Fịlẹmọn 1 - Ibani New Testament

Pọl Gịẹ Fịlẹmọn Fịrịma Diri

¹ Mịị diri ma irị Pọl ḅara anịị anị sághị ḅoo nyẹ, irị ikólinaḅọ Krais Jizọs fịrị ma gosi. Timoti wámịna mị́naḅọ owitụ́wọ minini ma ḅụ i nana mị diri ma pa Fịlẹmọn wámịna nángwọ pịghị fịrịnwangị ḅụ gbẹ́rẹ́ḅọ fịrịmaarị.

² Mịị diri ma anị pịghị ḅó wámịna mị́naḅọ ẹ́rẹ́ḅọtụ́wọ Áfiya na pịghị wámịna ibi oku ma ọ́mụ́gbi gbẹ́rẹ́ḅọ Akipọs na pịghị Fịlẹmọn wárịbie kobirikobiri sọsị ma pịrịm.

³ Wámịna Tamuno Daḅọ na wámịna Nyánáḅọ Jizọs Krais ọrẹ ḅẹlẹma na diin pá ọ pịrịị.

Fịlẹmọn Ḅẹlẹma Na Ori Míníni

⁴ Mị́naḅọ owitụ́wọ Fịlẹmọn, a tẹ́ghẹ̄ sa gonyẹ́ gonyẹ́ a i goarị sị ịmịẹḅam pa i Tamuno ḅẹarị,

⁵ a náa sị, ị́ nyána Tamuno túminị́ mamgba pịrị ḅẹlẹma gosi, na pịghị ị́yẹ́ míníni wámịna Nyánáḅọ Jizọs ḅụ.

⁶ Á tẹ́ghẹ̄arị ḅẹ́ wamịnị na ọ́ nana nyána mịẹgbólóma kobiri mininiapụ ḅara póghóló akanyaḅo pághámaḅobẹm wámịna duma bie, wa nyána karịiḅi mamgbá wa ḅọ Krais na gbẹ́rẹ́nyẹ mịẹ sa.

⁷ Ị́yẹ́ ḅẹlẹma wámịna mị́naḅọ owitụ́wọ, opu bieḅẹlẹ na ịwọ ịnyọ pá ịḅụ suamam ị Tamuno túminị́ tẹ́mẹ́ mịẹ ḅẹ́lẹ́mamam.

Ḅara Bi Nyẹ Onisimọs Sịbị Go

⁸ Mịma go ị́yẹ́ Krais mị́naḅọ ḅárá, a íné ḅáláfaghaa ḅara í ḅẹbẹm si ị́ mịẹna ibinyẹ ma mịẹ.

⁹ Kụ́ma, a nyáná ị pịrị ḅẹlẹma go, tẹ́ghẹ̄ anị a ị tẹ́ghẹ̄arị nyẹ. Á mịma mịẹarị irị Pọl mḅẹ́sọ, olom owitụ́wọ pịghị mị́sa ma ḅụ Jizọs Krais ikólinaḅọ.

¹⁰ Á ị tẹ́ghẹ́arị Onisimọs sịbị ọgọ́nọ́, mị́sa tụwọ sọọ i pị́rị́máaḅọ Krais bie, a pa ịkóliwárị ma bie fịnị sa, a ḅo Krais bie daa sọọ ọ pịrịmam.

¹¹ Gbẹ́rẹ́sa biri, ọ sọnyẹ sọ ị pịrịgha, kụ́ma mị́sa ọ sọ́nyẹ sọ ị́ pịrịm, pịghị sọ́nyẹ sọ i pịrịị.

¹² A ọ fịrịma ḅọ ị pịrịarị, ori ịḅụ nyẹ́lam.

¹³ A biibẹm ḅẹ́ a ọ pa mịnga warị, a ikólibie fịnịarị sa ibi oku ma go, si ori ị nwángị i pịrịarị fịrị ma nwángị.

¹⁴ A bẹnyẹ bẹnyẹ mịẹbiegha ḅọ́rọ́ ị minigha, kụ́ma a biibẹm ḅẹ́ ị́ ịtemeḅie pa anị mịẹ anịḅọ kụrọ tọ́rụ́ nyẹ diighibieghaa ḅara.

¹⁵ Didigha, mịma go anịị nnị ị́ ḅarabie Onisimọs fófóoma nyẹ mị kálásatụwọ ma ḅụ, sị ị sima ó nyánáakị mú gbámásó la.

¹⁶ Mịnị ómóniḅọ ḅaraghá, kụ́ma ómóniḅọ nẹngịḅọ, a ḅẹlẹma mị́naḅọ owitụ́wọ Krais bie. Ori ịḅụ nyẹ́lam, kụ́ma ọ pịghị ịḅụ nyẹlaḅam ómóniḅọ ḅara, na pịghị mị́naḅọ owitụ́wọ Kị́nị́nyánáḅọ ma bie.

¹⁷ Anị ẹrẹ́sị, ị ḅọ́rọ́ ị́yẹ́ ákị ị́ jẹa fịrịwangiḅọ ḅara, pịghị anị ḅara ma pa ọ si akị ị ị́yẹ́ ákị bẹ ḅara.

¹⁸ Ọ ḅọ́rọ́ ị́ mịẹsimama nḅẹḅẹ́, anịgha ọ pịghị ị ḅara sa ọlọ́lọ́ pa ị́ sịbị sẹ.

¹⁹ Mịnga nyẹ ma, a ị́ ḅara na gịẹbẹm, ḅẹ́ irị Pọl ị́ gbẹ́bẹm. Á pa i biekórómanaibịgha ḅẹ́ ịḅụgḅọrụ ọ ị́ ḅárabie ị́rị ọlọ sáá.

²⁰ Anịgo ị mị́naḅọ owitụ́wọ, mịị ibi ma pa i mịẹ Kị́nị́nyánáḅọ gosi. Ị́ mị́naḅọ owitụ́wọ ḅara Krais bie, mịẹsị i tẹmẹ bieḅẹlẹ.

²¹ Á mị diri ma gịẹárị ḅara, a tẹ́mẹ́kụ́rọ nyánam ḅẹ́ ị a ị ḅara bii nyẹ ị mịẹbẹm, ị pịghị mịẹ a ḅiiḅara nẹ́ngimabẹm.

²² Anị gbẹ́rẹ́ ḅara ma ḅụ, múno yọ tẹ́lẹ́ma í pịrịị, a mininim ḅẹẹ, Tamuno ị sịbị ọ tẹ́ghẹ̄ tẹghẹ̄ mamgba naábẹm sị sima ị́ pa ọ pịrị.

Kunema Kule

²³ Epafras i jẹa ikólinaḅọ Jizọs Krais fịrị ma go ḅẹm a obifama.

²⁴ Mak, na Aristakọs, na Demas na pịghị Luk í jẹa fịrịnwangịapụ ḅẹm a o bii.

²⁵ Kị́nị́nyánáḅọ Jizọs Krais tọ́rụ́kụrụkụ́rụ́ ọmịnị na fịnịị.