2 Tẹsalonaikaapụ 1 - Ibani New Testament

Pọl, Sailas Na Timoti

¹ Ịrị Pọl ḅara anịị mịị diri ma saghị ḅoo nyẹ, Sailas na Timoti sọ bịpị suam. Mị diri ma anị ḅo Tẹ́salonaika ḅụ fịnị sọsị ma pịrịm Tamuno Daḅọ ma na Kị́nị́nyánáḅọ Jizọs Krais nyáná warị nyẹ.

² Tamuno Daḅọ ma na Kị́nị́nyánáḅọ Jizọs Krais tọ́rụ́kụrụkụ́rụ́ na ori diin pa ọ pịrịị.

Krais Ḅo Bẹ Sá Ḅẹ́rẹ́kọọ

³ Wámịna Daa awọ, sámámgba wamịnị ịmịẹḅam pa Tamuno ḅẹbẹm ọmịna sịbị goo tegó mịma anị karakáram ḅẹẹ wamịnị ọkọọ mịẹ ọmịna minini opuma sẹnịarị gosi ọ nyáná jụghọ jụghọ pịrị ḅẹlẹma sọ pịghị opuma duḅaarị.

⁴ Anịị wa goo ọ pa bịpịkpọ nyẹ Tamuno sọsị sọsị ma ogbobie, wamịnị ọ pa bịpịkpọm ọ sẹ kụ́rọ inema nyána ḅara sị pa minini, nnị ọ pa arịị árị tọ́rụ́siarị mamgba balagha pa.

⁵ Mị mamgba diepághámam ḅẹ Tamuno ḅẹ́rẹ́kọ karakáram, anịgo ọmịnị ori ásẹ́mẹ́kiri ma sọọ na gbẹ́apụ sọmam, o goo tọ́rụ́siarị ma arịị nyẹ.

⁶ Tamuno karakárányẹ mịẹbẹm: ọ tọ́rụ́siarii akuoo ọ pa tọ́rụ́siarịmáapụ ma pịrịbẹm,

⁷ ọ pịghị ịnyọ́sárá pa ọmịnị tọ́rụ́siarịarịapụ ma pịrịbẹm na pịghị wamịnị sọ. Ọ mịma mịẹbẹm Kị́nị́nyánáḅọ Jizọs sobie ọ ḅụ die bẹ sáá ori na ori opukuro sookumuapụ.

⁸ Ọ kọrịfịnị ḅẹ́lẹ̄ pa ḅobẹm sị fom ḅárá pa Tamuno sịghịịapụ ma fom na pịghị Krais Jizọs gboloma ibi oku ma osighaapụ.

⁹ Gbámásó guluguluma fomḅara anịị nnị árị bẹnyẹ, nnị n foofomabẹm Kị́nị́nyánáḅọ ma tórúku na pịghị ori ḅụ́gbérépuma kụ́rọ ḅụ.

¹⁰ O ḅomaẹrẹ anị éné ma sị o boma daakị bẹ ḅara ọra túminị́ mamgba ḅárábie na pịghị kuu, mininiapụ mamgba ḅarabie. Ọmịnị sọ nna ḅụ gbẹ́rẹ́apụ sọbẹm tegó ọmịnị wa dugho ọ pịrị oku ma minimam.

¹¹ Anịị wa go sámámgba tẹ́ghẹ̄ ọ pịrịarịnyẹ, wa pịghị biiarị ḅẹ́ Tamuno pa ọ sị sịị ma ọmịnị anị ḅụ ḅụ́gbẹ́ duma kọọ ori kụ́rọ ḅụ ọ pịghị mịẹsị ọmịnị ine ọ́ mịẹ dọghụ ibinyẹ mamgba mịẹ, sị pịghị ọmịna minini fịrị ma mịẹ kárámá.

¹² Tegó mịma ḅụ ḅọ́rọ́ túminí ḅo Kị́nị́nyánáḅọ Jizọs Krais ẹrẹ ma pịrịbẹm, ọmịna duma gosi, ọmịnị ma so pịghị ọ ḅarabie ḅo túminí nyánáḅobẹm Tamuno na Wányánáḅọ Jizọs Krais tọ́rụ́kụrụkụ́rụ́ ḅụ ḅọ́rọ́.