅaḅá ḅo láa.

¹² A nna sii ḅụ ḅara sị n pịrịbẹm, a pịghị mịnị nna mịẹ irima pa biekórómabịgha.>>

¹³ Ori ịwọ ọḅọọ ḅẹ́rẹ́ dughoarị sa, Tamuno parị ọḅọọ ma mịẹmam anị olom sị pịghị olom nyẹ gonyẹ́ gonyẹ́ ḅọlọgha sa ḅụ pịghị ẹmẹ fabẹm.