Filipaiapụ 2 - Ibani New Testament

Krais Ori Ḅụ́sitéréma Na Ori Opu Láa Ḅara

¹ Ọmịna duma Krais bie anị ḅọ́rọ́ kúkúbie kụ́rọ pa ọ pịrị pịrị, ori ḅẹlẹma anị ḅọ́rọ́ o biedịịnma diinma ọ Tẹ́mẹ́ ma na nwángị gboloma gboloma ọ pighi ibiamịẹnyẹ na lolomakúkúbie nyáná jụghọ jụghọ pịrị pịrị.

² Anịsáa mịẹsị ị́yẹ́ bieḅẹlẹ bii ọ gbẹ́rẹ́ tẹ́mẹ́bie nyáná ḅara, gbẹ́rẹ́ ḅẹlẹma, gbẹ́rẹ́nyẹ tẹ́mẹ́ ḅụ na pịghị ọ mịẹ dọghụnyẹ ḅụ.

³ Ọ bẹnyẹ bẹnyẹ mịẹma ọ nyánáḅọ ọ ḅụ pịrị bi sọ́nyẹ goo anịgha ọ pa álála ḅọ́rọ́ pa bịpịkpọ ḅẹnyẹ, kụ́ma ọ ḅụ sitéréma jụghọ jụghọ pịrị, jẹ́apụ pa nyẹ́sị ọmịna ḅụ nẹ́ngii.

⁴ Ọ pịghị jụghọ jụghọ ibi dọghụ, ọmịna ibi ngéréghaa.

⁵ Krais Jizọs nyáná mịẹ mịẹnyẹ ma anịị ọmịnị sọ nyáná bẹnyẹ.

⁶ Sámámgba ọ Tamuno fị́nị́ ḅara nyánam kụ́ma o kórómagha ḅẹ́ o kụrọ ḅara pa mịẹbẹm ori na Tamuno na gbasi.

⁷ Mịma nakaragha, ori ọ ḅụ pa gbẹ́rẹ́nyẹ sọ mịẹghaa, warị omoniḅọ ḅara pa ọ ḅụ wárii. O ḅoo tumḅọ sọọm pịghị tumḅọ ḅara ḅụ ḅoo.

⁸ Ọ ḅụ sitéréma nyánam, pịghị osigha nyáná fịị pịrị, ori osigha nyáná mgbẹsẹ sị́ ọgọnọ fịị ma pịrịm.

⁹ Anịgosi Tamuno ọ saghị sóghóloḅa angaá ma ḅụ wárim, warị ẹ́rẹ́ gonyẹ́ gonyẹ́ nẹ́ngị ẹ́rẹ́ pa ọ pịrịị.

¹⁰ Ḅẹẹ Jizọs ẹrẹ ma ḅụ ḅụ́ọ́sịbị gonyẹ́ gonyẹ́ ẹkpẹrẹkịbẹm sobie fịnịnyẹ gonyẹ́ gonyẹ́ tuminikiri fịnịnyẹ gonyẹ́ gonyẹ́ na pịghị súghúbie fịnịnyẹ gonyẹ́ gonyẹ́ nna ḅụ́ọ́sịbị pa bịghịị,

¹¹ kị́nị́mamgba warị dugho wásámabẹm ḅẹ́ Jizọs Krais ori anịị Kị́nị́nyánáḅọ ma, sị pa Tamuno Daḅọ ma boma.

Baá Bia Ḅára Pa Biaarị Tuminikiri

¹² Anịgosi, ịyẹa nángwọ́apụ, ọmịnị i bịpị pughuarị ḅara ma a ọ nana fịnị sáá, anị kọkọ ibi ḅẹẹ ọmịnị i bịpị púghú mị ḅara nẹ́ngịma mị́sa a ọ nana ófórigha sáá. Ọ pa ḅáláfá na oju sẹ́ghị pa ọmịna fịrịnwangị sị mịẹsị ọmịna dụaḅọ́rọ́ma káara.

¹³ Tegó Tamuno sámámgba ọmịna ḅụ fịrị nwángịarị sị ọmịnị ine ọmịna tẹ́mẹ́bie o dọghụnyẹ mịẹ.

¹⁴ Nyẹ gonyẹ́ gonyẹ́ mịẹ ọḅụju ẹ́gẹ́rẹ́gha pa na pịghị kị́nị́ na nụnaghaa.

¹⁵ Si fu ọ ḅụ labịgha ḅara pịghị fíafía Tamuno kpain awọ, n dama n dama na siiamịẹnyẹapụ tuminikiri bie ngaapụ. Nna bie o lolia sobie bia ḅara pa biabẹm.

¹⁶ Ọmịnị duma pịrị oku ma pa n pịrịarị sáá ọ ḅọ́rọ́ ọkọ mịẹmịẹ, a ḅara pụ́nụ́ nyẹ nyánábẹm a goo ọ pa bịpịkpọ ḅẹnyẹ Krais éné ma ḅụ tegó anị diebẹm ḅẹ́ a ịnyọ pa nwángị fịrị mamgba papa faghaa.

¹⁷ Didighigha nnị ị́yẹ́ ọmbịnyẹ́ pa ọmịna minini mịẹ pa Tamuno pịrị ágbáa ma ḅụ karị sárábẹm anị ḅọ́rọ́ ọkọfịnị fịnị. I bieḅẹlẹm ḅẹ a ọmịnị kị́nị́mamgba na bieḅẹlẹ.

¹⁸ Anị gbẹ́rẹ́ ḅara ma ọmịnị sọ bieḅẹlẹ si mịẹsị irịsọ ọ nana bieḅẹlẹ.

Timoti Na Epaforoditọs

¹⁹ Anị ḅọ́rọ́ Tamuno ḅụ ḅẹ́leḅẹ́lẹ a tọ́rụ́dighiarị ḅẹ́ a Timoti fịrịma ḅo ọ pịrịbẹm ḅọlọghaa sáá ḅụ si a ọ gbolomanyẹ náa anị i tẹ́mẹ́ miẹḅẹ́lẹ́mabẹm.

²⁰ Ori anịị i tẹ́mẹ́ nimiḅọ ọ pịghị opuma ọmịna ḅụ ibi dọ́ghụm.

²¹ Ọ́rụ́ḅọ ọ́rụ́ḅọ amịna ḅụ, amịna ḅụ dọghụarị gbẹ́rẹ́ḅọ sọ Jizọs Krais nyẹ doghughaa.

²² Ọmịnị kị́nị́mamgba nimim Timoti ọ ḅụ die maá ḅara ọ láanyẹ, ori na i nana, wa tụ́wọ na ọ daa na ḅara, wa fịrịnwangị gboloma maá ḅara ibi oku ma gosi.

²³ A tọ́rụ́dighiarị ḅẹ́ a ọ pa ọ fịrịmabẹm a nimi gbẹ́rẹ́kiri nyẹ i nana fịnị bẹ ḅara.

²⁴ A pịghị Tamuno ḅụ tẹ́mẹ́kụ́rọ nyánam ḅẹẹ irịsọ pịghị ine ọ fịnị angaá ḅobẹm ḅọlọgha sáá ḅụ.

²⁵ A sịbịbie kiẹarị ḅẹ́ a sima Epaforoditọs wámịna numboru owitụ́wọ pa ọ fịrịma ibima fịrịnwangimaaḅọ pịghị iju owusọ máaḅọ ori ma pịghị ọmịna oku muḅọ sọm o nyána i pịrịarị ḅárásua gosi.

²⁶ Anị opuma ọ pụghọ tárịarị ḅẹ́ ori ọmịnị kị́nị́mamgba arịị anị pịghị ọ ḅụ ḅáláḅálámam ọ náa sáá ḅẹ́ ori obii fịịfịị ḅára fịnịm.

²⁷ Karakárányẹ ḅụ ori obiim sị pịghị fịịdum kụ́ma Tamuno o dighi ḅụ njirim ori ngéréghaa, kụ́ma irịsọ, warị i dụaḅọ́rọ́ma tẹ́mẹ́sii nẹ́ngịma tẹ́mẹ́ si ḅụ.

²⁸ Anịgosi anị opuma i tarịarị ḅẹ́ a ọ pa fịrịma sị ọ́ jẹ́ pa bieḅẹlẹ bẹ ḅara ọmịnị ori árị sáá, anịsáa ị́yẹ́ tẹ́mẹ́sii ma ẹmẹ faabẹm.

²⁹ O bieḅẹlẹ ḅụ ọ datérémaa Kị́nị́nyánáḅọ ḅụ minini ḅo ḅara, osigha pa ọ fịnị ḅara fịnịapụ pịrị.

³⁰ Tegó ori ọrẹ duma balagha gosi kálányẹ kọọm o fịị Krais fịrị ma gosi, sị ori ine ọmịnị ine suaipịrịgha ḅárásua sua pịrịị.