2 Timoti 2 - Ibani New Testament

Krais Jizọs Ibi Ọ́mụ́gbiḅọ

¹ Mị́sa, irị i tụwọ, sẹ kụ́rọọ́ wa Krais Jizọs ḅụ nyáná tọ́rụ́kụrụkụ́rụ́ ḅụ ḅọ́rọ́.

² I bịpị ị náa sị a die dienyẹ ma tọgha tọgha onyésẹapụ tórúku anị sághị pa tẹ́mẹ́ gbánā na ibiapụ ḅárabie sua, pịghị ine anị pa jẹ́apụ die bẹapụ.

³ Krais Jizọs ibi ọmụ́gbiiḅọ ḅara, wamịnị na wamịnị árịarị tọ́rụ́siarị ma arịị.

⁴ Gbẹ́rẹ́ ọ́mụ́gbii fịrị nwangịarịḅọ ofori amịna ḅụ pa papa túminị́ mịẹmịẹnyẹ ḅụ susuḅọ tegó o bibẹm ḅẹ́ ori ọrẹ ọ́mụ́gbi sịbịdaḅọ tẹ́mẹ́ miẹḅẹ́lẹ́ma.

⁵ Mangị ti ma ḅụ, mangịarịḅọ ma, n kóróma warị ngọ ma nyánáḅobịgha n ḅọ́rọ́ ólóghó bịpị ma dua mangịgha.

⁶ Anị fiam ḅẹ́ kụrọfịrị ma nwángịmáa dụadipiḅọ ma parị duasughu ma ḅụ sọnyẹ fịị.

⁷ Sịbịbie kịẹ a dugho ị pịrịarịnyẹ ma pịrị tegó Kị́nị́nyánáḅọ ma mịẹbẹm ị mịnanyẹ mamgba akanyaḅo.

⁸ Jizọs Krais pa biekóróma, Deviti furo tụwọ, n fịị ḅụ saghịma ḅo nnị anị die ḅara a dugho wásáma ibi oku ma ḅụ.

⁹ A ibi oku ma dugho wásámam gosi a tọ́rụ́siarịm n pịghị ịkóli pa i ḅara suam sọ́ḅọ́rọ́ ịrị ologho kaa ḅo, kụ́ma Tamuno ẹ́gẹ́rẹ́ ma ịkóli anị ḅụ ofori.

¹⁰ Anị ẹrẹ́sị a ngịrịma nyáná nyẹ gonyẹ́ gonyẹ́ pịrịm Tamuno sẹlẹakịapụ ma sịbị gosi, nnị sọ Krais Jizọs ḅara ḅoo dụaḅọ́rọ́ma ma nyáná bẹ ḅara Gbámásóḅọ ma akuoarị nyẹ.

¹¹ Mịị anị tẹ́mẹ́ gbánā na ibi dughonyẹ: <

¹² Wa pa ngịrịma nyáná nyáná, wamịnị na ori na taábẹm. Wa ḅọ́rọ́ o pighi pighi, ori sọ wa pighibẹm.

¹³ Wa ḅọ́rọ́ sẹ kụrọgha, ori o sẹ́kụ́rọm samamgba, tegó ori ine ọ ḅụ pighibịgha.>>

Tamuno Ḅára Pụnụ Pịrị Fịrịnwangịḅọ

¹⁴ Pa mịnanyẹ ma pa nna biekóróma; Tamuno tórúku ibiḅara pa n birinụ́nụ́ ḅẹ́ nnị ẹ́gẹ́rẹ́ goo owusọma. Anị gbẹ́rẹ́ ibinyẹ sọ mịẹgha, kụ́ma anị púghúarịapụ ma gulugulumaarị.

¹⁵ Ị́yẹ́ ịnyọ láa ḅara mịẹsị árị ḅẹ́ Tamuno ḅara pụ́nụ́ ị pịrịm, ibifịrị nwángịḅọ ḅara ḅụgịrịrịgha fịrịnwangịḅọ amịna fịrị ḅụ, kuma ibiḅara pa dua muu Tamuno karakáráma láa bẹ oku ma diearị.

¹⁶ Ịḅụ sii dárímaá Tamuno osigha na oḅori ẹ́gẹ́rẹ ḅụ, túminị́ dee ḅọlọanga mumu nyẹ Tamuno fịnị angaá.

¹⁷ Ọkọfịnị dienyẹ anịị tọ́rụ́ na gbẹ́gha ịnọ fịnị ḅara anịị anị fịnị ḅara ojumẹnị ma pẹ́arị nyẹ. Mịnanyẹ ma dieapụ nna ḅụ mmẹapụ anịị Himeniyọs na Filetọs.

¹⁸ Nnị dua muu karakárá ma láa bẹ asọ ma warisomam dughoarị ḅẹ́ fịị ḅụ sághị ma kiriakịmam. Anị ḅara ma n mịẹm sị jẹ́apụ minini saghị jighe jighe.

¹⁹ Tamuno kụrọ sughu isé ma ḅẹnyẹ ḅẹnyẹ anị jighe jighemabịgha; anị ọgọnọ anịị n mị ẹ́gẹ́rẹ́ ma gịẹnyẹ: <>

²⁰ Opu wárịbie tọ́rụ́kịrịkị́rị́ ẹ́fẹ́rẹ na bọlị anịị fịnịnyẹ: jẹa nyẹ pị́naḅala jẹ́anyẹ odoḅala anịị n pa anị tẹ́mẹ́nyẹ, jẹa nyẹ sị anịị n pa anị tẹ́mẹ́nyẹ, jẹa nyẹ urọ átụ́ma anịị nnị pa anị tẹ́mẹ́nyẹ; jẹ́anyẹ álálị ḅụ anịị nnị anị pa fịrị ḅụ súúarị nyẹ, jẹ́anyẹ papa sáá anịị nnị anị pa fịrị ḅụ suuarị nyẹ.

²¹ Ọ ḅụ sịrịpághámaḅo ḅọ mịnanyẹ mamgbabie, anịḅọ ma nnị nḅọ pa sosighima fịrị nwángịbẹm, tegó anịḅọ ma nḅọ fịrị pa nyẹ́sim pịghị sọnyẹ sọọ nḅọ Nyánáḅọ pịrịm, pịghị tẹ́lẹ́ma ibifịrị gonyẹ́ gonyẹ́ kúruarị.

²² Ọmịnị ọ ḅụ si ásáawọ na ẹ́rẹ́maawọ ojumẹnị tarịarịnyẹ ma ḅụ, sị ịnyọ pa karakárá ibiamịẹnyẹ dua, minini, ḅẹlẹma na diin na. Ị mịma mịẹbẹm ịrị na tẹ́mẹ́ fíafía ḅụ Kị́nị́nyánáḅọ ma sịarịapụ mamgba ḅẹ́ ọ ḅárásua n pịrị.

²³ Ịḅụ si akị oḅoriapụ na nyẹ́nimighaapụ nụná nyẹ ḅụ; i kọkọ nimi ḅẹ anị kunema anịị kam sọọ.

²⁴ Kị́nị́nyánáḅọ ma fịrịnwangịḅọ ḅara ị kam sọọbịgha. I ibiamịẹnyẹ nyáná kị́nị́mamgba pịrị, ibii pịghị ngịrịma nyáná nyẹ́dieḅọ,

²⁵ diin ḅara pa i nana nụnaapụ ma daatụ́ghụ́ma, tegó Tamuno ine mịẹbẹm si nnị asọ árị sị sii ḅụ pịghị sị karakáráma nimii.

²⁶ Anịsáa nnị ḅoo nna ḅụ nyánáḅobẹm sị n ḅụ si akị ẹ́kpẹ́dua tuú dia ma ḅụ, n pa ikólibie suamaaḅọ ḅẹ nnị ọ tọ́ọ nyẹ mịẹ.