Ẹ́fịsọsapụ 6 - Ibani New Testament

Awọamaapụ Nyingiapụ Na Daapụ Na Ngaa Bẹ Ḅára

¹ Awọamaapụ anị ọmịna kiri, mininiapụ ḅara ḅẹ́ ọmịnị ọmịna nyingiapụ na daapụ bịpị pughu, tegó mịma anịị karakárá sị ọ miẹnaibi nyẹ.

² <> anịị parị ologho ma pịghị gbẹ́nyẹ nyánányẹ:

³ <>

⁴ Daapụ na nyingiapụ na, o si ḅara pa ọmịna awọ na ngaáma nnị mịẹbẹnyẹ sị n bie ákụ nyáná ọ pịrị. Anịmanakaragha, kóróma bịpị ḅụ na Kị́nị́nyánáḅọ ma dienyẹ ḅụ n siḅe pághámaḅo.

Ómóniapụ Nna Nyánáapụ Na Ngaa Bẹ Ḅara

⁵ Ómóniapụ ọ ḅáláfa na osigha pa tuminikiri ọmịna nyánáapụ dughonyẹ mịẹ, pịghị fíafía tẹ́mẹ́ pa anị mịẹ, sọ́ḅọ́rọ́ ọ fịrịnwangị Krais pịrịarị.

⁶ Ọ mịma mịẹma nnị tọ́rụ́ pa o dighiarị sa ngéré, tegó ọ dọ́ghụm ḅẹ́ nnị ibi ẹrẹ pa ọ sị, kụ́ma ọ mịnị ọ tẹ́mẹ́ gbọrụ pa Tamuno dọghụnyẹ mịẹ, Krais ómóniapụ ḅara.

⁷ Ómóniapụ ḅara, ọ bieḅẹlẹ pa ọmịna fịrị nwángịị, so ḅọ́rọ́ ọ fịrịnwangị Kị́nị́nyánáḅọ pịrịarị, túminị́ ngéréghaa,

⁸ tegó o nimim ḅẹ́ Kị́nị́nyánáḅọ gbẹ́nyẹ pa ọ́rụ́ḅọ ọ́rụ́ḅọ gbẹ́bẹm, ómóniḅọ anịgha furotụ́wọ, n ḅọ nwángị ibifịrị ḅụ.

⁹ Omoni nyánáapụ anị gbẹ́rẹ́ ḅara ma pa ọmịna ómóniapụ na ngaa, mịnị nna ẹ́rẹ́ma ma. Biekóróma ḅẹ́ ịrị na ị́yẹ́ ómóniapụ ọ gbẹ́rẹ́ Nyánáḅọ nyanam sobie ḅẹ́rẹ́kọ kị́nị́mamgba sịbị ḅẹ́rẹ́kọ bẹḅọ tọ́rụ́kụ́ghaa pa.

Tamuno Ọ́mụ́gbinyẹ Mamgba

¹⁰ Kunema ḅụ, ọ kụrọ sẹ Kị́nị́nyánáḅọ ḅụ, na pịghị ọ ḅụ fịnị opu ịnyọ ḅụ.

¹¹ Tamuno pa ọ pịrị ọ́mụ́gbinyẹ mamgba sua kárámá ọmịnị ine sẹ kụ́rọ bẹ ḅara ẹ́kpẹ́dua ori epele ma ti bẹ sáá.

¹² Tegó wámịna ọ́mụ́gbi ma, wa tuminikiriapụ na anị gbighaa, kụ́ma, sobie ju fịnịị sitẹ́mẹ́, táarịapụ, kụrọnyanáapụ na pịghị kánákáná tuminikiri ma bie fịnị opu kụrọ nyáná sitẹ́mẹ́.

¹³ Anịgosi Tamuno ọ́mụ́gbinyẹ mamgba sua mị́sa! Anịsáa, sii éné ma ḅo sáá ọmịnị ine iruonaḅọ ma ọ́mụ́ dasemabẹm ọ pịghị ọ́mụ́ ma gbifama sáá ọmịnị ine kụrọsẹbẹm.

¹⁴ Anịgosi ọ tẹ́lẹ́ma fịnịị, karakárá ẹ́gẹ́rẹ́ pa ọmịna kundu kpọọ dii mịẹ, karakárá ibiamịẹnyẹ pa ọmịna kúkúbie gbẹ́ẹ̄ ẹ́fẹ́rẹ́ mịẹ,

¹⁵ ọmịna sua agbaa ḅara ọ tẹ́lẹ́ma sị diin akuoarị ibi oku ma dugho wásáma bẹ ḅara.

¹⁶ Sámámgba minini pa ágbọ mịẹ, anị ḅara ma ọmịnị ine ẹ́kpẹ́dua ma tẹ́ ẹbẹlẹ kọrịfịnị ma bimabẹm.

¹⁷ Dụaḅọ́rọ́ma daakị sịbị ḅụ sua ọ́mụ́gbi suu ḅara. Pịghịị Tamuno ẹ́gẹ́rẹ́ ma akị ḅẹ́ mịị Tẹ́mẹ́ ma pa i pịrị áláápụ́-ágidi.

¹⁸ Tẹ́mẹ́ ḅụ tẹ́ghẹ̄ kọọ sámámgba tọ́rụ́kịrịkị́rị́ tẹ́ghẹ̄ na nyẹ́bi tẹ́ghẹ̄ kọọ. Mịma dighi tẹ́mẹ́bie, sámámgba tẹ́lẹ́ma fịnị tẹ́ghẹ̄ tọ́ntọ́apụ mamgba pịrị.

¹⁹ Pịghị tẹ́ghẹ̄ i pịrị ḅẹ́ a bịpị findi sa gonyẹ́ gonyẹ́ ori oku pa i pịrịbẹm sị a ḅáláfaghaa ḅara ḅụ, a ine ibi oku ma ḅụ ḅọghunyẹ dugho wásáma bẹ ḅara.

²⁰ Mịị ibi oku ma gosi, ịrị sẹ oku muḅọ kụ́ma mị́sa ikóliwarịbie a imim. Ọ tẹ́ghẹ̄ i pịrị ḅẹ́ a ine ḅáláfagha ḅara pa ibi oku ma dugho wásámabẹm anị ḅụ́gbẹ́ ḅara.

Kunema Sịbịpị

²¹ Tisikọs, wámịna ibi numboru pịghị sẹ́kụrọ Kị́nị́nyánáḅọ fịrịnwangịḅọ nyẹ gonyẹ́ gonyẹ́ dugho ọ pịrịbẹm o nimi bẹ ḅara a fịnị ḅará na a nwángị kọọarị ḅara.

²² Mịma goo anịị a go ọ fịrịma ḅo ọ pịrịarịnyẹ, o dugho ọ pịrịbẹ ḅara wamịnị kị́nị́mamgba nwángị kọọarị ḅara sị ọ pịghị ọ tẹ́mẹ́bie mịẹ kụ́rọ́ma bẹ ḅara.

²³ Diin na ḅẹlẹma na minini Tamuno Daḅọ na Wányánáḅọ Jizọs Krais ḅara ḅo nyẹ fịnị wa jẹa mininiapụ ma pịrị.

²⁴ Tamuno tọ́rụ́kụrụkụ́rụ́ fịnị kunema nyanagha ḅẹlẹma pa wámịna Nyáná ḅo Jizọs Krais ḅẹlẹmaapụ pịrị.