2 Tẹsalonaikaapụ 2 - Ibani New Testament

Ólóghó Ḅụ Ofori Owitụ́wọ

¹ Wámịna Nyáná ḅo Jizọs Krais ḅoo ma gbolomanyẹ, wa pịghị kobiri gboloma sị ori na fịnị bẹ ḅara: a ọ tẹ́ghẹ̄m, i Daa awọ,

² ḅẹẹ o minima sị nnị ḅụdaghaa ḅara pa ọmịna sịbịbie galagala ma ọmịna kóróma ḅụ, anịgha igani dughoarịapụ ḅẹ́ Kị́nị́nyánáḅọ éné ma láamam. Didigha n sim ḅẹ́ wa mịị nyẹ ma dughom wamịnị ikiakoroarị sáá, anịgha dugho wásáma, anịgha ḅẹ́ wamịnị anị gịẹ kórómam diri mpara ḅụ.

³ Mịnị ma gbẹ́rẹ́ḅọ sọ gbẹ́rẹ́ asọ ḅụ sọ oḅori pa ọ sị. Ḅẹẹ anị éné ma ḅobịgha ákị mú opu kụrọsịbịbie éné ma láa, túminị́ saghị Tamuno na kuraghaa duma kọọ bẹ sáá, anịsáa Sisịbịbieḅọ ma sọ ọ ḅụ diepághámabẹm. Tamuno tọ́pẹ́lẹ́mam ḅẹ́ ọ mịị tumḅọ ma gúlúgúlúmabẹm ẹ́kpẹ́duaama.

⁴ Túminị́ pa tamuno mịẹsị susi pịrịarịnyẹ gonyẹ́ gonyẹ́ o sa nyáná pịrịbịgha mịị tumḅọ oḅu árịbẹm ḅẹ́ ọ dụḅa n nẹ́ngifámam, ọ pịghị Tamunowarị ma sọ́bẹm kpọrọfịnị sị dugho págháma ḅẹẹ ori anị Tamuno.

⁵ O biekórómagha? A kọkọ mị mamgba dugho ọ pịrị a pa ọ nana mịnga fịnị sáá.

⁶ Kụ́ma nyẹ imi anị kiki si nịị anịgo na kiri akịịghaa nyẹ mị́sa ọ pịghị anị nimim. Anị sáá ma láa sáá, Sịbịbie ḅọ ma ọ ḅụ diebẹm.

⁷ Mị́sa tọghaapụ Tamuno ẹ́gẹ́rẹ ma na kuragha duma kọọarị, kụ́ma kiriakị dọghụnyẹ ma kiriakịbịgha n nyẹ́ma kiki ḅo ma sịghare asọogbo.

⁸ Anịsáa, Siisịbịbie ḅọ ma ọ ḅụ diebẹm, kụ́ma Wányánáḅọ Jizọs Krais ḅoo sáá. Ori ọ bịpịbie págháḅo fọ́rụ pa ḅáa bẹḅọ pịghị ọrẹ ḅụ́gbérépuma baá pa o guluguluma.

⁹ Siisịbịbieḅo ma ẹ́kpẹ́dua kụ́rọ pa ḅobẹm sị tọ́rụ́kịrịkị́rị́ epele ḅụ́gbérépuma fịrị mamgba nwángịbẹm.

¹⁰ Pịghị tọ́rụ́kịrịkị́rị́ aka pa papa fịịfaa bẹapụ ti. Nnị papa fịị faabẹm tegó nnị karakárá ma ḅẹlẹmagha pịghị anị daakórómagha sị dụaḅọ́rọ́ma nyáná.

¹¹ Anịgosi Tamuno irima kụrọ ma fịrịma pághámam si anị nna ḅụ fịrịnwangị si nnị epele nyẹ minini bẹ ḅara.

¹² Tamuno mịma mịẹm sị náa karakáráma mininighaapụ, kụ́ma siiamịẹnyẹ ḅẹlẹma, Tamuno ḅẹ́rẹ́si pa n pịrịbẹm.

Nnị Ọ Sẹlẹakị Pa Dụaḅọ́rọ́ma Pịrịm

¹³ Wa ịmịẹḅam pa Tamuno ḅẹẹbẹm wámịna Daa awọ, ọmịna sịbị goo, ọmịnị Kị́nị́nyánáḅọ ḅẹlẹmaapụ. Tọ́ntọ́ Tẹ́mẹ́ ma kụ́rọ ḅụ, ḅọ́rọ́ Tamuno parị sáá ma ḅụ ọ sẹ́lẹ́akịm ḅẹẹ ọ dụaḅọ́rọ́ma nyána, ọmịna minini ḅụ ḅọ́rọ́, na pịghị ọmịna minini karakárá ma ḅụ sị Tamuno ọrẹ a túminị́ pa ọ mịẹ.

¹⁴ Tamuno ọ sị mịma bie suam wa dugho wásáma ibi oku ma ḅụ ḅọ́rọ́; ori ọ sim ḅẹ́ o ḅo ọmịna diekiri akịị wámịna Nyáná ḅo Jizọs Krais ipine ḅụ.

¹⁵ Anịgosi, wámịna Daa awọ, ọ kụrọ sẹ sị wa pa o die karakáráma ọlọọ kụ́rọ́ma, wámịna dugho wásáma nyẹ ḅụ na pịghị wa gịẹ ábálálá ḅụ.

¹⁶ Wámịna Nyánáḅọ Jizọs Krais ọ ḅụgbọrụ na Tamuno wámịna Daa, wa ḅẹlẹma ḅo sị ọrẹ tọ́rụ́kụrụkụ́rụ́ ḅụ gbámásó biedịịnma na ibi tọ́rụ́ dighi pa wa pịrịm.

¹⁷ Ọmịna kúkúbie mịẹ kụ́rọ́ma sị pịghị ịnyọ pa ọ pịrịị ọ mịẹarị ibifịrị gonyẹ́ gonyẹ́ ḅụ na pịghị ọmịna ibi ẹ́gẹ́rẹ gonyẹ́ gonyẹ́ ḅụ.