Hiburuapụ 7 - Ibani New Testament

Melkịzedek Igwagwaḅọ Ma

¹ Mịị Melkịzedek ma ori anịị Salem ámányánáḅọ pịghị opuma sóghólóḅa Tamuno igwagwaḅọ. Ebraham ọ́mụ́gbi ḅụ saghị sọḅoarị, anịị ori ínia ámányánáapụ sọ́ḅá sa, Melkịzedek ọ nana donam warị ọ karịibima.

² Ebraham warị ori akuonyẹ mamgba pa oyia angaá die si gbẹ́rẹ́kiri pa ọ pịrịị. Ẹ́rẹ́ ma, Melkịzedek parị ḅẹarị <> Ori salem Ámányánáḅọ ẹrẹ́sị, ẹ́rẹ́ ma pịghị ḅẹarị <>.

³ Melkịzedek ma ọ daa na o nyingi nimiḅọ ofori, anịgha ọrẹ tádọ́apụ, nnị o yii sa, anịgha ọ fịị sa nimiḅọ ofori o Tamuno Tụ́wọ kịkam, ori gbámásó igwagwaḅọ.

⁴ Ị́yẹ́ arịgha ọduḅa la ḅara? Ebraham sọ wa ibima nimi tádọ́ ḅo ọ́mụ́ bie ọ nyánáḅonyẹ mamgba ọ pa oyia kiri diem sị gbẹ́rẹ́kiri pa ọ pịrịm.

⁵ Ólóghó diri ma dughom ḅẹ́ Livai fúroawọ, nna ḅụ igwagwaapụ n gbẹ́rẹ́ angaá daakị oyia kiri ma ḅụ nna mịnaapụ Izirẹlịawọ ḅara, nnị sọ Ebraham fúroawọ mḅẹ́sọ.

⁶ Anị fịnị ḅara Melkịzedek, Livai furoḅọgha, kụ́ma oyia kiri ma ḅụ ọ gbẹ́rẹ́kiri daákịm Ebraham ḅárabie sị Ebraham karịibima, ori ma anịị Tamuno minini pịrịnyẹ ma nyáná ḅoḅọ

⁷ Kị́nị́ bomaarịḅọ dụḅaḅá boma ma daakịarịḅọ nẹngịm, mịma nụ́nányẹ anị bie ofori.

⁸ Igwagwaapụ ma gbolomanyẹ, oyia ngaa ḅụ gbẹ́rẹ́kiri daakịarịapụ ma anịị fịị bẹ túminị́, kụ́ma ori Melkịzedek oyia ngaa ḅụ gbẹ́rẹ́kiri daákịḅọ ma ọ́ dumafịnịbo tọ́ndiri ma dugho ḅara.

⁹ Tumḅọ ine dughobẹm ḅẹ́ Livai mị́sa oyia kiri ḅụ gbẹ́rẹ́kiri daakịarịḅọ ma túminị́ ḅara, oyia kiri gbẹ́rẹ́ ngá gbẹm Ebraham ḅụ ḅọ́rọ́,

¹⁰ tegó Melkịzedek Ebraham na dona sa, Livai pa ori tádóḅọ Ebraham ḅụbie imi.

Jizọs Melkịzedek Fịnị Ḅara Fịnị Igwagwaḅọ

¹¹ Livai furoawọ Igwagwaá fịrị ma ḅụ ḅọ́rọ́ anị Tamuno go mị ólóghó ma pa Izirẹlịawọ pịrịnyẹ. Ḅọ́rọ́ Livai fúroawọ igwagwaá fịrị ma kpain ọkụ́ma, jẹ́ kịrị igwagwaḅọ ḅo na ibighaa Melkịzedek fịnị ḅara fịnịḅọ mịnị Erọn fịnị ḅara fịnị ḅọgha Livai furobie saghị ḅoḅọ.

¹² Nnị igwagwaapụ ḅụọ ma dima sa, n pịghị ólóghó ma dima naibim.

¹³ Wányánáḅọ n go mịnanyẹ ma dughoarịḅo. Ori jẹ́ túminị́ ọrụ ḅụ saghị ḅoḅọ gbẹ́rẹ́ḅọ so náa igwagwaḅọ soghaa ori túminị́ ọrụ ḅụ.

¹⁴ Kị́nị́mamgba nimim ḅẹ́ o Juda fúroawọ ḅụ saghịḅom. Mosis ori igwagwaapụ ḅẹ́rẹ́ dughoarị sáá o dughogha ḅẹ́ igwagwaḅọ mị fúro ma ḅụ saghị ḅobẹm.

¹⁵ Baá mị́sa ḅẹ́rẹ́ ma ḅụ sọmam ḅẹẹ, kịrị igwagwaḅọ ọ ḅụ diepághámamam Melkịzedek fịnị ḅara fịnịḅọ.

¹⁶ Nnị igwagwaḅọ pa ọ mịẹm, mị igwagwaá ma anị túminị́ ólóghó na túminị́ nyẹ mịẹmịẹ ḅara duagha, kụ́ma anị kunema nyanagha duma ịnyọ ḅụ saghịḅom.

¹⁷ Tọ́ndiri ma dughom ḅẹẹ, <<Ị gbámásó igwagwaḅọ sọ́bẹm, Melkịzedek fịnị ḅara fịnịḅọ.>>

¹⁸ Olom ólóghó ma n sumaa ngása wárim tegó anị ịnyọ nyanagha pịghị nyẹ́ḅụoforị.

¹⁹ Mosis ólóghó ma bẹnyẹ bẹnyẹ mịẹ kpainmagha. Kụ́ma mị́sa, ibiḅaa tọ́rụ́ dighinyẹ imi wa ḅọ́rọ́ ine sọma Tamuno damaḅo bẹnyẹ.

²⁰ Jẹ́nyẹ, Tamuno ọḅọọ fịịm, kụ́ma ọkọfịnị ọḅọọ ofori nnị isiapụ pa igwagwaapụ mịẹ sa.

²¹ Kụ́ma, Jizọs igwagwaá ma, anị ọ ḅoo na ḅom, Tamuno ọ ḅẹẹ sa ḅẹẹ, < >>

²² Mị ọḅọọ ma gosi, Jizọs ori ọḅụsẹ́ḅọ sọ ibiḅaa ọ́ḅọọ ma pịrịmam.

²³ Jẹ́ kịrịnyẹ pịghị imi, isi igwagwaapụ ma n fịịm go, n mịnị ine fịrịnwangịgha.

²⁴ Kụ́ma Jizọs duma gbámásom ọrẹ igwagwaá fịrị ma pịghị ḅọ́rọ́ mú jụghọ sịbị gbánāgha.

²⁵ Anịma go ori ine mị́sa pịghị sámámgba ọḅụ ḅọ́rọ́ Tamuno damaḅoapụ ma duaḅọ́rọ́mam o duma gbámásom gosi Tamuno tẹ́ghẹ̄m nna sịbị ọ́gọ́nọ.

²⁶ Jizọs Krais anị wa bii igwagwaalaḅọ, ọ tọ́ntọ́m; sii ọ ḅụ ofori, nnị o fófóomam siiamịẹnyẹapụ bie pịghị ọ saghị sóghólóma so ma nẹ́ngị.

²⁷ Ori isi opu igwagwaapụ ma kịkagha, éné gonyẹ́ gonyẹ́ ḅụ ọ parị igwagwaá ọri sii pịrịbịgha, sị pịghị igwagwaá túminị́ ma pịrị, ọ gbẹ́rẹ́ igwagwaá sámámgba pịrịm ori ọrẹ ojumẹnị pa pịrị sa.

²⁸ Mosis ólóghó itilaapụ tọọm ḅẹẹ nnị igwagwaalaapụ sọọ, kụ́ma Tamuno mini nyẹ ori ọḅọọ ma na ḅoo nyẹ, ólóghó ma ọḅụju, o Tụ́wọ ma tọọm, n mịẹ kpainma ḅo ákị mú gbámásó láa.