Galesiaapụ 1 - Ibani New Testament

Pọl Sịbịpị

¹ Irị Pọl, n sịḅọ ḅẹẹ o ḅo mị nfịrịmaḅọ ma fịrị nwangịị, ị́yẹ́ sị ma, tumḅọ ḅara saghị ḅogha anịgha túminị́ mịẹnyẹ ḅụ ḅọ́rọ́, kụ́ma Jizọs Krais ḅara na pịghị Tamuno Daḅọ ma ḅara saghịḅom, fịị ḅụ ọ saghịma ḅọ.

² Mịnga fịnị mịná owiapụ mamgba bịpị suam ḅẹẹ, a Galesia bie fịnị Tamuno kubiri ogbo mamgba bii.

³ Ḅẹ́ Tamuno wámịna Daḅọ na pịghị Kị́nị́nyánáḅọ Jizọs Krais tọ́rụ́kụrụkụ́rụ́ na diin pa ọ pịrị.

⁴ Krais ori duma pa igwagwaá wa pịrịm wámịna sii gosi, Tamuno Daḅọ ma bi ḅara.

⁵ Boma fịnị Tamuno ma pịrị mú ḅẹsá ḅẹsá la. Anị ọkọ fịnị.

Gbẹ́rẹ́ Ibi Oku Ngéré Anịị Fịnịnyẹ

⁶ Anị i tọ́rụ́ nẹngịm ḅẹ́ ọmịnị álála Tamuno ma sịghịmam, Krais tọ́rụ́kụrụkụ́rụ́ ḅụ ọ sịḅọ ma sị pịghị jẹ́ oku daákịarị ọ sị nyẹ ḅẹ́ anịị ibi oku ma.

⁷ Jẹ́ ibi oku ofori, a mịma dughoarị tegó jẹ́apụ imi ḅụḅáláḅálá pa ọ pịrịarịapụ n pịghị asọ dọghụ Krais ibi oku ma dima dọ́ghụm.

⁸ Ḅọ́rọ́ wamịnị anịgha sobie sághị ḅo sookumuḅọ ḅo jẹ́ ibi oku dugho wásáma ọ pịrị, kịrịnyẹ wa dugho ọ pịrịmaá nganyẹ ma ḅụ, Tamuno si fị́lā pa n ḅọ sịbị ọgọnọ ḅụ gbánabẹm mú gbámásó láa.

⁹ Wa sima dughobẹm, wa parị dugho ḅara ḅẹ́; ḅọ́rọ́ ḅẹ́ jụghọ ḅo jẹ́nyẹ dugho ọ pịrị, ọ daákịmaá nganyẹ ma ḅụ kịrịnyẹ, si fị́lā nḅọ sịbị ọgọnọ gbánabẹm mú gbámásó láa.

¹⁰ Mịma anị die ḅẹ́ a túminị́ ḅẹlẹma bẹnyẹ mịẹarị? Ọkọ fịnịgha, a binyẹ anịị Tamuno ḅẹlẹma bẹnyẹ. Ḅọ́rọ́ ḅẹ́ a túminị́ go pa iḅẹlẹma bẹnyẹ mịẹarị, anịsáa a ine Krais fịrịnwangịḅọ ẹrẹ fịbịghaa.

Pọl Ḅára Warị Nfịrịmaḅọ Sọ Ḅara

¹¹ O kúru a dugho ọ pịrị ị́yẹ́ a mịnaapụ, a dugho wásámaarị ibi oku ma kị́nị́ ḅara sághị ḅogha.

¹² A kị́nị́ ḅara anị nyánáḅoghaa, anịgha kị́nị́ anị pa i die, Jizọs Krais ọ ḅara na anị diefindi i pịrịm.

¹³ Ọ naamam, a pa ngá ḅara a Juuapụ tẹ́ghẹ̄ ma kọọarị sáá, a ọḅụdighigha ḅara pa Krais asọduaapụ ma pa tọ́rụ́siarịma ḅara, a pịghị ị́yẹ́ ịnyọ láa ḅara mịẹm árị ḅẹ́ a Tamuno kubiri ogbo ma gulugulumam.

¹⁴ A Juuapụ tẹ́ghẹ̄ ma kọọ i bịrịapụ i jẹa Juuapụ mamgba nẹngịm, a ine ḅara, a wámịna tádọ́apụ saghị ḅọ́rọ́ma wa pịrị ámá mịẹmịẹnyẹ ma ọlọ sẹ́mam.

¹⁵ Tamuno ọrẹ tọ́rụ́kụrụkụ́rụ́ ḅụ tarị i sẹ́lẹ́akịm nịị nnị i yiigha sa ḅẹ́ a ḅo fịrịnwangị ọ pịrị. Ọ dọghụ sa ḅẹ́ ori ọ Tụ́wọ ma pa i die

¹⁶ a ine o gboloma ibi oku dugho wásáma bẹ ḅara pa Juughaapụ pịrị, a mangị mú kị́nị́ gbilaghaa a mịẹbẹnyẹ.

¹⁷ A iwóo Jerusalem mugha mú tarị nfịrịmaapụ ma ḅara nyẹ gbíla, anịmanakaragha a Arebiya ḅẹrẹtọ yọ múm, miẹfamaa sa a so Damasikọs ama ḅoo.

¹⁸ Tẹ́rẹ́ a kụ́rá ḅo ḅọ́rọ́ sáá, anịị a so Jerusalem mú nyẹ mú Pita na irịa, warị ọ nana aningáa jie a dii fịnị.

¹⁹ A jẹ́ nfịrịmaḅọ arịgha tụ́ma Jems ngéré Kịnịnyáná Jizọs numboru.

²⁰ Karakárányẹ anịị a gịẹárị nyẹ, Tamuno nimim ḅẹ́ a iruoghaa.

²¹ Mịẹfáma sáá a tọgha angaá múm Siriya na Silisiya ḅẹrẹtọ yọ.

²² Anịsa ma ḅụ Krais kubiri ogbo mamgba Judiya ḅẹ́rẹ́kọ yọ bie fịnịnyẹ na nnị inimigha ịrị tụọ.

²³ Jẹ́apụ dughoarị nyẹ ngéré anịị n níminyẹ: <<Ḅẹ́ parị wa pa tọ́rụ́siarịma ḅọ ma mị́sa ọ fama dọghụ minini ma dugho wásámaarị.>>

²⁴ Anịgo, nnị Tamuno túminim i sịbị gosi.