Galesiaapụ 3 - Ibani New Testament

Minini Ḅụ Ngéré Anịị Tumḅọ Dụaḅọ́rọ́ma Nyánáarị Nyẹ

¹ Ọmịnị oḅorisọ Galesiaapụ, tụọ diri pa ọ mịẹ? Ọmịna tórúku, anị ọ ḅụ koro ḅẹ́ ḅara, n dugho ọ pịrịm Jizọs Krais ḅara warị fịị ḅara mgbẹsẹ sị́ ọgọnọ.

² Ọ mịị gbẹ́rẹ́nyẹ ma dugho i pịrị, ọ Tamuno Tẹ́mẹ́ ma nyáná ḅo ólóghó ma warị ḅụ anịgha ibi oku ma náa sị pịghị anị minini ḅụ ḅọ́rọ́.

³ Ọ tọ́rọ́ pa ọkọfịnị oḅorisọ bẹ ọmịnị Tamuno Tẹ́mẹ́ pa sághịm, ọ sị ḅẹ́ ọmịnị ine ọmịna ịnyọ pa mị duma kọọ mú kunema láa bẹ?

⁴ Ọmịnị árị tọ́rụ́siarị mamgba ḅụ, ọ dawọḅo nyẹ ofori? Ọkọfịnị nyẹ ofori, ọ nyẹ dawọḅom.

⁵ Tamuno ori ọ Tẹ́mẹ́ ma pa ọ pịrị, pịghị ọmịna ogboku bie ḅụ́gbérépuma fịrị nwángịị, ḅẹ́ ọmịnị ólóghó ma wárim gosi? Anịgha ḅẹ́ ọmịnị ibi oku ma naam sị anị ḅụ minini?

⁶ Ọmịnị Ebraham dighi nị, tọ́ntọ́ diri ma dugho ḅara, <<Ọ Tamuno ḅụ mininim, Tamuno pịghị ọ daákịm ḅẹ́ ori karakárá ibiamịẹnyẹḅọ ori minini gosi.>>

⁷ O nimiḅo ḅẹẹ, karakárá Ebraham furoawọ anịị minini nyánáapụ ma.

⁸ Tọ́ndiri ma pághá bẹnyẹ ma dugho kórómamam ḅẹ́ Tamuno Juughaapụ ma pa ọ ḅụ na karakárá ḅụ ḅụ warịbẹm, minini ḅụ ḅọ́rọ́. Anịgo ibi oku ma dugho Ebraham pịrịmam ḅẹẹ, <<Ịḅụ ḅọ́rọ́ Tamuno tuminikiri sẹ gbọrụ karịibimabẹm>>.

⁹ Anịgo wamịnị arịm ḅẹẹ, minini nyánáapụ gonyẹ́ gonyẹ́ karịibima nyánábẹm nnị Ebraham karịibima ḅara ori minini gosi.

¹⁰ Kórómáarịapụ ḅẹ́ nnị ine Tamuno na karakárá ḅụ fịnịbẹm ólóghó ma koko ḅụ, mịnaapụ ma sifịla ḅụ anịị nnị duma kọọarị nyẹ. Ḅẹẹ, n gịẹ kórómamam ḅẹ́, si fị́lā fịnị kị́nị́mamgba pịrị, <<Ólóghó Diri ma dughonyẹ mamgba mịẹgha ḅo.>>

¹¹ Mị́sa wa ḅo nimiḅom ḅẹ́ ólóghó ma ḅụ ḅọ́rọ́ nnị gbẹ́rẹ́ḅọ sọ pa Tamuno na karakárá ḅụ ḅụ warịgha, <>

¹² Ólóghó ma anị minini na ḅẹnyẹ ḅẹnyẹ nyanagha tụ́ma Tọ́ndiri ma dugho ḅara ḅẹ́, <<Ólóghó ma binyẹ mamgba mịẹ ḅo anị ḅụ ḅọ́rọ́ dumabẹm.>>

¹³ Krais sifịla sọ wa pịrịmaá ḅara ma, ọ wa dụaḅọ́rọ́māmám ólóghó ma akuoo si fị́lā ḅụ; Tọ́ndiri ma dugho ḅara ḅẹ́, <>

¹⁴ Krais mịma mịẹm sị Tamuno mini Ebraham pịrị karịibima ma, Juughaapụ ma sọ nyáná ḅo bẹ ḅara Krais Jizọs ḅụ ḅọ́rọ́, anịgo minini ḅụ ḅọ́rọ́ wamịnị ine Tamuno minini Tẹ́mẹ́ ma nyáná ḅo bẹ ḅara.

Ólóghó Ma Na Mini pịrịnyẹ Bie Kịrịnyẹ

¹⁵ Ịyẹa mịnaapụ, a éné gbọrụ mịẹarịnyẹ pa nyẹ pa, o diebẹm; mmẹapụ nyẹ mini sáá, anị gịẹ sua diri bie, ḅara pụnụ; ḅẹ́ mịị anị fịnị bẹ ḅara, gbẹ́rẹ́ḅọ ine anị kaabịgha, anịgha nyẹ sua anị ḅụ.

¹⁶ Mị́sa Tamuno nyẹ mini pa Ebraham na ọ furobie págháḅo nyẹ pịrịm. Tọ́ndiri ma <> ḅẹgha, kuma o furobie Págháḅo ḅọ, mịma dughoarị gbẹ́rẹ́ḅọ ngéré mịị gbẹ́rẹ́ḅọ ma anịị Krais.

¹⁷ Mịnga a dughoarị ḅẹ́ Tamuno Ebraham na ọḅọọ fịm warị mini ḅẹ́ ori anị warịbẹm. Anịgo n pịrị ólóghó ma kụ́rá ndẹ́ẹ na sue ḅo ḅọ́rọ́ sáá ine anị ọḅọọ ma kaabịgha sị Tamuno mini nyẹ ma pa ḅuuma.

¹⁸ Ḅọ́rọ́ ḅẹ́ Tamuno dienyẹ ma ólóghó ma ḅụ gbánam, anịsáa anị mịnị o mini nyẹ ḅụ gbánāgha. Kụ́ma Tamuno ọrẹ tọ́rụ́kụrụkụ́rụ́ gosi mini nyẹ ori anị pa Ebraham pịrịm.

¹⁹ Mị́sa, ọ tegósi ólóghó ma pịrị, ori anị pa suam pa diepágháma ḅẹ́ irima mịẹnyẹ siinyẹ. Mị ólóghó ma anị fị́nị́ mú Ebraham furo tụwọ ma ḅo bẹ sáá láabẹm, n mịị mini pịrịnyẹ ma minini pịrịḅọ. Sookumuapụ anịị mịị ólóghó ma saghị ḅọ́rọ́ma nyẹ, Mosis warị Tamuno na túminị́ ma ogboku sẹ ḅọ dighi.

²⁰ Mị́sa mmẹapụ ọḅọọ fị sáá nnị ogboku sẹ ḅọ bim, Kụ́ma mịị ọḅọọ ma ogboku sẹ ḅọ nyanagha tegó Tamuno ori gbẹ́rẹ́ḅọọ.

²¹ Mịma anị die ḅẹ́ ólóghó ma anị Tamuno mini nyẹ na kuragha? Ọkọfịnị nyẹ ofori! Ḅọ́rọ́ tuminikiriapụ duma pịrịbẹ ólóghó nyanaḅomam anị sáá, kị́nị́mamgba karakárá ibiamịẹnyẹapụ sọ́bẹm nnị anị kokoarị sáá.

²² Tọ́ndiri ma dughom ḅẹ́ tuminikiri gbọrụ sii kụ́rọ ma sughubie imi; anịgo n mini wa pịrị dienyẹ ma wámịna minini Jizọs Krais ḅụ ḅọ́rọ́, mininiapụ ma ngéré anịị nnị pa pịrịapụ.

²³ Kụ́ma minini ma na ḅo laagha sáá, ólóghó ma wamịnị kị́nị́mamgba ikasim ikólinaapụ ḅara, akị mú minini anị ḅụ die sa láa.

²⁴ Anịgo ólóghó ma anị wa didighiḅọ, akị mú Krais ḅo sáá láa, sị minini ḅụ ḅọ́rọ́ n wa pa Tamuno na karakárá ḅụ ḅụ fịnị.

²⁵ Mị́sa minini sa ma ḅo láa maá sáá, ólóghó ma mịnị wa didighiḅọ sọgha.

²⁶ Anịgosi ọmịnị kị́nị́mamgba Tamuno awọ sọmam ọmịna minini Jizọs Krais ḅụ ḅọ́rọ́.

²⁷ Ọmịnị kị́nị́mamgba o mingi saramam sị o Krais na gbẹ́rẹ́ ḅụ ḅụ fịnị, mị́sa n Krais duma pa ọ́ suamam sọ́ḅọ́rọ́ ọmịna suabịtẹ.

²⁸ Mị́sa kịrịnyẹ mịnị oforii, Juu anịgha Juughaapụ, ómóniapụ anịgha furoawọ, owitụ́wọ anịgha ọ́rụ́ḅọ, ọmịnị kị́nị́mamgba ọmịnị gbẹ́rẹ́nyẹ Jizọs Krais ḅụ.

²⁹ Ọmịnị ḅọ́rọ́ Krais nyẹ nḅẹḅẹ́, ọmịnị Ebraham awọ. Ọ Tamuno mini karịibima ma nyánáḅobẹm.