Hiburuapụ 5 - Ibani New Testament

¹ Igwagwaá áláḅọ gonyẹ́ gonyẹ́ Tamuno n ḅọ sẹ́lẹ́akịm ọ jẹa túminị́ ogbo ḅẹẹ o fịrịwangi Tamuno pịrị nna sịbị, sị ori agba mịẹ pịghị igwagwaá sii pịrị.

² Ori, ori itilam gosi ọ tọ́rụ́kụrụkụ́rụ́ nyána níminyẹ nyánágháapụ na pịghị siinyẹ mịẹarịapụ pịrịm.

³ Ori ma so itila ḅara, ma, ori igwa gwaabẹm, túminị́ ma sii ngéréghaa kụ́ma ori igwagwaá ọrẹ a sii sọ pịrịbẹm.

⁴ Gbẹ́rẹ́ḅọ sọ ine mịị kuu pa amịna ḅụ pịrịbịgha, kụ́ma Tamuno ọ ḅara na sị ḅo, ori Erọn sị ḅara.

⁵ Anị gbẹ́rẹ́ ḅara ma, Krais ori igwagwaá áláḅọ kuu ma pa ọ ḅụ pịrịgha kụ́ma Tamuno anị ọ ḅẹnyẹ ḅẹ, <<Ịrị anị i Tụwọ, mịmgba a Daa sọ ị pịrịmam.>>

⁶ Ọ pịghị dughom jẹ́ angaá ḅẹ́, <<Ị́ igwagwaá áláḅọ fịrị ma nwángị gbámásóbẹm Melkịzedek ḅụọ duaarị.>>

⁷ Jizọs mị tuminikiri fịnị sáá ọ kụ́rọ owu pụghọ pa ọrẹ tẹ́ghẹ̄ na obiarị nyẹ bim, ine o dụapághámaḅo bẹḅọ fịị ḅarabie, ori ọḅụ siteremam gosi Tamuno sughubie Tamuno o naam.

⁸ Ori Tamuno Tụwọ n ḅẹ́sọ ọ tọ́rụ́siarị ḅụ ḅọ́rọ́ bịpị osiḅara nimim.

⁹ Nnị o mịẹ kpainma sa, ọ warị anị ḅụ ḅọ́rọ́ gbámásó dụaḅọ́rọ́ma pa ọ dughonyẹ mịẹapụ gonyẹ́ gonyẹ́ pịrị.

¹⁰ Tamuno igwagwaá áláḅọ pa osim, Melkịzedek ḅụọ ḅara.

Minini Ma Ḅụ Bịghị́koro Birinụnụ

¹¹ Wamịnị opuma dughonyẹ nyánábẹm, mịnyẹ ma gbólómanyẹ, kụ́ma anị ḅụdam dughofindi ọ pịrị ọmịna akanyaḅo gbulum gosi.

¹² Mị́sa ma ḅụ ọ nyẹ́dieapụ sọ naibim, kụ́ma ọ pa dọghụarị n pa parị parị Tamuno ẹ́gẹ́rẹ́ ma dawọ nyẹ́ pa o die, ọ kụ́rọ fị́nyẹ fị na ibi sa, ọfịgha, kụ́ma ndomingi anị obiarị nyẹ.

¹³ Ndomingi ḅụarị ḅo gonyẹ́ gonyẹ́ nḅọ pa kálátụwọ, nḅọ akanyaḅo nyanagha Tamuno karakárá ibiamịẹnyẹ gboloma dáwọnyẹ ḅụ.

¹⁴ Tụ́ma mbgọlụ fị́nyẹ fịnị sẹ́nịapụ pịrịm, nnị sámámgba anị fịarị sa, nnị ine ibinyẹ na siinyẹ na nimim.