Ẹ́fịsọsapụ 4 - Ibani New Testament

Bịpị Ogbo Soo Krais Bie

¹ Anịgosi a ọ tẹ́ghẹ̄m ịrị mị́sa ikólinaḅọ a fịrịnwangị Kị́nị́nyánáḅọ ma pịrịarị goo ḅẹ́, ọ duma kọọ Tamuno bi ḅara ḅẹẹ o duma kọọ, ori ọ sị sáá.

² Sámámgba ḅụ sitéréma, ḅụ diin tẹ́mẹ́ nyáná, inema nyáná, ọmịnị inema nyáná jụghọ jụghọ pịrị ḅẹlẹma ḅụ.

³ Arịị ḅẹ́ Tẹ́mẹ́ ma pịrịarị ḅụ pa gbẹ́rẹ́nyẹ mịẹma ọmịnị anị kokowarịm ọmịnị ọlọ gboloma ma diin ḅụ.

⁴ Gbẹ́rẹ́ oju imi, gbẹ́rẹ́ Tẹ́mẹ́ na pịghị gbẹ́rẹ́ tọ́rụ́ dighinyẹ Tamuno go ọ sị nyẹ.

⁵ Gbẹ́rẹ́ Kị́nị́nyánáḅọ, gbẹ́rẹ́ minini, gbẹ́rẹ́ mingi sára;

⁶ gbẹ́rẹ́ Tamuno pịghị túminị́ mamgba Daa, ori anịị kị́nị́mamgba Nyánáḅọ kị́nị́mamgba pa fịrịnwangịarị, pịghị kị́nị́mamgba bie imi.

⁷ Wámịna ḅụ gbẹ́rẹ́ḅọ gbẹ́rẹ́ḅọ ḅụ́gbẹ́ dienyẹ nyanaḅomam Krais ḅárabie, Krais anị diearị ḅara.

⁸ Tọ́ndiri ma dugho ḅara; <>

⁹ Mị́sa, <> anị tẹ́ dugho? Anị dughoarị ḅẹẹ parị o téré koro tuminikiri póghóló yọ ḅom.

¹⁰ Téré koro gbẹ́rẹ́ḅọ ma anị pịghị iwóo sóghóloḅa so ma nẹ́ngị so ma sọọ ḅọ ọ ḅụgbọrụ angaá mamgba bi bẹ ḅara.

¹¹ Ori anị <> jẹ́apụ ori nnị tọọm ḅẹ́ nnị nfịrịmaapụ sọ; jẹ́apụ ikiakoroapụ, jẹ́apụ ibi oku ma dugho wásámáarịapụ jẹ́apụ Tamuno kubiri ogbo sịbịdaapụ na pịghị nyẹ́dieapụ.

¹² O mịma mịẹm pa Tamuno túminị́ tẹ́lẹ́ma warị pa Krais asọ duarịapụ ma fịrị pịrị, sị nnị ibima Krais oju ma, anịị Tamuno kubiri ogbo ma nama tẹ́lẹ́ma bẹ ḅara,

¹³ sị wamịnị mamgba ḅo bịpị pa ogbo sua gbẹ́rẹ́ minini ḅụ, pịghị bịpị pa ogbo sua Tamuno Tụwọ ma nimi ḅụ, wamịnị sẹ́nịmaapụ ḅara pa nyẹ mịẹbẹm, sẹnị sị mú Krais láa ḅara la.

¹⁴ Wamịnị awọamaapụ ḅara pa nyẹ mịẹbịgha, oḅori pa kị́nị́ sịarịapụ dienyẹ ma duaarịapụ, dinọngụ nyẹ dighi ḅara pa dighiarị nyẹ na fọ́rụ nyẹ dighi ikelekelearị ḅara, pa dighi ikelekelearị nyẹ. Mịná túminị́ ma jẹ́apụ túlúma irima nyẹ bie suam n tẹ́mẹ́bie págháḅo aka na egberi na ḅụ.

¹⁵ Anịmanakaragha wa tụ́manyẹ ma dugho ḅẹlẹma ḅụ, wamịnị ine sẹ́nị sị mú Krais ḅụ káara, ori ma anịị sịbịdaḅọ ma.

¹⁶ O sughubie anịị ojumẹnị mpara mamgba ḅụ fịnịnyẹ ḅọ́rọ́ ḅo gbẹ́rẹ́nyẹ mịẹnyẹ, oju gbọrụ isa mamgba oju gbọrụ ọlọ kobirim. Anịgo gbẹ́rẹ́ ọrụ anị ngá fịrị nwángịarị sáá anị nwángị na ibiḅara, oju gbọrụ mamgba ḅẹlẹma ḅụ nna ḅụ tákubiri sẹnịm.

Ịwọ Duma Krais Bie

¹⁷ Kị́nị́nyánáḅọ ẹrẹ ḅụ, a mịma dugho ọ pịrịm pịghị anị ḅụ sẹ ḅẹ́ ọmịnị Tamuno nímighaapụ ḅara pa duma kọọma, amịna kóróma nyẹ́ḅụ oforighaapụ.

¹⁸ Nna kúkúbie kánákáná ḅụ imi, nnị diekiri nyanagha Tamuno pịrịarị duma ma ḅụ, n nimi gbẹ́rẹ́nyẹ sọ ofori, n pịghị kụ́rọ sịbịbie nyanam.

¹⁹ Bugịrịrị kálányẹ sọ nna tọ́rụ ofori, nnị sẹfị duma kọọarị, nnị tọ́rụ́ kirikiri ịlọlịnyẹ mịẹarị ḅụ ọlọgha ḅara pa.

²⁰ Mịma anị Krais ḅụ ọ dawọḅo nyẹ́ghaa.

²¹ Ọmịnị o gbolomanyẹ naam, ori asọduaapụ ḅara, nnị Krais ḅụ fịnị karakárá pa o diem.

²² Anịgosi ọmịnị ọmịna olom ḅụ ma wáriso, mịẹsị ọ duma kọọarị ḅara pa duma kọọ nyẹ. Mịị olom ḅụ ma guluguluma nyẹ, anịị anị oḅori pa kị́nị́ sị pụghọ tarị nyẹ ma.

²³ Nnị ọmịna tẹ́mẹ́bie na ọmịna kóróma mịẹbẹm sị ọ gbẹ́rẹ́sa ịwọ nyẹ so,

²⁴ ọmịnị ịwọ ḅụ ma suabẹm n Tamuno kịkama sị tẹ́mẹ́nyẹ, anị ḅụ diearịnyẹ karakárá duma ḅụ ibiamịẹnyẹ ḅụ na pịghị tọ́ntọ́ ḅụ.

²⁵ Anịgosi, ọmịnị iruo kọma! Ọ́rụ́ḅọ ọ́rụ́ḅọ tụ́manyẹ ma dugho amịna jẹ́ mininiḅọ pịrị tegó wamịnị mamgba, wamịnị gbẹ́rẹ́apụ Krais oju ma ḅụ.

²⁶ Ḅọ́rọ́ ḅẹ́ ị́ igani igani, minima sị igani ma i suma siinyẹ bie suu, pịghị minima anị i nana fịnị énédima.

²⁷ Asọ pa ẹ́kpẹ́dua ma pịrịma.

²⁸ Furuarịḅọ fịnịfịnị, n ḅo mịnị fúrú ma, kụ́ma amịna ḅara pa ibifịrị nwángị pa amịna ḅụ pịrị pịghị ine ḅárásua igonyiapụ pịrị.

²⁹ Nyẹ pa kịnịlama bẹ ẹ́gẹ́rẹ́, kọọma, kụ́ma ḅárásua bẹ ẹ́gẹ́rẹ, túminị́ mịẹsị n sẹnịbẹ nyẹ, si túminị́ bii nyẹ pa nnị pịrịarịnyẹ, si ị́yẹ́ dughonyẹ ibinyẹ pa anị naapụ mịẹbẹ ḅara.

³⁰ Tamuno Tọ́ntọ́ Tẹ́mẹ́ ma biesima ma, Tẹ́mẹ́ ma anịị Tamuno pa ọ ḅụ ilíghíma suanyẹ ḅẹẹ ọmịnị onyẹẹ, ọmịna sẹ́pịrịarị nyẹ ḅẹ́ éné ma ḅobẹm Tamuno ọ dụapághámaḅo bẹnyẹ.

³¹ Tẹ́mẹ́ ákụ mamgba na, owi tẹ́mẹ́ na igani gonyẹ́ gonyẹ́ ḅụ ọmịnị ọmịna ḅụ fófóoma anị ḅụ, ọmịnị ilúghú wirinumo wirima, ọ pịghị jụghọ jụghọ tarịgha duma gonyẹ́ gonyẹ́ wáriso.

³² Anịmanakaragha ọmịnị ibitẹ́mẹ́ na lolomakúkúbie nyáná jụghọ jụghọ pịrị, o sii wáriso jụghọ jụghọ pịrị, Tamuno Krais ḅụ ḅọ́rọ́ sii wáriso ọ pịrị ḅara.