2 Tẹsalonaikaapụ 3 - Ibani New Testament

Tẹ́ghẹ̄ Wa Pịrịị

¹ Kunemaá, I Daa awọ, ọ tẹ́ghẹ̄ wa pịrị, ḅẹẹ Kị́nị́nyánáḅọ oku ma álála kaá wásámabẹm, sị nnị pịghị kuu ḅụ ẹ́gẹ́rẹ́ ma daakị ọmịnị sọ anị daakị ḅara.

² Pịghị tẹ́ghẹ̄ ḅẹẹ Tamuno wa dụaḅọ́rọ́maa silálá si túminị́ ḅarabie, tegó túminị́ mamgba oku ma mininigha.

³ Kụ́ma Kị́nị́nyánáḅọ ma ọmịnị ọ ḅụ tẹ́mẹ́ gbánā ọ pịghị ọ ḅụ ịnyọ suabẹm, sị pịghị o koko sii tumḅọ ma ḅarabie.

⁴ Kị́nị́nyánáḅọ mịẹm sị wamịnị ine tẹ́mẹ́kụ́rọ nyáná ọ fịnị angaá; wa pịghị mininim ḅẹẹ ọmịnị ibiḅara mịẹarị ọ pịghị wa dugho ọ pịrịnyẹ ma mịẹ tórúku muubẹm.

⁵ Kị́nị́nyánáḅọ o daa mú sị ọmịnị dụḅaḅá ḅara pa Tamuno ḅẹlẹma akanyaḅo na pịghị Krais pịrịarị ngịrịma.

Tumḅọ Nwángị Bẹ Fịrị

⁶ Wámịna Daa awọ, wa Wámịna Nyánáḅọ Jizọs Krais ẹrẹ ḅụ kụ́rọ́ma dugho ọ pịrịarị ḅẹẹ ọ ḅụ fóofóo ma mini nna ḅara pa fịrịnwangị dọghụghaapụ fịnị angaá na pịghị wa pa n pịrị againma ma duaghaapụ fịnị angaá.

⁷ Ọmịna ḅụgbọrụ kọkọ ibima nimi ḅẹẹ wa mịẹnyẹ anịị ọmịnị sọ mịẹbẹnyẹ. Wa itilagha wamịnị ọ nana fịnị sáá.

⁸ Wa gbẹ́rẹ́ḅọ sọ ḅárásua daákịgha anị gbẹ́nyẹ gbẹẹgha pa, tụ́ma wa tọ́rụ́siarị fịrị nwángịm, wa dii na ḅá ḅụ fịrị nwángịgha sị ọmịnị wámịna ḅụ igbii ngumabịgha ḅara.

⁹ Wa mịma mịẹm, ḅẹgha ḅẹẹ wa kụrọ nyanagha, ọmịna ḅara ḅárásua bi, wa mịma mịẹm sị ọmịnị sọ árị sị wa dua wa mịẹḅara mịẹ.

¹⁰ Wamịnị ọ́ nana fịnị sáá, wa kọkọ dugho ọ pịrị pịrị, ḅẹẹ, <>.

¹¹ Wa mịma dughom tegó wa naam ḅẹ́ jẹ́apụ ọmịna bie imii, itila duma kọọarịapụ, n mịẹ dọghụnyẹ ngéré anịị tọ́rụ́ pa jẹ́apụ mịẹmịẹnyẹ ḅụ suu si nna anganyẹ wáriso.

¹² Kị́nị́nyánáḅọ Jizọs Krais ẹrẹ ḅụ wa kụ́rọ́ma dugho túminị́ ma pịrịm pịghị n birinụ́nụ́ ḅẹẹ n gbụ́nụ́nụ́ duma kọọ pịghị fịrịnwangị sị pa nna ḅụ siḅe.

¹³ Kụ́ma ọmịnị i Daa awọ, ịnyọ ọ ḅụ fama ibifịrị nwángị ḅụ.

¹⁴ Jẹ́apụ ine imibẹm anị ngá mini wa pa fịrịmaarị oku ma osiibịghaapụ. Ọmịnị ọ ḅụ ẹbị anị túminị́ ma fịnị angaá ọ pịghị nnị na mịẹgbólóma nyẹ nyánáma, sị n ḅụ́gịrịrị ḅẹ́ ḅara.

¹⁵ Kụ́ma iruonaapụ ḅara pa nna akịma, kụ́ma n birinụ́nụ́ ọmịna Daa awọ ḅara.

Kunema Sịbịpị

¹⁶ Wámịna Nyánáḅọ ori ọ ḅụgbọrụ ọ ḅarabie diin saghị ḅoḅọ diin pa ọ pịrị sámámgba ḅụ asọ kirikiri ḅụ. Kị́nị́nyánáḅọ ọmịnị kị́nị́mamgba na fịnịị.

¹⁷ Ịrị Pọl i ḅara pa mịị sịbịpị ma gịẹm. Mịị a ḅara pụnụ a gịẹ diri gonyẹ́ gonyẹ́ pịrị pịrị ḅara; mịị a gịẹ gịẹ ḅara.

¹⁸ Wámịna Nyánáḅọ Jizọs Krais tọ́rụ́kụrụkụ́rụ́ ọmịnị kị́nị́mamgba na fịnịị.