Filipaiapụ 1 - Ibani New Testament

Pọl Gịẹ Filipaiapụ Pịrị Diri

¹ Irị Pọl na Timoti, Jizọs Krais omoniapụ ḅara anịị mị diri ma sághị ḅo nyẹ́. Nnị gịẹ pa Krais bie fịnị Tamuno túminị́ mamgba fịrịmam Filipai ḅụ fịnịapụ na pịghị sọsị ma sịbịdaapụ na pịghị ḅárásuaarịapụ mamgba:

² Wámịna Tamuno Daḅọ na pịghị Wányánáḅọ Jizọs Krais tọ́rụ́kụrụkụ́rụ́ na diin pa ọ pịrịị.

Pọl Tẹ́ghẹ̄ Ori Diri Ma Goo Bẹapụ Pịrị Tẹ́ghẹ̄

³ A ọ́ pa biekóróma sa gonyẹ́ gonyẹ́ a ịmịẹḅam pa i Tamuno ḅẹarị.

⁴ A pịghị tẹ́ghẹ́ ọ pịrị sa gonyẹ́ gonyẹ́, bieḅẹlẹ anịị a pa tẹ́ghẹ̄arị nyẹ.

⁵ Tegó ọ ḅárásua i pịrịmaá ḅara mịị ibi oku ma fịrị ḅụ, parị éné ma ḅụ akị ḅo mị́sa láa.

⁶ Anịgosi a ibima nimim ḅẹ́ Tamuno mịị ibifịrị ma saghị ḅọ ma ọmịna ḅụ, anị saghị bịpị mubẹm akị mú ori anị mịẹ kárámá sa láa Jizọs Krais éné ma ḅụ.

⁷ Sámámgba ọmịnị i tẹ́mẹ́bie imii anịma gosi anị ḅụ́gbẹm ḅẹ́ a kóróma nyáná ọ pịrị mị́sa a mịẹarị ḅara. Ḅẹẹ ọmịnị mamgba diekiri nyánam Tamuno nyáná i pịrị tọ́rụ́kụrụkụ́rụ́ ma ḅụ, mị́sa a ịkóli bie fịnị sa na pịghị a ịkóli bie ófórigha sa sị pịghị sẹ́kụrọ anị ḅụ pịghị anị mịẹ anị kune nyánáa.

⁸ Tamuno anịị ị́yẹ́ onyésẹ̄ḅọ ḅẹẹ a karakárányẹ ma dughoarị ḅẹ́ tẹ́mẹ́bie a nyáná ọ pịrị opu ḅẹlẹma ma Krais Jizọs ọḅụ gbọrụ tẹ́mẹ́bie anịị anị saghị ḅo nyẹ́ẹ́.

⁹ Tẹ́ghẹ̄ anịị a tẹ́ghẹ̄arị nyẹ ḅẹ́ ọmịna ḅẹlẹma sẹ́nị anịị anị sẹ́nịbẹnyẹ, tụ́ma níminyẹ ḅụ na pịghị kpain akanyaḅo ḅụ.

¹⁰ Sị ọmịnị ine ibiḅaa nyẹ ma sẹlẹakị bẹ ḅara. Anịsáa, anịị ọmịnị ọmịna ḅụ dụaḅọ́rọ́ma bẹnyẹ, ịlọ́lị ḅụ na pịghị bịpị ḅụ laagha ḅụ, Krais éné ma ḅụ.

¹¹ Anịsáa Jizọs Krais ngéré ine pághámaḅoarị karakárá ibiamịẹnyẹ ma anịị ọmịna duma bie bii fụ́fụ́ ḅẹnyẹ, mịma ọ́ pa Tamuno boma pịghị o túminị́.

Krais Bie Ngaa

¹² A biim ḅẹ́ o nimi ịyẹa nángwọ́apụ ḅẹ́ ịḅụ pághá nyẹ ma ibima ḅárásuamam sị mịẹsị ibi oku ma toruku muu.

¹³ Anịgosi ámányánáḅọ warị ma kúruarịapụ mamgba na pịghị isiapụ mamgba nimim ḅẹ́ a ikólibie imim ịrị Krais omoniḅọ gosi.

¹⁴ Ị́yẹ́ ịkóli bie fịnị ma, pịghị tọgha mininiapụ ma mịẹsị nnị tẹ́mẹ́kụrọ nyáná Kị́nị́nyánáḅọ ḅụ, si ine ibi oku ma dugho wásáma kụrọkúkúbie ḅụ na pịghị ḅáláfagha ḅụ.

¹⁵ Karakárányẹ ḅẹ́ jẹ́apụ Krais ibi oku ma dugho wásámaarị tọ́rụ́akụ na kamkoro ḅụ kụ́ma jẹ́apụ pịghị ibi kúkúbie ḅụ.

¹⁶ Mịnaapụ ma anị mịẹm ḅẹlẹma ḅụ, tegó nnị nimim ḅẹ́ Tamuno i pa ibi oku ma kọọ ọpịrịḅọ mịẹm.

¹⁷ Isiapụ ma mị Krais dugho wásámagha, Karakárá tẹ́mẹ́ ḅụ, kụ́ma nna ḅụbie nyánáḅọ bẹ sọ́nyẹ goo; nnị sịịm ḅẹ́ nnị opuma ḅẹ́rẹ́ dighi i pịrịbẹm a pa ikóliwarị ma bie fịnịarị sáá.

¹⁸ Anị mịẹ nyẹ́ ofori kụ́ma anị ibieḅẹ́lẹ́mam ḅẹ́ asọ kịrịkị́rị́ ḅụ, n Krais dugho wásámam, ḅọ́rọ́ anị ibi kúkúbie ḅụ anị dugho wásáma anịgha sii kúkúbie ḅụ anị dugho wásáma o anị ibieḅẹ́lẹ́mam. A pa anị ḅụ bieḅẹ́lẹ́bẹm.

¹⁹ Tegó a nimim ḅẹ́ ọmịna tẹ́ghẹ̄ ḅụ ḅọ́rọ́ na pịghị Jizọs Krais Tẹ́mẹ́ ḅụ ḅoarị ḅárásua ḅụ, nnị i dua pághámaḅobẹm.

²⁰ Tẹ́mẹ́bie a binyẹ na pịghị a tọ́rụ́ dighinyẹ anị ḅẹ́ ị́yẹ́ fịrị ma ḅụ a ọḅụ daagha, kụ́ma sámámgba ḅụ, pịghị mị́sa ma ḅụ a opuma tẹ́mẹ́kụ́rọ nyánábẹm sị gboro gboro kuu akuoo Krais pịrịbẹm, a duma a pịghị fịị o.

²¹ Ḅẹ́ mị́sa ịrị a duma duma, a duma Krais pịrịm a fị́ị́ fịị, anị sọnyẹ mịẹm.

²² A pa dumafịnị fịnị, mịma dughoarị ḅẹ́ a sọnyẹ sọ fịrị nwángịbẹm, anịgosi a nimigha mị́sa a sẹ́lẹ́akị bẹnyẹ.

²³ Amaḅara i nụ́nụ́arị ẹ́rẹ́ḅara i nụ́nụ́arị a opuma biiarị ḅẹ́ a mị duma ma wáriso sị mú Krais na fịnị, mịma anị kọkọ ibiḅaa;

²⁴ Kụ́ma ọmịna sịbị goo anị kọkọ ibiḅaa ḅẹ́ a dumafịnịm.

²⁵ Mịma a ibima anị nimim anịgo a nimim ḅẹ a fịnịbẹm, a pa ọmịnị kị́nị́mamgba na fịnịbẹm si ọ tórúku mú bẹ ḅara pịghị bieḅẹlẹ minini ma ḅụ.

²⁶ Si a ḅo jẹ́ pa ọ nana fịnị bẹ sáá, ọmịnị ọ́ goo i pa bịpịkpọ bẹnyẹ nyánábẹm ọmịna duma bie Krais Jizọs ḅụ.

²⁷ Mịẹnyẹ gonyẹ́ gonyẹ́ ḅụ árị ḅẹ́ ị́yẹ́ duma Krais ibi oku ma na kuram sị ḅọ́rọ́ a ine anịgha a pịghị inegha sị mú ọmịnị arịị a naábẹm ḅẹ ọ kụrọma sẹ́fịnịarị. Gbẹ́rẹ́ tẹ́mẹ́ ḅụ, na pịghị gbẹ́rẹ́nyẹ pụghọ tarị ḅụ, ọmịnị kị́nị́mamgba o sọ gbólomaarị ibi oku ma minini gosi.

²⁸ Ị́yẹ́ iruonaapụ dighi ḅáláfama, sámámgba kúkúbie kụrọ nyáná, mịma diebẹm ḅẹ ḅẹ́rẹ́ nna ḅara siim ḅẹ ọmịna ḅara ḅẹ́rẹ́ ibim, Tamuno anị sọ́ḅá ma pa ọ pịrịarịḅọ.

²⁹ Nnị mị tọ́rụ́kụrụkụ́rụ́ ma pa i pịrịmam ọ ḅụ ngéré minini ngéréghaa kụ́ma pịghị tọ́rụ́siarị ọ pịrị.

³⁰ Mị́sa ọmịnị ine i nana sọ́bẹm ọ́mụ́ ma bie, mị parị sa ọmịnị ị́yẹ́ árị sị a soarị gbẹ́rẹ́ ọ́mụ́ ma ọ pịghị náaḅara anịị a pa nana sọarịḅọ ma.