Hiburuapụ 12 - Ibani New Testament

Tamuno Ori Awọ Fomfom

¹ Wamịnị, wa mị tọgha túminị́ nyanam, wa gbiri ikelekelé si onyẹ́sẹ wa pịrịapụ, anịgo anị ibim ḅẹẹ wa pa ngása, warịị wa pụ́nụ́marịnyẹ gonyẹ́ gonyẹ́ na pịghị wa fángálámaarị sii ma, sị wa pịghị ingịrịma nyána si wámịnị ine kụ́rọ́ma si wámịna tórúku fịnị mangị ma mangịị.

² Wamịnị wámịna tọ́rụ́ pa Jizọs ḅụ gbánā, wámịna minini ḅára fịnịḅọ, saghị sị mú kunema la. Ori ọḅụ daagha mgbẹsẹ sị ma go, kụ́ma tórúku fịnị o kuruarị bieḅẹlẹ gosi, ori ingịrịma nyáná mgbẹsẹ sị ma pịrịm, ori mgbẹsẹ sị́ ọgọ́nọ́ fịị ma ḅụ́gịrịrị balagha. Mị́sa ọ Tamuno imine ma ámáḅara ngá kpọrọfịnịarị.

³ Ọ kóróma dighi siiamịẹnyẹapụ pa ọ nana ngaa si ḅara. Anịgo ọmịnị ma anị ịnyọ pa ọ ḅụ fama sị mịẹ ọmịnị ọḅụdaa.

⁴ O sii na soarị owu, na ọ pa pulo osu nyẹ laagha.

⁵ O bieḅárámá ma, Tamuno kọọ ọ pịrị tẹ́mẹ́ kụ́rọ́ma ẹ́gẹ́rẹ́ ori awọ ḅara ḅẹẹ, <

⁶ Tegó, Kị́nị́nyánáḅọ o ḅẹlẹma ḅọ gonyẹ́ gonyẹ́ datụ́ghụ́ma tụ́ghụ́mam pighi o pa tụ́wọ mịẹ ḅo gonyẹ́ gonyẹ́ fomfom.>>

⁷ O mịnị ingịrịma nyáná ọmịnị árịarị tọ́rụ́siarị ma pịrị, o nimi sa ḅẹẹ anị ọmịna daa ḅara ḅom. Ị́yẹ́ tọ́rụ́siarị diearị bẹ Tamuno awọ ḅara pa ọ́ nana ngam. Tẹ́ angaá tụ́wọ imi Daḅọ fomfomugha ḅo?

⁸ Nnị ḅọ́rọ́ awọ datụ́ghụ́ma ḅara pa o datụ́ghụ́maa nḅẹḅẹ́, anị duarị bẹ ọmịnị karakárá awọgha kụ́ma daa nyánágháapụ.

⁹ Wámịna tuminikiri daapụ, nnị wa daatụ́ghụ́mam wa pa nnị osim, wa tegó ine tẹ́mẹ́bie wa yii Daḅọ ma osiibịgha si duma!

¹⁰ Wámịna tuminikiri daapụ kálá sáá tụ́wọ ḅụ wa datụ́ghụ́mam anị nna tọ́rụ́ karakárá ḅara, kụ́ma Tamuno mịẹarị angaá nyẹ ma ọ́ wámịna ibi gosi. Wamịnị ine ọrẹ tọ́ntọ́ duma ḅụ diekiri nyáná bẹ ḅara.

¹¹ Datụ́ghụ́ma gonyẹ́ gonyẹ́ anị kálá sa tụọ ma ḅụ ḅẹ́lẹḅẹ́legha, kụ́ma anị akụkụm, kụ́ma anịma ḅụ ḅọ́rọ́maapụ, anịsáa ma ḅọ́rọ́maẹrẹ anị saghị diin karakárá ibiamịẹnyẹ pághámaḅoḅom.

¹² Ọmịnị ọmịna kọrịkọrị ḅara ma saghị si pịghị ịnyọ pa ịnyọfa ḅụ́ọ́sịbị ma pịrị.

¹³ Gbụ́nụ́nụ́ asọ nwángị si ikúlá ḅụọ ma ikúlá fịnịbịgha ḅara, tụ́ma anị gwọbẹ ḅara.

¹⁴ Ḅụ́kọ́rọ́ma diin pa kị́nị́mamgba na fịnị pịghị ḅụ́kọ́rọ́ma tọ́ntọ́ duma kọọ mịma ofori, gbẹ́rẹ́ḅọ sọ ine Kị́nị́nyánáḅọ arịbịgha.

¹⁵ Ọmịnị árị ḅẹẹ, ọ Tamuno tọ́rụ́kụrụkụ́rụ́ pa ọḅụgbigha. Gbẹ́rẹ́ḅọ sọ si lakpo nyánáma sị anị wáriso anị sẹnị ḅo opuma ḅẹ́rẹ́ dighi kị́nị́mamgba pịrị.

¹⁶ Gbẹ́rẹ́ḅọ so sẹ́fịma, anịgha Tamuno nimighaḅọ dighi Esọ o kiri dẹ́rịḅọ parị tụwọ ḅara gbẹ́rẹ́ fị́nyẹ bọlị gosi.

¹⁷ Ọ́ kọ́kọ́ nimi bẹ, anịsa ma ḅọ́rọ́ sa, ọ pịghị ḅo ọ daa karịibima dọghụ sa ọ mịnị anị nyánaḅogha, ori ine asọ arịgha parị ọ mịẹmáa nyẹ ma dima bẹ ḅara, karakárányẹ ḅẹ́ ori owu mingi ḅụ ḅọ́rọ́ anị dọ́ghụm.

¹⁸ Na o ḅo ọmịnị ine ḅara pa lama bẹnyẹ laagha, kụ́ma Izirẹlịawọ sinai tụ́ndụ́ ọgọnọ mú sa, opu ḅáláfa na kọrịfịnị na kánákáná na irisé pa dọghụarị nyẹ.

¹⁹ Furoarị ọdụ na pịghị ẹ́gẹ́rẹ́arị pụghọ, túminị́ ma pụghọ ma náa sáá, n tẹ́ghẹ̄m ḅẹ́ nnị mịnị jẹ́ pụghọ nama.

²⁰ Nnị ine ẹ́gẹ́rẹ́ pụghọ ma daagha ẹrẹ́sị bẹnyẹ bẹ, <<Ḅọ́rọ́ nama ḅụọ pa tụ́ndụ́ ma gbolo gbolo, nnị mgbọ́lụ pa anị gbi ḅabẹm.>>

²¹ Tụ́ndụ́ ma fịnị ḅara opuma ḅáláfámam si Mosis warị bẹ, <<Ḅáláfa I jighemaarị.>>

²² Tụ́ma Zayọn tụ́ndụ́ anị o tándị ḅo nyẹ dumafịnị Tamuno ma opu ama, sobie Jerusalem na pịghị tọgha tọgha mmẹẹ́ a ndẹ́ẹ oyia si findi sookumuapụ bieḅẹlẹ kubiri ogbo.

²³ Ọ Tamuno parị yii awọ ma kobiri ḅom, n sobie nnị ẹ́rẹ́ gịẹapụ, o Tamuno dámáḅómam kị́nị́mamgba ḅẹ́rẹ́kọḅọ, na pịghị n mịẹ kpainma ma karakárá ibiamịẹnyẹapụ tẹ́mẹ́.

²⁴ O Jizọs dámáḅómam, ịwọ ọḅọọ ma dẹghẹ karakárámaḅọ, na pịghị n sanị ọmbịnyẹ́ ibinyẹ mini Ebẹl ọmbịnyẹ́ nẹ́ngị nyẹ.

²⁵ Ọmịnị ọmịna ḅụ ẹḅịị anịgha ọmịnị ẹ́gẹ́rẹ́arị ḅo ma naabịgha. Mini sị Tamuno oku ma naaghaapụ tuminikiri, n ḅẹ́rẹ́kọ siri gbarịgha, wamịnị wa tọ́rọ pa anị gbarị bẹ, wa ḅọ́rọ́ oḅu pa sobie saghị ẹ́gẹ́rẹ́arịḅọ ma gbigbi.

²⁶ Ọ pụghọ tuminikiri ma jighemam, anịsa ma ḅụ. Kụ́ma mị́sa o mininimam ḅẹ́, <>

27 Mị ẹ́gẹ́rẹ́ ma, <> gbụ́nụ́nụ́ ḅara pa diearị ḅẹẹ, nnị tẹ́mẹ́nyẹ ma, nnị anị jighebẹm sị anị sii, sị nnị ine jighebịgha nyẹ na fịnịbẹ ḅara.

²⁸ Wamịnị ịmịẹḅam pa Tamuno ḅẹẹ, ḅẹẹ wa nnị ine jighemabịgha amadakiri nyánáakịarị. Wa bieḅẹlẹ sị susi Tamuno pịrị anị ọ tẹ́mẹ́ ḅẹlẹma bẹ ḅara, osigha na ḅáláfa na, ḅụ.

²⁹ Tegó wámịna Tamuno ori anịị kị́nị́ dọ́ghụ́ma dọ́ghụ́ma fịnị.