Galesiaapụ 4 - Ibani New Testament

¹ Kúru a jẹ́ ḅara pa anị dugho, tụwọ ma daḅọ ma ngọ nyánáakị bẹḅọ ma kịrịgha ómóniḅọ ḅụ, ori ma ịrụ sa gonyẹ́ gonyẹ́, tụ́manyẹ ḅẹ́ nyẹ gonyẹ́ gonyẹ́ o nyẹ so nị.

² Tụwọ ma pa ịrụ sa, didighiapụ ḅara anịị ọ fịnị sẹ́nị págháḅo daḅọ ma tọ sáá ma la bẹnyẹ.

³ Anịị anị fịnị ḅara wamịnị ịrụ sáá, wamịnị omoni sọ tuminikiri ma táarị tẹ́mẹ́ pịrịm, akị mú wa ḅo sẹnị sa láa tẹ́mẹ́ju.

⁴ Kụ́ma karakárá sáá ma ḅo láa sa, Tamuno ọ Tụwọ fịrịmaḅom, ọ́rụ́ḅọ o yiim, Juuapụ ólóghó ḅara ḅụ ọ sẹ́nị págháḅom.

⁵ Tamuno ọ fịrịmaḅom, o ḅo wa dụapághámaḅo, ólóghó ma sughubie fịnịapụ si wamịnị ori awọ sọ bẹ ḅara.

⁶ Túminị́ árị bẹ ḅara ḅẹ́ ọmịnị mị́sa ori awọọ, Tamuno ọ Tụwọ Tẹ́mẹ́ fịrịmaḅom anị ḅo o bie fịnị. Tẹ́mẹ́ anịị owuarị nyẹ, <>

⁷ Mị́sa ịrị mịnị omoniḅọgha, kụ́ma Tamuno tụ́wọ, ịrị ọ tụwọ gosi ọ nyánányẹ mamgba ịnyee.

Pọl Ḅáláfa Nyáná Galesiaapụ Ma Minini Ḅụ Pághá Bẹnyẹ Pịrịm

⁸ Ḅọ́rọ́maa sáá, ọ Tamuno nimigha, anị sáá ọmịnị omoni sọ kịrịkị́rị́ tamuno pa siinyẹ pịrịm, kụ́ma nnị karakárá tamunoghaa.

⁹ Mị́sa ọ Tamuno nimimáa sáá (anịgha a dugho bẹ ḅẹ́ Tamuno ọmịnị nimimam) ọ tegósi ọḅụpịrị dọghụ mú kụrọ nyanagha na nyẹ ḅụ ofori tuminikiri táarị tẹ́mẹ́ ma pịrịdọ́ghu. O tégósi mú sima omoni sọ dọghụ?

¹⁰ Ọmịnị éné, akalụ́, sáá na kụ́rá kụ́rá bie álálị wárim.

¹¹ Anị i tẹ́mẹ́bie ḅụḅáláḅálá pa i pịrịarị bẹ ị́yẹ́ tọ́rụ́siarị mamgba ọmịna ḅụ anị ḅo papanyẹ sọm.

¹² A ọ tẹ́ghẹ̄m ịyẹa mịnaapụ, ọmịnị; a fịnị ḅara fịnị. Tegó ịrịsọ ọ fịnị ḅará fịnịm. Ọ gbẹ́rẹ́ siinyẹ sọ pa i mịẹgha.

¹³ Ọ́ kọ́kọ́ nimi ḅẹ́ a goo ine Krais ibi oku ma akuoo ọ pịrịnyẹ, parị sáá ma ḅụ ọ ḅẹ́ a obim gosi.

¹⁴ Karakárányẹ ḅẹẹ, ị́yẹ́ obi ma, anị ọmịna ḅụ daádighi, kụ́ma ọmịnị i dighisimagha anịgha i sịghịị. Anịmanakaragha ọmịnị i daa kórómam ọmịnị sobie sághị kóróḅo sookumuḅọ daákóróma bẹ ḅara; ọmịnị i daákịm ọ Krais Jizọs daakị bẹ ḅara.

¹⁵ Ọmịna bieḅẹlẹ parị ma, anị tẹ́ angaá imii tẹ́ pághá sị mịnanyẹ mamgba dima? Ịrị ḅụgbọrụ a ine dughobẹm ḅẹ́ ḅọ́rọ́ ọmịnị ine bẹ ọkụ́ma, ọmịnị ọmịna tọ́rụ́ sọghụ sị, anị pa i pịrịbẹm.

¹⁶ Mị́sa a ọmịna iruonaḅọ sọ ma, a tụ́manyẹ ma dugho ọ pịrịm gosi?

¹⁷ Isiapụ ma mịẹarị so ḅọ́rọ́ọ́ nnị opuma ọ ḅẹlẹma nyẹ, kụ́ma nna tẹ́mẹ́bie fịnịnyẹ ọmịna ḅụ ibighaa. Nnị dọghụarị ọmịnị i wáriso sị n dua bẹ ḅara, sị sághị nnị dughonyẹ mịẹ.

¹⁸ Mị́sa anị ibim tumḅọ ọkọfịnị opu ḅẹlẹma nyáná ḅọ́rọ́ kịrịnyẹ nna tẹ́mẹ́bie ofori, mịma anị sámámgba miẹnaibi nyẹ a ọ nana fịnị sa ngéréghaa.

¹⁹ A ḅẹlẹma ibi awọ, yii ọlọ ọ́rụ́ḅọ naarị ákụ ma anị mị́sa a nyáná ọ pịrị jẹ́ ákụ akị mú ọ sẹ́nị ḅo tumḅọ sọ sáá láa Krais bie.

²⁰ Anị i tarịarị ḅara sọ́ḅọ́rọ́ mị́sa ma ḅụ a ọ nana gbẹ́rẹ́ angaá imim, a nimi bẹ ḅara a bịpị warị ẹ́gẹ́rẹ kọọ ọ pịrịbẹ ḅara. Ọmịna fịnị ḅara i ḅụ́ḅáláḅálámaarị.

Sẹra Na Haga Ḅụ Fịnị Dáwọnyẹ

²¹ Dugho i pịrị, ọmịnị ólóghó ḅara ḅụụ ngá dọghụapụ, ólóghó ma dughonyẹ ọ naagha?

²² Tọ́ndiri ḅẹm ḅẹ́ Ebraham mmẹẹ́ awọ nyánam ori omoni ọ́rụ́ḅọ tụwọ gbẹ́rẹ́ḅọ yiim, furotụ́wọ ọ́rụ́ḅọ isi ḅo yiim.

²³ Ori omoni ọ́rụ́ḅọ tụwọ ma, nnị papa tụwọ yii ḅara anịị o ḅo ḅara, kụ́ma furotụ́wọ ọ́rụ́ḅọ ma tụwọ ḅom Tamuno mini nyẹ ḅụ ḅọ́rọ́.

²⁴ Mịnanyẹ ma nyẹ pa nyẹ́tọma ḅụ anị tumḅọ ine anị akanyaḅo bẹnyẹ; mmẹẹ́ ẹ́rẹ́ ma sẹ mmẹẹ́ ọḅọọ pịrịm. Árị tụ́wọ yiiḅọ omoni ḅụ, anịị Haga, árị ma sẹ Tamuno, Mosis na nyána ọḅọọ Sainai tụ́ndụ ọgọnọ pịrịm.

²⁵ Haga sẹ Sainai tụ́ndụ pịrịm Arebiya ḅẹrẹtọ yọ ḅụ, mịma sẹ́ mịmgba éné Jerusalem pịrịm anị na anị túminị́ mamgba omoni ḅụ imii.

²⁶ Kụ́ma sobie Jerusalem ma omoniḅọgha, árị anịị wámịna nyingiḅọ.

²⁷ Tọ́ndiri ma dughom ḅẹẹ; <>

²⁸ Mị́sa ịyẹa mịnaapụ ọmịnị sọ Tamuno mini nyẹ ḅụ n yii awọọ, Aizik fịnị ḅara ma.

²⁹ Anịsa ma ḅụ n papa awọ yii ḅara pa yiiḅọ ma warị sághị Tamuno Tẹ́mẹ́ gosi nnị yiiḅọ ma pa tọ́rụ́siarịma, anịị anị pịghị fịnị ḅara ḅo mị́sa láa.

³⁰ Kụ́ma tọ́ndiri ma anị tẹ́ dugho mịma gbolomanyẹ? <<Ómóni ọ́rụ́ḅọ tụwọ ma na a tụ́wọ deepágháma, tegó ómóní ọ́rụ́ḅọ ma tụwọ furotụ́wọ ọ́rụ́ḅọ ma tụ́wọ dua dienyẹ nyánábịgha nna daa ngọ ḅụ.>>

³¹ Anịgosi ịyẹa mịnaapụ, wamịnị ómóni ọ́rụ́ḅọ ma awọgháa, kụ́ma wamịnị anịị furotụ́wọ ọ́rụ́ḅọ ma awọ.