2 Timoti 1 - Ibani New Testament

Sịbịpị Na Tẹ́ghẹ̄ Timoti Sịbị

¹ Ịrị Pọl, Krais Jizọs fịrịmaḅọ, Tamuno tọ warị ḅara ḅụ, ḅẹ́ a ḅo Tamuno mini wa pịrị duma wa Krais Jizọs ḅụ minini sáá dugho wásámáa.

² A gịẹ pa ị́ pịrịm Timoti ị́yẹ́ ibi tụwọ: Tamuno Daḅọ na Krais Jizọs wámịna Nyánáḅọ tọ́rụ́kụrụkụ́rụ́, lolomakúkúbie na diin pa ị pịrịị.

Pọl Ịmịẹḅam Pa Tamuno Ḅẹm Timoti Na Ọ Wárị Gosi

³ A ịmịẹḅam pa Tamuno ḅẹ́m a fíafía tẹ́mẹ́bie pa fịrịnwangị pịrịarịḅọ ị́yẹ́ tádọ́apụ ọ tẹ́ghẹ̄ ḅara. A ịmịẹḅam pa Tamuno ḅẹ́m dii na ḅá na ḅụ a ọ pa biekórómáarị ḅara ị́yẹ́ tẹ́ghẹ̄ ḅụ.

⁴ A ị́yẹ́ owu mingi pa biekóróma sáá, anị opuma i pụghọ tárịm ḅẹ́ a ị́yẹ́ arịị, sị a bieḅẹlẹ bẹ ḅara.

⁵ A ị́yẹ́ karakárá minini ma pa biekórómam, ị́yẹ́ opu nyingi Loisi bie parị fịnịnyẹ na i nyingi Unisi nyáná minini ḅara. A mininim ḅẹẹ mịma so ịḅụ imim.

⁶ Mị ẹrẹ́sị a pa ị biekórómáarị ḅẹ́ Tamuno pa ị pịrị dienyẹ ma a ḅara pa ị sịbị gbánā sa, mịẹsị anị duma.

⁷ Ḅẹ́ Tamuno pa wa pịrịmaá Tẹ́mẹ́ ma minigha wa ḅáláfaapụ sọọ; tụ́ma ọ Tẹ́mẹ́ ma ịnyọ pa wa ḅụ suam, ḅẹlẹma na pịghị ḅụ ọlọọ.

⁸ Anịgosi, ḅụ́gịrịrịma sị wámịna Nyánáḅọ ma gbolomanyẹ dugho págháma; anịgha i dighi ḅụ́gịrịrị ịrị ikólinaḅọ Krais sịbị goo. Anịmanakaragha ị́yẹ́ diekiri ákịị si tọ́rụ́siarị ibi oku ma pịrị Tamuno ịnyọ pa ịḅụ sua lama ḅara ḅụ.

⁹ O wa duaḅọ́rọ́mam pịghị wa sị ḅẹ́ wa ḅoo ori a túminị́ sọọ, wa mịẹmáa nyẹ gosigha, kụ́ma ori mịẹ dọghụnyẹ gosi na ori tọ́rụ́kụrụkụ́rụ́. O mịị tọ́rụ́kụrụkụ́rụ́ ma pa wa pịrịm tuminikiri na saghịgha sa éné éné Krais Jizọs sịbị ḅụ ḅọ́rọ́.

¹⁰ Kụ́ma mị́sa nnị anị diepágháma wa pịrịmam wámịna Dụaḅọ́rọ́maḅọ Krais Jizọs ḅoo ḅụ ḅọ́rọ́. O fịị kụrọ ma kunemamam sị ibi oku ma ḅụ ḅọ́rọ́ duma gbámásó diepághámamam.

¹¹ Tamuno nfịrịmaḅọ na nyẹ́dieḅọ pa i tọọmam ḅẹ́ a ibi oku ma dugho wásámáa.

¹² Mịma goo anịị a go mịná tọ́rụ́siarị ma árịarị nyẹ kụ́ma a pa tẹ́mẹ́kụ́rọ nyanam, tegó a nimim a tẹ́mẹ́ pa ḅụ gbánáḅọ a pịghị nimim ḅẹ́ ọ pa i ḅárabie sua warị nyẹ ma ori ine anị koko warịbẹm akị muu anị ene ma láa.

¹³ A pa ị die karakárá ẹ́gẹ́rẹ́ ma ibima anị ọlọọ kụ́rọ́ma sị anị ịrị arị sị duabe nyẹ sọọ, pịghị Krais Jizọs ḅụ wa nyána minini na wa nyáná ḅẹlẹma ḅụ fịnịị.

¹⁴ Wa bie fịnị Tọ́ntọ́ Tẹ́mẹ́ ma kụrọ ḅụ ḅọ́rọ́ nnị pa ị ḅárabie sua ibi nyẹ ma ibima anị wárii.

¹⁵ I kọ́kọ́ nimi ḅẹ́ Esiya ḅẹrẹtọ yọ ma ḅụ fịnịapụ mamgba ikoromasomam, Figelọs na Hemojenesi sọ.

¹⁶ Tamuno lolomakúkúbie nyána Onesiforọs wárị pịrị, tegó tọgha sáá ori i tẹ́mẹ́ mịẹ saghịmam, anị pịghị ọ ḅụgịrịrịmagha ḅẹ́ a ikólibie imii.

¹⁷ Kụ́ma o ḅoo Rom láa gbẹ́rẹ́kirikiri ọ saghị i dọghụ wárii o ḅoo ị́yẹ́ arịm.

¹⁸ Kị́nị́nyánáḅọ ma lolomakúkúbie nyáná ọ pịrị anị éné ma ḅụ! I kọkọ pịghị ibima nimi ọ mịẹ i pịrịnyẹ láa ḅara Ẹ́fịsọs ḅụ.