Filipaiapụ 3 - Ibani New Testament

Tụ́ma Karakárá Ibiamịẹnyẹ

¹ Kunemaá, ịyẹa mịnaapụ o bieḅẹlẹ ḅẹ ọmịnị Kị́nị́nyánáḅọ ma bie imii. A balagha sima parị a gịẹmaa nyẹ ma gịẹ anị pịghị sọnyẹ sọ ọ pịrịbẹm a ḅọ́rọ́ ọkọ mịẹmịẹ.

² Siiamịẹnyẹ mịẹarịapụ ma dọghụ pághámá ḅo, anị obiri ma kụ́rọ́ma dughoarịapụ ḅẹ tumḅọ tọ́ngọ̄ pẹ́lẹ́bẹm.

³ Wamịnị anịị karakárá tọ́ngọ̄ pẹ́lẹ́apụ ma nnigha, wamịnị wa Tamuno tẹ́ghẹ̄arị ori Tẹ́mẹ́ ḅụ ḅọ́rọ́, pịghị bieḅẹlẹ nyáná wámịna duma Krais Jizọs bie. Wa tẹ́mẹ́ pa ojumẹnị mịẹ mịẹnyẹ ḅụ gbánāgha.

⁴ A ine i tẹ́mẹ́ pa ọkọfịnị nyẹ ḅụ gbánabẹm ḅọ́rọ́ kórómaarịḅo imi imi nḅọ go amịna tẹ́mẹ́ pa ojumẹnị nyẹ ḅụ gbánā bẹnyẹ, a ḅárápụ́nụ́ nyẹ nyanam anịgoo ọkọ pa ịḅụ fịnị bẹnyẹ.

⁵ Inine a dii éné anịị nnị i tọ́ngọ̄ pẹ́lẹ́ nyẹ ịrị Izirẹlị furotụ́wọ, Benjamin furo ḅọ ọmbịnyẹ́ gwaghaa Hiburuḅọ. Juuapụ ologho ma warị ḅụ, ịrị Farisiiḅọ.

⁶ Wámịna daapụ tẹ́ghẹ̄ ḅara ma warị ịḅụ fị, a sọsị ma pa tọ́rụ́siarịmam. Ólóghó ma koko ḅụ saghị ḅo karakárá ibiamịẹnyẹ ma ḅụ a kpain fịnịm.

⁷ Kụ́ma a pa sọnyẹ kiẹbe nyẹ ma gonyẹ́ gonyẹ́, anịị a pa faá kịẹnyẹ Krais sịbị goo.

⁸ Anịma ngéréghaa; a nyẹ gonyẹ́ gonyẹ́ kiẹm káara bi faá ḅara, a mịma mịẹm ịḅụ opuma nyẹ́la nyẹ ma gosi, anịị Inyanaḅọ Krais Jizọs nimi ma, ọ sịbị goo a nyẹ gonyẹ́ gonyẹ́ gbiḅuumamam, nyẹ gonyẹ́ gonyẹ́ ịḅụ opu ịlọ́lị kpọ dighimam. Sị a nyẹ gonyẹ́ gonyẹ́ nyáná ḅo bẹ ḅara Krais bie.

⁹ A ḅo ịḅụ dọghụḅọ sáá ọ ḅụ, a mịnị i ḅárákúu karakárá ibiamịẹnyẹ nyanagha túminị́ ólóghó ma koko ḅụ nyánáarị nyẹ́maghaa. Mị́sa a nyáná karakárá ibiamịẹnyẹ anị n pịrịarịnyẹ ma tumḅọ minini Krais ḅụ ḅọ́rọ́, Tamuno ḅara saghị ḅoarị karakárá ibiamịẹnyẹ ma minini ḅụ anịị anị saghị ḅoarị nyẹ.

¹⁰ A dọghụnyẹ ḅẹẹ, a Krais nimii na pịghị fịị ḅụ ọ saghịma kụrọ ma nimi si pịghị diekiri nyáná ori fịị ḅụ, ḅoo pịghị ọ fịnị ḅara fịnị ori fịị ḅụ.

¹¹ Tọ́rụ́dighiarị ḅẹ́ irịsọ n fịị ḅụ i saghị pa dúma bie suabẹm.

Mangị Mú Sịbị Láma

¹² Ḅẹgha ḅẹ́ a saḅa ḅọ́rọ́mam anịgha ḅẹ́ a kpainfamamam, a pa ịnyọ suarị a ine daḅo bẹ ḅara Krais Jizọs goo i daḅo ọ ḅụ pịrịnyẹ ma.

¹³ Ịyẹa nángwọ́apụ a ịḅụ kiẹghaa ḅẹ a anị daḅomam; a mịẹarị gbẹ́rẹ́nyẹ, ḅẹ́ a ọḅụju fịnịnyẹ ma pa bieḅárámámam sị ịnyọsua sị tórúku fịnịnyẹ ma dua.

¹⁴ A ịnyọsua sịbịju fịnịnyẹ ma duam sị a ine dienyẹ ma daḅo bẹ ḅara, anịị Tamuno Krais Jizọs ḅụ ḅọ́rọ́ sịarị sị ma, anịị sobie duma ma.

¹⁵ Wamịnị kị́nị́mamgba tẹ́mẹ́ ḅụ sẹ́nịmaapụ mamgba mị gbẹ́rẹ́ duma ma nyánábẹm. Kụ́ma ḅọ́rọ́ ọmịna ḅụ jẹ́apụ jẹ́ kịrị duma nyáná nyáná. Tamuno mịma mịẹbẹm ọmịna ibima anị akanyaḅo.

¹⁶ Anị fịnị ḅara fịnị ḅara wa pa tórúku mú, pa wa duarị ólóghó ma dua mú mị́sa láa.

¹⁷ Ọ jẹ́apụ dua á nyẹ mịẹḅara mịẹ ịyẹa nángwọ́apụ. Ọmịnị n pa ilíghíma sua, wa mịẹ pa o die ḅara ma duarịapụ.

¹⁸ Mịma a parị tọgha sáá ḅụ anị dugho o pịrịmam a pịghị owu mingi pa sima anị dugho ọ pịrịarị: ḅẹ́ jẹ́apụ imi nna duma mịẹsị nnị Krais iruonaapụ soom ori fịị mgbẹsẹ sị́ ọgọnọ ḅọ́rọ́.

¹⁹ Kọ́rịfịnị anịị nna kunema, tegó nna kálá Tamuno anịị nna fúro, n pa ḅụ́gịrịrị bẹnyẹ anịị n pa bịbịkpọarị nyẹ, mị tuminikiri gbolomanyẹ gonyẹ́ gonyẹ́ anịị n sịbịbie kịẹ pịrịarịnyẹ.

²⁰ Wamịnị sobie amaapụ anịgosi wa wa ḅụ sẹ́ghịma wámịna dụaḅọ́rọ́ma ḅo Kị́nị́nyánáḅọ Jizọs Krais kúruarị sị o sobie saghị ḅoo.

²¹ Ori wámịna ịnyọ ḅụ faámaa ojumẹnị ma dimabẹm sị anị pa ori angaá ipine ojumẹnị ma kịka, sị pịghị nyẹ gonyẹ́ gonyẹ́ pa ori ḅẹrẹtọ ḅụ sua bẹ kụrọ ma pa fịrịnwangịị.