Ẹ́fịsọsapụ 3 - Ibani New Testament

Pọl Nwángị Fịrị Juughaapụ Ma Ogbobie

¹ Mịma gosi, irị Pọl, Jizọs Krais ikólinaḅọ ọmịnị Juughaapụ ma sịbị goo.

² Ọ naamam ḅẹ́ Tamuno ori tọ́rụ́kụrụkụ́rụ́ ḅụ mịị fịrị ma pa i pịrịmam ọmịna sịbị gosi.

³ Tamuno ọ tọ warị sị ḅọghunyẹ ma diefindi i pịrịm, pịghị mịẹsị a anị nimi a pịghị kálá ḅara pa parị anị gịẹ ọ fịrịmamam.

⁴ Ḅẹ́ ḅọ́rọ́ ọmịnị a gịẹnyẹ ma goo, o ḅo akanyaḅobẹm Krais gboloma sị a akanyaḅomaá ḅọghunyẹ.

⁵ Tamuno anị diefindi áyásaapụ pịrịghaa kụma mị́sa ọ Tẹ́mẹ́ ḅụ ḅọ́rọ́ anị diefindi ori tọ́ntọ́ nfịrịmaapụ na ikiakoroapụ pịrịmam.

⁶ Mịị ḅọghunyẹ ma dughoarị ḅẹ́ ibi oku ma ḅụ ḅọ́rọ́ Juughaapụ na Juuapụ na diekiri nyánam Tamuno karịibima ḅụ, nnị gbẹ́rẹ́apụ oju ma ḅụ pịghị diekiri nyánam, Tamuno Krais Jizọs ḅụ ḅọ́rọ́ minini nyẹ ma ḅụ.

⁷ A ḅo fịrịnwangịḅọ sọọ mị ibi oku ma pịrịm Tamuno pa die i pịrị tọ́rụ́kụrụkụ́rụ́ gosi, ọ pa i pịrịnyẹ ori kụ́rọ nwángịarị fịrị ḅụ ḅọ́rọ́.

⁸ Tamuno tọ́ntọ́apụ mamgba ḅụ irịị ịrụ́ḅam, anịsọ Tamuno pa mị opuma nyẹ́la fịrị ma pa i pịrịm ḅẹ́ a muu dugho wásáma Juughaapụ ma pịrị Krais ḅụ fịnị sị tumḅọ ine dọghụpágháma ḅofámábịghaa ngọ,

⁹ pịghị mịẹsị túminị́ mamgba árị, Tamuno ọ tọ́ọ ḅọ́rọ́ma sị ḅọghunyẹ ma anị kiriakị. Tamuno ori nyẹ gonyẹ́ gonyẹ́ tẹ́mẹ́ḅọ ori ḅọghunyẹ ma pa túminị́ ḅọghumam ḅọ́rọ́maa ḅụọ ḅụọ ḅụ.

¹⁰ Tamuno go nwọ mịẹnyẹ anịị ḅẹ́ mị́sa Tamuno kubiri ogbo ma ḅụ ḅọ́rọ́ anị o Tamuno kịrịkị́rị́ níminyẹ mamgba pa so ọgọnọ sịbịdaaapụ mamgba na ḅẹ́rẹ́tọapụ mamgba diebẹnyẹ.

¹¹ Tamuno mịma mịẹm ọ tọ́ọ warị ḅara, o pịghị mịẹsị anị wámịna Nyánáḅọ Krais Jizọs ḅụ ḅo kiriakịnyẹ.

¹² Krais na gbẹ́rẹ́ḅụ ḅụ fịnị na wámịna minini ọ ḅụ, wamịnị ine Tamuno tórúku ḅobẹm ḅáláfaghaa ḅụ, pịghị biegbana ḅụ.

¹³ Anịgo a ọ tẹ́ghẹ̄m ḅẹ́ anị ọ biesima ma, a árị ọ pịrịarị tọ́rụ́siarị ma, anịị ọmịna sịbị gosi.

Pọl Tẹ́ghẹ̄ Ẹ́fịsọsapụ Pịrị Tẹ́ghẹ̄

¹⁴ Anịgosi a ẹkpẹrẹkị Daḅọ ma pịrịm,

¹⁵ ori anịị so ma na kiri ma bie fịnị warifuro mamgba karakárá ẹrẹ pa pịrịḅọ.

¹⁶ A tẹ́ghẹ̄arị ḅẹ́ Tamuno opu ngọ nyánáḅọ ori ipine ḅụ, kụ́rọ pa ọ pịrị, ọ Tẹ́mẹ́ ḅụ ḅọ́rọ́ ọmịnị ịnyọsua bẹ ḅara ọmịna tẹ́mẹ́bie.

¹⁷ A pịghị tẹ́ghẹ̄arị ḅẹ́ minini ḅụ ḅọ́rọ́ Krais ọmịna tẹ́mẹ́bie ngábẹm sámámgba. A pa tẹ́ghẹ̄arị ḅẹ́ ọmiẹ bẹnyẹ gonyẹ́ gonyẹ́ ọ ḅẹlẹma ḅụ ḅọ́rọ́ anị mịẹ,

¹⁸ ọmịnị na Tamuno tọ́ntọ́apụ mamgba ine akanyaḅo bẹ ḅara Krais ḅẹlẹma kpọma findi láa ḅara, anị nangwọ láa ḅara, anị sóghólo láa ḅara na anị póghóló láa ḅara.

¹⁹ Ọ ḅo Krais ḅẹlẹma nimii, anị opuma dụḅam, ọmịnị ine anị akanyaḅo famabịghaa sị Tamuno ma fịnị ḅara ọmịna duma bie sọ bi sị pịghị ọsụ sara.

²⁰ Mị́sa ipine fịnị Tamuno pịrị, ori opu kụ́rọ wámịna bie fịrịnwangịarị nyẹ, ori ine mịẹ gbánāma bẹḅọ wamịnị ine bii bẹnyẹ anịgha kóróma bẹnyẹ mịẹ bẹḅọ

²¹ ipine fịnị Tamuno pịrị, Tamuno kubiri ogbo ma bie pịghị Jizọs Krais ḅụ akị mú ḅẹsá ḅẹsá láa! Anị ọkọ fịnịị.