Galesiaapụ 6 - Ibani New Testament

Ḅárásua Ị Mị́naḅọ Ikúnyẹ Dighii

¹ Ị́yẹ́ amịna owiapụ, nnị ḅọ́rọ́ kị́nị́ kuu ọkụ́ma siiamịẹnyẹ ḅụ, ọmịnị Tọ́ntọ́ Tẹ́mẹ́ ma nyánáapụ diin ḅara pa n pa karakárá asọ ma ḅụ warị. Kụ́ma ḅụ ẹbị sị ịrịsọ daádighi bie sọbịgha ḅara.

² Ọ ḅárásua jụghọ jụghọ ikúnyẹ ma dighi anị ḅara ma ọ Krais ólóghó ma kokobẹm.

³ Ḅọ́rọ́ tumḅọ sị ḅẹ́, n ḅọ nyẹ ḅụ imi, nḅọ nyẹ ḅụ ófórigha sáá, anị tumḅọ ma oḅori pa nḅọ ḅụ sịarị.

⁴ Fịnịḅọ, fịnịiḅọ ọra mịẹnyẹ daádighi. Anị ibii nḅẹ́ḅẹ́ẹ́ anị sáá ori ine bịpịkpọbẹm ọmiẹmaa nyẹẹ, kụ́ma nna ḅụ pa jụghọ jụghọ na tọmaagha ḅara jụghọ mịẹmáa nyẹ.

⁵ Tegó fịnịḅọ fịnịḅọ, amịna ikúnyẹ dighibẹm.

⁶ Tọ́n ẹ́gẹ́rẹ́ ma daákịmáapụ, n nyáná ibinyẹ mamgba pa ḅárásua nna nyẹ́dieapụ pịrị.

⁷ Oḅori pa ịḅụ sịma, Tamuno kombo bẹḅọ ofori, tumḅọ dipinyẹ anịị nḅọ sughu bẹnyẹ.

⁸ Tumḅọ ḅọ́rọ́ nḅọ ojumẹnị tárịnyẹ dipi dipi anị ḅụ ḅọ́rọ́ nḅọ fịị sughuḅobẹm, kụ́ma nḅọ ḅọ́rọ́ Tẹ́mẹ́ ma ḅụ dipi dipi nḅọ anị ḅụ ḅọ́rọ́ gbámásó duma sughuḅobẹm.

⁹ Ịnyọ wa ḅụ fama ibinyẹ mịẹ ḅụ, tegó wa mịẹ bịpị mumu, sáá ḅobẹm wamịnị anị sịmgbọlụ sughuakị bẹ sáá.

¹⁰ Anịgosi wa asọ nyáná sa gonyẹ́ gonyẹ́ wa ibinyẹ mịẹ kị́nị́mamgba pịrị, ẹ́rẹ́soma Krais ḅụ mininiapụ ma.

Kunema Birinụ́nụ́ Na Sịbịpị

¹¹ Ọmịnị árịmam i ḅara gịẹnyẹ dụḅa láa ḅara, a i ḅara pa anị gịẹm!

¹² O sumaarịapụ ma ḅẹ́ ọ mú tọ́ngọ̄ pẹ́lẹ́ nnị dọghụarị ḅẹ́ túminị́ ibi ẹrẹ pa n si, nnị dọghụgha ḅẹ́ túminị́ n pa tọ́rụ́siarịma ḅẹ́ n diearị ḅẹ́ Krais mgbẹsẹ sị́ ma ngéré ḅụ anị dụaḅọ́rọ́ma fịnịnyẹ.

¹³ Tọ́ngọ̄ pẹ́lẹ́apụ ma sọ mịnị ólóghó ma kokogha, anị so nnị dọghụarị ọmịnị tọ́ngọ̄ pẹ́lẹ́ n bịpịkpọ bẹ ḅara ḅẹ́ ọmịnị ọ ḅụ warịsom sị nnị ọmịna tọ́ngọ̄ pẹ́lẹ́.

¹⁴ Ịrị ọkụ́ma Tamuno minini ma ḅẹ́ a jẹ́nyẹ pa bịpịkpọ wámịna Nyánáḅọ Jizọs Krais mgbẹsẹ sị́ ma sima, anị ḅụ ḅọ́rọ́ tuminikiri ma fịịmam a fịnị angaá, a pịghị fịịmam tuminikiri ma fịnị angaá.

¹⁵ Mị́sa kịrịnyẹ oforii anị ḅụ, wamịnị tọ́ngọ pẹ́lẹ́ na anịgha wamịnị tọ́ngọ̄ pẹ́lẹ́gha na, nyẹ ḅụ sọọ nyẹ anị ḅẹ́ nnị ịwọma tumḅọ tẹ́mẹ́mam.

¹⁶ Tamuno diin na ọrẹ lolomakúkúbie fịnị mịị dugho kóróma ẹ́gẹ́rẹ́ ma duaapụ pịrị, nna duma ḅụ na pịghị Tamuno túminị́ mamgba.

¹⁷ Mị́sa saghị bịpịmú, gbẹ́rẹ́ḅọ sọ mịnị ḅụḅáláḅálá pa i pịrịma tegó ị́yẹ́ oju a dighi ilíghíma ma diearị ḅẹ́ ịrị Jizọs Krais ómóniḅọ.

¹⁸ Ị́yẹ́ amịnáapụ, wa Nyánáḅọ Jizọs Krais tọ́rụ́kụrụkụ́rụ́ ọmịnị kị́nị́mamgba náa fịnị. Anị ọkọ fịnị.