Fịrị Ḅara 24 - Ibani New Testament

Nnị Pa Pọl Sịbị Sẹ Ḅẹrẹ

¹ Sọ́nọ́ a dii ḅo ḅọ́rọ́ sa, Ananayas opu igwagwaḅọ Siza dámámum ori na jẹa sẹ́nịapụ na pịghị gbẹ́rẹ́ ólóghókieḅọ Tetulọs pa sịḅọ nnị warị n nyáná Pọl pịrị ḅẹ́rẹ́ ma pa Ḅẹ́rẹ́tọ́ḅọ Fẹlis tórúku kórómaa.

² Nnị warị Pọl sị suu, Tetulọs wárị nnị pa ọ sịbị sẹ ḅẹ́rẹ́ ma kọ́rọ́ma Fẹlis tórúku. <<Ị́yẹ́ Pẹ́rẹ́! Ị́yẹ́ ibi ámátaḅara mịẹsị mị́sa wa nángwọ diin nyánam pịghị ịḅụ ḅọ́rọ́ mị sẹ ma pịghị tọgha ibinyẹ na tọgha ịwọ nyẹ árịmam.

³ Wa mịma arịm ngámámgba pịghị sámámgba ḅụ, wa pịghị opuma bieḅẹlẹm sị ịmịẹḅam pa ị ḅẹm.

⁴ Á bigha a opuma ị́yẹ́ sáá ngúma, anịgo a tẹ́ghẹ̄m ḅẹẹ ị kẹ́lẹ́ birifama wa pughu wa dugho bẹ kálányẹ ma náa.

⁵ Wa mị owitụ́wọ ma arịm ḅẹẹ ori opu ḅẹ́rẹ́náḅọ tuminikiri gbọrụ ḅụ anịị ọ pịghị ḅẹrẹ dighiarị ḅara Juuapụ ma ogbobie, ori ma anị pịghị sịbịdá Nazarẹtị ḅụ saghị ḅoḅọ duapụ ogboapụ pịrịḅọ.

⁶ Ọ pịghị dọ́ghụm ḅẹ́ ọ Tamunoopuwárị ma pilema: anịị wamịnị ọ kuunyẹẹ.

⁷ Kụ́ma opu ọ́mụ́gbi sịbịdaḅọ ma Lisayas ḅom sị warị kụrọ ḅara pa wámịna ḅárabie ọ pughọakị.

⁸ Lisayas opu ọ́mụ́gbi sịbịdáḅọ warị bịpị pịrị ḅẹ ḅẹ́rẹ́ pa ọ sịbị sẹarịapụ ma ị damaḅo. Ị ḅọ́rọ́ mịị owitụ́wọ ma gbíla gbíla ịrịsọ pịghị dọghụ pághámaḅobẹm wa pa ọ sịbị sẹarịnyẹ mamgba.>>

⁹ Juuapụ ma sọ bịpị suam ḅẹ́ n pa ọ sịbị sẹarịnyẹ ma karakárá nyẹẹ.

Pọl Ọ ḅụ Pighim Fẹlis Tórúku

¹⁰ Ḅẹrẹtọḅọ ma warị ḅara pa Pọl fọngụma ḅẹ́ ori ẹ́gẹ́rẹ́ẹ́, Pọl warị ọ ḅẹẹ: <

11 Ị ine ị ḅara na dọghụ pághámaḅo bẹ ḅara, na oyi mmẹẹ́ a dii ḅọ́rọ́gha a Jerusalem ḅo nyẹ ḅẹ́ a ḅo tẹ́ghẹ̄ẹ̄.

¹² Juuapụ ma nnị ị́yẹ́ arịịgha a gbẹ́rẹ́ḅọ na nụ́náarị sáá Tamunoopuwarị ma bie, anịgha nnị pịghị ị́yẹ́ arịị a túminị́ timi sághịarị sa Juuapụ kobiri yọ ma ḅụ anịgha jẹa ngaa ámá ma bie.

¹³ Anịgha ḅẹ́ mị́sa nnị ine ḅara ḅụ ọlọ bẹnyẹ imi si pa die, mị́sa nnị pa i sịbị sẹarịnyẹ ma.

¹⁴ A mịma mininiakim i tórúku ḅẹẹ: a wámịna tádọ́apụ Tamuno ma tẹ́ghẹ̄m, pịghị anị asọ ma dua, nnị ḅẹ́arịnyẹ ma ḅẹẹ karakáragha. Kụ́ma a pịghị Mosis ólóghó diri bie n gịẹnyẹ mamgba mininim na pịghị ikiakoroapụ ma diri.

¹⁵ Mịnaapụ ma nyáná tọ́rụ́ dighinyẹ anịị ịrị ma sọ nyáná nyẹ́ẹ́, ḅẹẹ túminị́ mamgba ibiapụ na siiapụ na fịị ḅụ saghịbẹm.

¹⁶ Anịgo a ị́yẹ́ ịnyọ la ḅárá mịẹm sị árị ḅẹ́ a fíafía kúkúbie nyánam Tamuno tórúku na pịghị túminị́ tórúku.

¹⁷ <<Ḅọ́rọ́maa tọgha kụ́rá ḅụ a Jerusalem ḅụ ofori, a anị ngaa muum ḅẹ́ a kálá igbii nyẹ akị mú ịyẹa túminị́ pịrị pịghị igwagwaá.

¹⁸ A mịma mịẹarị sáá anịị nnị ị́yẹ́ árịnyẹ Tamunoopuwarị ma bie, a ojusiri igwaa ma gwafama sáá tọgha túminị́ i nana oforii anịgha, mangị na silé na sọ kiriakịgha.

¹⁹ Kụ́ma jẹa Juuapụ Esiya ḅẹrẹtọ párángáa ḅoapụ anị ngaa imii, nnị ḅo na ibim sị ḅẹ́rẹ́ pa i sịbị sẹ, nnị árị sị a mịẹnyẹ imi nḅẹḅẹ́.

²⁰ Anịgha, mịngáá fịnịapụ ma dugho nnị árị sị a mịẹ siinyẹ, a sẹ sáá ámáḅẹ́rẹ́dughoapụ ma tórúku.

²¹ Gbẹ́rẹ́nyẹ ngéré anịị a ilúghú dughonyẹ a sẹ sáá nna tórúku ḅẹẹ: <Ọmịnị i pa ḅẹ́rẹ́kọ siri ḅom a mininim gosi ḅẹ́ fịịapụ ma fịị ḅụ sághị duma bie sọbẹm.> >>

²² Kụ́ma, Fẹlis ibima asọ ma gbolomanyẹ nimiḅọ warị ḅẹ́rẹ́kọ siri ma gbẹ́ẹ̄. Ọ warị n ḅẹẹ, <>

²³ Ọ warị nnị Pọl pa ḅárásua ọ́mụ́gbiḅọ ma ḅẹ́ ḅẹẹ, o mú Pọl pa kúru ngaa warị kụ́ma ọ kẹ́lẹ́ dii wọwọọma ọ pịrị, ọ pịghị ọrẹ nangwọapụ wáriso sị nnị o binyẹ pa ọ pịrị.

Pọl, Fẹlis Na Durusila Tórúku

²⁴ Éné ḅo kẹ́lẹ́ ḅọ́rọ́ sáá, Fẹlis na ọ taa Durusila Juu ọ́rụ́ḅọ warị ḅo ḅoo. Ọ warị fịrịma Pọl sii warị o pughu ọ Jizọs Krais ḅụ minini gbolomanyẹ dugho.

²⁵ Kụ́ma Pọl saghị ibiamịẹnyẹ, na ine ḅụ ọlọ, na pịghị ḅoarị ḅẹ́rẹ́kọ éné ma dughoarị sáá, ḅáláfaa warị Fẹlis ḅụ sọọ, ọ warị ọ ḅẹẹ, <>

²⁶ Anị gbẹ́rẹ́ sáá ma ḅụ ọ tẹ́mẹ́bie dighiarị ḅẹ́ Pọl kẹ́lẹ́ igbii nyẹ pa ọ pịrịbẹm anịma go, sáá ḅụ akị mú sáá láa, ori ọ sịbẹm sị ori ọ nana ẹ́gẹ́rẹ́kọọ.

²⁷ Mmẹẹ́ a kụ́rá ḅo ḅọ́rọ́ sáá, Pọsiosi Fẹstọsị ḅo Fẹlis kiriakịm ḅẹ́rẹ́tọ́ḅọ ḅara. Kụ́ma Fẹlis ibi pa Juuapụ ma mịẹbẹ goo, warị Pọl wáriso ịkóli wárịbie.