Hiburuapụ 13 - Ibani New Testament

Kunema Againma

¹ Ọ jụghọ jụghọ ḅẹlẹma bịpịmú Krais asọ duaarịapụ ḅara.

² O biekóróma igoniapụ daasu ọmịna wárịbie. Jẹ́apụ imi ọkọ mịẹapụ warị anị ḅụ ḅọ́rọ́ sookumuapụ daa wárị su nimigha pa.

³ Ikólibie fịnịapụ pa biekóróma, sọ́ḅọ́rọ́ ọmịnị na nnị na ikólibie ma ḅụ imii, ọ tọ́rụ́siarịarịapụ ma pa biekóróma sọ́ḅọ́rọ́ ọmịnị na nnị na tọ́rụ́siarị ma árịarị.

⁴ Ẹ́rẹ́yáa anị kị́nị́mamgba opu osigha pa pịrị na ibinyẹ, deeapụ na taapụ na jụghọ jụghọ ḅụ minini na ibim, Tamuno ḅẹ́rẹ́kọbẹm ama dọghụapụ ma sịbị na pịghị yáakuu ḅụ ofori nwángị kọ́arịapụ ma sịbị.

⁵ Ọ mịnị ọmịna duma fófóoma igbii ḅẹlẹma ḅụ, ọnyana nyẹ ọ tọ́rụ́ bi, Tamuno kọkọ ḅẹ́, <>

6 Wamịnị anịsa kụrọ tọ́rụ́ nyáná sị dughobẹm, <>

⁷ Ọmịnị ọmịna ḅọ́rọ́maa sịḅidaapụ pa biekóróma, Tamuno ẹ́gẹ́rẹ́ ma kọọ ọ pịrịapụ, okórómaḅo, n ḅárá warị duma kọ ḅara na pịghị n fịị ḅara sị nna minini daa nyẹ mịẹ.

⁸ Jizọs Krais anị biaéné ḅọ ma mịmgba éné ḅọ pịghị mú ḅẹsá ḅẹsá la.

⁹ O minima tọ́rụ́kịrịkị́rị́ dienyẹ ọ daa irima karakárá asọ ma ḅụ. Anị ibim ḅẹẹ tumḅọ biebẹ ịnyọ nyáná ḅo Tamuno tọ́rụ́kụrụkụ́rụ́ ḅụ, mịnị saghị fị́nyẹ ólóghó kokogha, ọmịna bie mị ólóghó ma kokoapụ, mị ólóghó ma so ḅárásua n pịrịgha.

¹⁰ Igwagwaapụ ma Tamuno wárị ma bie fịrịnwangịarị ḅo ma kụrọ nyanagha sị ẹ́bẹ ma ọgọ́nọ́ fịnị gbẹ́rẹ́nyẹ sọ fịị.

¹¹ Juuapụ Opu Igwagwaḅọ ma nama pulo ma akuoo opu tọ́ntọ́ yọ ma ḅo si, anị pa igwagwaá sii pịrị, kụ́ma nama ma ojumẹnị ma nụ́ngọbie nnị anị dọghụmam.

¹² Mịma go, Jizọs sọ ama bie fịịgha, ori ine ori ọmbịnyẹ́ pa n sịrị si bẹ ḅara nna sii ḅụ.

¹³ Anịgo, wamịnị o dama mú nụ́ngọbie ma ḅụ sị ọ́ nana ḅụ́gịrịrị ma daa.

¹⁴ Bẹ mị tuminikiri wa fịnị gbámásó bẹ ama ofori, wa tọ́rụ́ pa ḅoarị ámá ma dighiarị.

¹⁵ Anịgo wa sámámgba túminí igwagwaá pa Tamuno pịrị Jizọs ẹrẹ ḅụ. Mịma anịị wa dugho págháma igwaa ḅẹẹ Jizọs anịị Kị́nị́nyánáḅọ.

¹⁶ O bieḅárámá ma ibi mịẹsị pịghị ḅárásua jụghọ jụghọ pịrị, tegó, mị Tamuno tẹ́mẹ́ ḅẹ́lẹ́maarị igwaa.

¹⁷ Ọmịnị ọmịna sịbịdaapụ osii, pịghị n dughonyẹ mịẹ. Nnị ọmịna tẹ́mẹ́ kúruarị ịnyọsáragha pa, n pịghị dugho Tamuno pịrịbẹ ḅara n ḅárá warị o didighi ḅara. Ọ ḅọ́rọ́ nnị osisii, n bieḅẹlẹ ḅara pa nna fịrị nwángịbẹm, anịgha n sitẹ́mẹ́ pa nna fịrị nwángịbẹm. Anịma sọ́nyẹ sọọ ọ pịrịbịgha.

¹⁸ Ọ pa tẹ́ghẹ̄ wa pịrị. Wa nimim ḅẹẹ wa fíafía tẹ́mẹ́ nyanam, wa pịghị karakárá nyẹ́ ma mịẹ dọghụm sámámgba.

¹⁹ A opuma ọ tẹ́ghẹ̄m ḅẹẹ, o tẹ́ghẹ̄ sị Tamuno ḅọlọgha sa ḅụ, i pa ọ fịrịma.

Gbẹ́ẹ̄ Tẹ́ghẹ̄

²⁰ Mị́sa diin nyáná Tamuno ma gbámásó ọmbịnyẹ́ ma ọḅọọ ḅụ ḅọ́rọ́, wámịna Nyánáḅọ Jizọs saghịma ḅo fịị ḅụ, opu ánánákúrúḅọ ma,

²¹ ibi gonyẹ́ gonyẹ́ ḅụ ḅárásua ọ pịrị, ọmịnị o binyẹ mịẹarị sáá ọ pịghị wámịna duma bie o tẹ́mẹ́ ḅẹlẹma nyẹ mịẹ Jizọs Krais ḅụ ḅọ́rọ́, Boma fịnị pịrịḅọ akị mú ḅẹ́ sa láa. Anị ọkọ fịnịị.

²² A ọ tẹ́ghẹ̄m ị́yẹ́ mịnaapụ ḅẹ́ ọmịnị ingịrịma nyáná a gịẹḅọ ọ pịrị tẹ́mẹ́kụ́rọma ábálálá ma pịrị. Mị́sa a gịẹ ábálálá ma opuma nángwọgha.

²³ A dọ́ghụm o nimi wámịna numboru owitụ́wọ Timoti, ori ikólibie págháḅomam ori álála ḅo ḅo, a ọ nana ḅobẹm sị ọmịnị ori arịị.

²⁴ Ọmịnị ọmịna sịbịdaapụ bii wa piri, na pịghị Tamuno túminị́ mamgba, Ịtalị ḅụ fịnị mininiapụ oku fịrịmam ḅẹ́ nnị obii.

²⁵ Tamuno tọ́rụ́kụrụkụ́rụ́ ọmịnị mamgba na fịnị.