Ẹ́fịsọsapụ 2 - Ibani New Testament

Tamuno Ịwọ Duma Pa Wa Pịrịmam Krais Bie

¹ Ḅọ́rọ́maa sáá ọmịnị anịị tẹ́mẹ́ ḅụ fịịmaapụ ọmịna bịpị osigha na ọmịna sii gosi.

² Anịsáa ma ọ tuminikiri sii asọ nwángịm, ọmịnị ọgọnọ bie fịnị kụ́rọ sitẹ́mẹ́ táarịḅọ ma bịpị pughum, mị́sa ḅẹrẹtọ mini Tamuno osighaapụ ma pịrịarị Tẹ́mẹ́.

³ Wamịnị mamgba nnị kị́kám, sị wámịna duma kọọ ojumẹnị tarịarịnyẹ ḅụ na pighi wámịna kóróma na wámịna ojumẹnị dọghụnyẹ mịẹ. Wámịna siiamịẹnyẹ ojumẹnị ma fịnị ḅara ma, n tọ ḅọ́rọ́mam ḅẹ́ Tamuno igani wa láabẹm anịị anị pịghị fịnị kị́nị́mamgba pịrị ḅara.

⁴ Kụ́ma Tamuno lolomakúkúbie dụḅam ọ pịghị opuma ḅẹlẹma nyáná wa pịrịm,

⁵ wa fịịfama sáá wámịna siiamịẹnyẹ gosi ọ duma pa wa pịrịm ọ Krais saghịma sáá fịị ḅụ. Tamuno tọ́rụ́kụrụkụ́rụ́ ḅụ ngéré anịị wa mịị ḅọ́rọ́ma ma nyánáḅo nyẹẹ.

⁶ Tamuno wamịnị na Krais saghịmam sị pịghị mịẹsị wamịnị na ọ nana kpọrọfịnị sị taa sobie angaá Krais Jizọs bie.

⁷ Ọ mịma mịẹm pa die ḅẹẹ ḅoarị tuminikiri ma ori ọ nyáná wa pịrị tọ́rụ́kụrụkụ́rụ́ opuma dụḅa láa ḅara ọ pa wa die ḅẹlẹma Krais Jizọs ḅụ ḅọ́rọ́.

⁸ Tegó Tamuno tọ́rụ́kụrụkụ́rụ́ gosi anịị ọ ḅọ́rọ́ma nyána nyẹ minini ḅụ ḅọ́rọ́ mịma Tamuno ḅara anịị anị sághị ḅo nyẹ ọmịna ḅárabiegha anịị Tamuno dienyẹ,

⁹ ịrị ị́yẹ́ ịnyọ pa nwángị fịrị ḅụ ofori tumḅọ anịgo pa bịpịkpọ ḅẹnyẹ.

¹⁰ Wamịnị anịị Tamuno ḅárafịrị, Krais Jizọs bie n tẹ́mẹ́apụ ibifịrị gosi, Tamuno tẹ́lẹ́ma maá nyẹ ḅẹ́ wamịnị anị mịẹ.

Krais Ḅụ Mininiapụ Nnị Gbẹ́rẹ́ Túminị́

¹¹ Ọmịnị Juughaapụ nnị o yii sa, o biekóróma ọ fịnị ḅara, ḅọ́rọ́maa sáá, Juuapụ ma <> pa ọ sim, warị tọ́ngọ̄ pẹ́lẹ́apụ pa nna ḅụ siiapụ (mịma anị túminị́ nna oju pa mịẹarịnyẹ).

¹² Anịsáa ma ḅụ, nnị o fófóomam Krais ḅụ, ọmịnị igoniapụ, pịghị Tamuno sẹ́lẹ́akị Izirẹlịapụ ma na oforii, ọmịnị ọḅọọ ma ḅụ dienyẹ nyanagha, Tamuno mini ori a túminị́ pịrịnyẹ ḅụ gbananyẹ, o mịị tuminikiri bie imim, ọ Tamuno nimigha, ọ pịghị tọ́rụ́ dighinyẹ nyanagha.

¹³ Kuma mị́sa, ọmịnị Krais Jizọs na gbẹ́rẹ́nyẹ mịẹ ḅụ ọmịnị parị ḅọlọ angaá fịnịapụ nnị ọmịnị akuoo kikiamamam Krais ọmbịnyẹ́ ḅụ ḅọ́rọ́.

¹⁴ Krais ọ ḅụgbọrụ diin akuoo wa pịrịmam Juuapụ na Juughaapụ pa gbẹ́rẹ́nyẹ mịẹ. Ori ọrẹ oju pa Juuapụ na Juughaapụ ma fófóoma onu ma kaasim.

¹⁵ O Juuapụ ologho ma kúnémam na pịghị anị dighi túminị́ mịẹbẹnyẹ na n mịẹbịgha nyẹ, sị ori mmẹẹ́ túminị́ ọrụ ma ḅụ ọ gbẹ́rẹ́ ịwọ túminị́ mịẹ ọ nana gbẹ́rẹ́nyẹ mịẹapụ, mị ḅara ma diin mịẹ.

¹⁶ Ori fịị ma mgbẹsẹ sị́ ọgọnọ Krais nna ogboku fịnị tarịgha ma kaasim, mgbẹsẹ sị́ ma ḅụ ḅọ́rọ́ ori mmẹẹ́ túminị́ ọrụ ma pa gbẹ́rẹ́ oju mịẹm sị pịghịma nna akuoo Tamuno pịrị.

¹⁷ Krais warị ḅoo sị diin ibi oku ma dugho wásáma kị́nị́mamgba pịrịm ọmịnị Juughaapụ ḅọlọanga fịnịapụ Tamuno fịnị angaá na Juuapụ ọ nana kikiapụ.

¹⁸ Krais ḅụ ḅọ́rọ́ wamịnị kị́nị́mamgba, Juu na Juughaapụ ine Daḅọ ma fịnị angaá ḅobẹm, gbẹ́rẹ́ Tọ́ntọ́ Tẹ́mẹ́ ma ḅụ.

¹⁹ Anịgosi ọmịnị Juughaapụ ọmịnị mị́nị́ biaapụ na igoniapụghaa. Wamịnị kị́nị́mamgba furoawọ dighimam, ọmịnị na Tamuno tọ́ntọ́apụ mamgba, ọmịnị mị́sa Tamuno wárịapụ.

²⁰ Ọmịnị sọ nnị wárị nama ḅara pa ọ nama pághámaḅom nfịrịmaapụ na ikiakoroapụ sughu isé ma ọgọnọ, ọkọlọbị ma ọlọ dapịrị ma anị Krais Jizọs ọ ḅụgbọrụ.

²¹ Ori ma anịị wárị gbọrụ ma ọlọ gbolomaḅọ, warị mịẹsị anị dụḅa mú sị ḅo tọ́ntọ́ Tamunowarị sọọ Kị́nị́nyánáḅọ ma bie.

²² Ori ḅụ ọmịnị Juughaapụ so, na jẹ́apụ na; nnị ọ nama gbólomaarị gbẹ́rẹ́ angaá, Tamuno ọ Tẹ́mẹ́ ḅụ ngá angaá.