Fịrị Ḅara 21 - Ibani New Testament

Pọl Jerusalem Múm

¹ Wa ọmịnị ibima fịnị pa n ḅẹm warị sua págháma. Wa kẹ́lẹ́ dọghụ tórúku múm sị sáḅá kóró sị ḅo Kọs láa. Anị ḅụ éné ḅa sáá wa ḅo Rodis laam, anị ngaa wa warị ḅọ́rọ́ Patara muu.

² Anị ngaa anịị wa gbẹ́rẹ́ árụ́ arịị nyẹ Fonisiya muarịnyẹ, wa warị anị ḅụlọ sị suapágháa.

³ Wa ḅo gbẹ́rẹ́ ngaa lam wa Saiprọs arị ngaa, wa warị sua sughu ju daa sị ḅoo Siriya láa. Wa muu kiri sọ́mam Taya ḅụ, árụ́ ma anị dighinyẹ sẹkóróma ngaa.

⁴ Anị ngaa wa jẹa mininiapụ arịm warị nnị ná sọ́nọ́ma dii fịnị. Tọ́ntọ́ Tẹ́mẹ́ kụrọ ḅụ n dugho Pọl pịrịm ḅẹ́ o Jerusalem muu ma.

⁵ Kụ́ma wa nyáná nnị pịrị sáá kara sáá, wamịnị n warịsom sị wa muarịnyẹ múm. Nnị kị́nị́mamgba nnị nna taa na awọ na wa ḅọ́rọ́maa ámá ma bie págháḅo posie áká ma ḅom, wamịnị kị́nị́mamgba ẹkpẹrẹkị sị tẹ́ghẹ̄ ngaa.

⁶ Anịsáa, wa warị ibima fịnị pa jụghọ jụghọ bẹ sị árụ́ ma ḅụlọ, nnị warị pịghịma wárị muu.

⁷ Wa warị wámịna muunyẹ muu, Taya ḅụ akị mú Tolemayas láa wa sịbịpị pa mininiapụ ma sịị angaá, warị nnị na gbẹ́rẹ́ éné fịnị.

⁸ Anị ḅụ éné ḅáa, wa suapághám sị ḅo Sizariya láa. Anị angaá Filipụ Tamuno ẹ́gẹ́rẹ́ dugho wásáma ḅo wárị, anịị wa fịnịnyẹ, Jerusalem ḅụ nnị sẹlẹakị sọ́nọ́ma ḅárásúapụ ma ḅụ gbẹ́rẹ́ḅọ.

⁹ Ori ínia ẹ́rẹ́awọ nyanam náa dee yaghaapụ, Tamuno ẹ́gẹ́rẹ́ ma dugho wásámáarịapụ.

¹⁰ Wa tọgha éné fịnịmam gbẹ́rẹ́ Agabọs pa sị ikiakoroḅọ Judiya ḅụ saghị ḅo sáá.

¹¹ Ọ wa dámáḅom warị Pọl kundu kpọ árị́dírí pa o ḅụọ na o ḅara kpọọ, warị ḅẹẹ, <>

¹² Wa mịma náa sáá wamịnị na anị ngaa fịnịapụ ma Pọl tẹ́ghẹ̄m ḅẹ́ ọmịnị Jerusalem muu ma.

¹³ Kuma ọ wa pagharam ḅẹẹ, <<Ọ tegósi owu i tẹ́mẹ́ nainnainmaarị? Ḅẹẹ a tẹ́lẹ́mámam ḅẹẹ ịkóli ngéréghaa nnị i pa suabẹnyẹ; kụ́ma pịghị fịị Jerusalem ḅụ Kị́nị́nyánáḅọ Jizọs ma ẹrẹ́sị.>>

¹⁴ Wamịnị ine mịẹgha ọ tẹ́mẹ́ dima, anịgo, wa warị ọ warịsó ḅẹẹ, <>

¹⁵ Wa kẹ́lẹ́ sáá fámá sị anị ngaa fịnị fámá sa wa wámịna nyẹ taákim sị Jerusalem muu.

¹⁶ Krais ọḅụdua jẹapụ Sizariya ḅụ saghịḅom mị anịị wamịnị na mú sị wa fịnị bẹḅọ ma wárị pa wa die nyẹ, Minason Saiprọs ḅụ saghị ḅoḅọ Ḅọlọmaa sáá éné éné minini maá ḅo.

Pọl Ḅo Jerusalem Lam

¹⁷ Wa mú Jerusalem láa sáá, mininiapụ ma ibiḅara pa wa daa kórómam.

¹⁸ Anị ḅụ éné ḅáa, Pọl warị wamịnị na mú Jems arịị, sọsị sẹ́nịapụ mamgba sọ anị ngaa imii.

¹⁹ Pọl sịbịpị pa n siim warị ḅo nyẹ fịnị ḅara mamgba dugho nnị pịrị Tamuno ọ ḅara pa nwángịmáa fịrị mamgba Juughaapụ ogbobie.

²⁰ Nnị o pughu fama sáá, nnị kị́nị́mamgba warị Tamuno túminim. Nnị warị ḅẹẹ, <

²¹ Nnị dugho n pịrịmam ḅẹẹ, ị Juughaapụ bie ngaa Juuapụ mamgba diearị ḅẹ́ nnị mịnị Mosis ólóghó ma pa nyẹ́sị ma, pịghị nnị diearị ḅẹẹ n mịnị nna owiapụ awọ tọ́ngọ pẹlẹ ma, ḅẹẹ nnị mịnị pịghị Juuapụ mịẹmịẹnyẹ ma dua ma.

²² Mị́sa wa tẹ́ mịẹbẹ? Gbarịgha ḅara ḅụ n naábẹm ḅẹ́ i ḅomam.

²³ Mịma anịị wa dọghụ bẹnyẹ sị i mịẹ. Mịnga ínia owiapụ imii nyẹ mininimáapụ.

²⁴ Nnáná mú gbẹ́rẹ́ sáá sị nnị na oju mịẹ fiafiama igwa ma gwáa, pịghị igwáa ma láanyẹ láanyẹ gbẹ́ẹ̄ anịsáa nnị ine nna sịbị sẹbẹm. Mị ḅara ma kị́nị́mamgba nimibẹm ḅẹ́ ị gboloma sị n dugho nnị pịrịnyẹ ma karakárányẹ anị bie ofori, kụ́ma ịrịsọ pịghị Mosis ologho koko ḅọ.

²⁵ Kụ́ma ḅo mininimaa Juughaapụ ma wa ábálálá pa nnị fịrịmamam ḅẹ́ n jẹ́ éné jẹ́ éné nnị n pa igwagwaá oru pịrị fị́nyẹ fị ma, anịgha pulo táḅa, anịgha n ḅa sị pulo anị bie sara págháa nama pẹẹ́, ḅẹ́ n pịghị nna ḅụ fófóoma yáakuu ḅụ ofori nwángị ḅụ.>>

²⁶ Pọl túminị́ ma akịm warịị anị ḅụ éné ḅáa nna oju mịẹ fiafiama igwa ma gwaa. Anị sáá ọ warị Tamunowarị ma sọọ sị bịpị pịrị oju mịẹ fiafiama igwa éné ma káarabẹ sáá, sị nnị igwa ma igwa ọ́rụ́ḅọ ọ́rụ́ḅọ pịrịbẹ sáá.

Nnị Pọl Kuum Tamunoopuwarị Ma Bie

²⁷ Kụ́ma Sọ́nọ́ma dii ma kara bẹ sáá, jẹa Juuapụ Esiya ḅẹrẹtọ angaá saghị ḅoapụ Pọl arịm Tamunoopuwarị ma bie nnị warị túminị́ kpo ma timi saghị nnị warị Pọl kuu,

²⁸ n warị ilúghú, <>

²⁹ (Nnị mịma dughom tegó nnị Trofimọs, Ẹ́fịsọs ḅụ saghị ḅo ḅo na Pọl arịm opu ama ma bie nnị siim ḅẹ́ Pọl ọ pa Tamunowarị ma sọmam.)

³⁰ Galagala warị ama gbọ́rụ́ ma ikelema, túminị́ ma warị gbẹ́rẹ́sa mangị sị Pọl kuu sẹ́ma sị ọ nụ́nụ́ pághámaḅo Tamunoopuwarị ma bie. Anị gbẹ́rẹ́kiri Tamunoopuwarị ma ḅụ́pọ́ gbẹm.

³¹ Túminị́ kpo ma asọ dọghụarị n Pọl ḅáa bẹ ḅara, anịị bịpị mú Rom ọ́mụ́gbiapụ ma sịbịdáaḅọ biri láa nyẹ ḅẹ́ Jerusalem gbọrụ gálágálá nna bie imi.

³² Anị gbẹ́rẹ́kirikiri ma ḅụ opu sịbịdaaḅọ ma jẹ́ ọ́mụ́gbiapụ na jẹ́ sịbịdáapụ pa álála túminị́ kpo ma fịnị angaá ma muu. Nnị sịbịdáapụ ma na ọ́mụ́gbiapụ ma árị sáá, nnị mịnị Pọl fomugha.

³³ Sịbịdáaḅọ ma warị Pọl dama mú sị o kuu, warị ḅẹ́ nnị mmẹẹ́ ịkóli pa Pọl kpọọ, ọ warị anịsáa gbíla ḅẹẹ, <>

³⁴ Jẹapụ túminị́ kpo ma bie ilúghú gbẹ́rẹ́nyẹ dughom, isiapụ jẹ́nyẹ dughom ọkọ fịnị gálágálá kiri imi sị opu sịbịdáḅọ ma ine nimiḅogha pághányẹ. Ọ warị ori a túminị́ ḅẹ́ sị nnị Pọl akuoo nna ọ́mụ́gbiapụ wárị ḅoo.

³⁵ Nnị ḅoo ọ nana ọgọ́nọ́ tándị angaá ma láa sáá, dighii anịị nnị o dighinyẹ, túminị́ ma tọ́rụ pulo biaarị gosi.

³⁶ Nnị kị́nị́mamgba ori ọḅụju ḅoarị siléarị ḅẹ́ nnị <>

Pọl Pighíí Ọḅụ Pịrịm

³⁷ Ọ́mụ́gbiapụ ma Pọl pa nna ọ́mụ́gbiapụ wárị sọọ bẹ sáá, ori ẹ́gẹ́rẹ́kọọ sịbịdaaḅọ ma pịrịm ḅẹẹ, <> Sịbịdaaḅọ ma warị Pọl gbíla ḅẹẹ, <>

³⁸ <>

³⁹ Pọl pagharam, <>

⁴⁰ Sịbịdaaḅọ ma asọ pa ọ pịrịm, Pọl warị wárị ọ́gọ́nọ tándị yọ ḅụ sẹ warị ḅara pa túminị́ fọngụma ḅẹ́ nnị bịpị gbẹ́ẹ̄, nnị bịpị gbẹ́ẹ̄ sa Pọl warị ẹ́gẹ́rẹ́kọọ nnị pịrị Hiburu ḅẹ́lẹ̄ ḅụ.