2 Timoti 3 - Ibani New Testament

Tamuno Nimigha Kunema Sáá Ma Ḅụ

¹ O nimiḅo ḅẹ́ kunema sa biri ma nyẹ ibima ḅụdáa sáá ḅobẹm.

² Túminị́ nna ḅụ ngéré ḅẹ́lẹ́mabẹm, igbii ḅẹlẹma, bịpịkpọ, opuamịẹnyẹ mịẹ, kị́nị́ wiri, nyingiapụ na daapụ na osigha, nyẹ tọ́rụ́sọgha, tọ́ntọ́ ḅụ ofori,

³ ḅẹlẹma bie ofori, siiḅụ́ḅárasipịrịdigha, kị́nị́ dughosima, ine ḅụ ọlọgha pa, nyẹ́ sima, ibinyẹ ḅẹlẹmagha,

⁴ aka ḅara pa túminị́ túlúma ḅẹ́rẹ́ ḅụ suu, sịbịbie kiẹgha pa nyẹ mịẹ, nọmụ ḅara pa opuamịẹnyẹ mịẹ, fị na ḅuu na ḅẹlẹma tụ́ma Tamuno ḅẹlẹma nakaragha.

⁵ Tamuno kịkama duma nyáná kụ́ma ori kụ́rọ ma pighi. Nnị na ḅẹnyẹ ḅẹnyẹ nyáná ma.

⁶ Nna ḅụ jẹ́apụ epele ḅara pa túminị́ wárị sọsọm sị nna epele dienyẹ ma pa ḅẹrẹtọ amịna minini kụrọgha ẹ́rẹ́maawọ ma pụ́nụ́ma. Mịná ẹ́rẹ́ámáapụ ma anịị nna sii n tẹ́mẹ́bie ḅẹ́rẹ́si pa n pịrịapụ ofori ofori sị nyẹ pịghị pụghọ tarịarịapụ.

⁷ Mịná ẹ́rẹ́ámáapụ ma sámámgba nyẹ dawọarị kụ́ma ine ḅoo karakárá ma nimiḅogha.

⁸ Janesi na Jamberesi, Mosis na nụ́ná ḅara ma anịị mịnaapụ ma karakáráma nụná ḅara, nna tẹ́mẹ́bie mịnị karakárányẹ kórómagha, mịnaapụ anị minini ma gboloma ḅara ḅụ nnị n sịghịmam.

⁹ Mịnaapụ ma n ḅọlọanga labịgha, tegó kị́nị́mamgba árịbẹm nna oḅori sọ láa ḅara. Mịma anịị Jems na Jamberesi ḅụ pághá nyẹ.

Pọl Dugho Timoti Pịrị Kunema Nyẹ

¹⁰ Ịrị kọkọ ị́yẹ́ dienyẹ mamgba nimi, ị́yẹ́ duma ḅara, a goo a mịẹarịnyẹ mịẹnyẹ, ị́yẹ́ minini, ị́yẹ́ inéma, ị́yẹ́ ḅẹlẹma, ị́yẹ́ ngịrịma.

¹¹ I pịghị nimim nnị ị́yẹ́ mbasị ḅara na ị́yẹ́ tọ́rụ́siarị. I kọkọ ịḅụ pághá nyẹ mamgba nimi Antịọkụ, Aikoniyọm ḅụ na Listira ḅụ a inema nyáná pịrị si n pa ị́yẹ́ mbasị opu mbasị! Kụ́ma Kị́nị́nyánáḅọ ma i dụapághámaḅo famam anị ḅarabie.

¹² Tụ́manyẹ ḅụ Tamuno kịka duma kọọdoghuḅo gonyẹ́ gonyẹ́ Krais Jizọs bie nnị nḅọ pa tọ́rụ́siarịmabẹm.

¹³ Kụ́ma sị a túminị́ na oḅori pa kịnịsịapụ gbẹ́rẹ́ sii ḅụ akị muu siḅaá angaá nyẹ ḅụ sọọbẹm, oḅori pa jẹ́apụ sịarị jẹ́apụ pịghị oḅori pa nna ḅụ sịarị.

¹⁴ Kụ́ma ịrị nnị pa ị die karakárá ma ị pịghị ibima minini nyẹ ma ọlọọ tórúku muu. I kọkọ níminyẹ pa i die nyẹ́dieapụ.

¹⁵ Ịrị pịghị biekóróma ḅẹ sághị ị́ ịrụ sáá éné éné i Tọ́ndiri ma nimimam ine níminyẹ pa ị pịrịbẹnyẹ si ị daa muu dụaḅọ́rọ́ma nyáná Krais Jizọs ḅụ fịnị minini ḅụ ḅọ́rọ́.

¹⁶ Tọ́ndiri ma gonyẹ́ gonyẹ́ Tamuno anịị sịbịbie pa pịrịnyẹ anị pịghị sọnyẹ ḅụ sọm karakárányẹ die ḅụụ, igani irima nyẹ pịrị, irima nyẹ datụ́ghụ́ma, pịghị pa bịpị kóróma pịrị pa karakárá ibiamịẹnyẹ duma kọọ.

¹⁷ Mịị ḅárá ma fịrịnwangị Tamuno pịrịarịḅọ gonyẹ́ gonyẹ́ nyẹ́dáwọ ḅụ karakárámabẹm sị ori ine ibifịrị gonyẹ́ gonyẹ́ nwángị bẹ ḅara.