2 Pita 3 - Ibani New Testament

Kị́nị́nyánáḅọ Ori Pịghịma Ḅo

¹ Ị́yẹ́ ibi nangwọapụ, mị mị́sa a gịẹ ọ fịrịma ma mmẹẹ́ kárámá ábálálá. Mịná mmẹẹ́ ábálálá ma ḅụ, a ḅụ́kọ́rọ́mamam si fíafía kóróma timi saghịma ọmịna tẹ́mẹ́bie, a mịnanyẹ ma pa ọmịna biekórómáarị ḅara.

² A biim ḅẹ́ Ḅọlọmaa sáá tọ́ntọ́ ikiakoroapụ ma kọọ ẹ́gẹ́rẹ́ ọ pa biekóróma, na pịghị wámịna Nyánáḅọ na Dụaḅọ́rọ́maḅọ pa wa pịrị ólóghó ọmịna nfịrịmaapụ ma ḅara ḅọ́rọ́.

³ Parị nyẹ, a bim ọ kanyaḅo ḅẹ́ kunema sa ma ḅụ, jẹ́apụ págháḅobẹm nna duma bie n dighi nwangịarịnyẹ anịị nna ojumẹnị tárịnyẹ gonyẹ́ gonyẹ́ n pịghị ọ kombobẹm.

⁴ Warị pịghị gbíla, Jizọs kọkọ minini ḅẹ́ ọ ḅobẹm, ọ mininigha? Ọ tẹ́ angaá imi, wámịna tádọ́apụ fịị famamam, nyẹ gonyẹ́ gonyẹ́ pa anị fịnị ḅára fịnịm saghị n tuminikiri tẹ́mẹ́ sa éné éné.

⁵ Nnị nimitẹ́lẹ́mam sị dighi tọ́rụ́ sị ḅẹ́ ḅọlọmaa sáá Tamuno ẹ́gẹ́rẹ́kọọm so na kiri na warị tẹmẹm. Tamuno tuminikiri ma tẹ́mẹ́ pághámaḅom mingi bie pịghị mingi pa.

⁶ Ọ pịghị mingi, anịị opu mingi, pa olom tuminikiri ma famam.

⁷ Kụ́ma mị́sa fịnị so ma na kiri ma, gbẹ́rẹ́ Tamuno ẹ́gẹ́rẹ́ ma anịị nnị pa anị ọlọ warị anị dọ́ghụ́ma bẹ fịnị pịrịnyẹ. Nnị nnị pa ḅẹ́rẹ́kọọ éné ma kuruarị, nnị Tamuno nímighaapụ ma sịbị ḅẹ́rẹ́kọ si pịghị n guluguluma.

⁸ Kụ́ma ị́yẹ́, ibi nangwọapụ, ọ mịị gbẹ́rẹ́nyẹ pa bieḅárámá ma: ḅẹ Tamuno tórúku gbẹ́rẹ́ éné sọ́ḅọ́rọ́ kụ́rá mmẹẹ́ andẹẹ́ oyia si findi, kụ́rá a mmẹẹ́ ndẹ́ẹ oyia si findi sọ́ḅọ́rọ́ gbẹ́rẹ́ éné.

⁹ Kị́nị́nyánáḅọ ma o sa ngumabịgha o minini nyẹ mịẹ, jẹ́apụ si ḅara. Tụ́ma ori ngịrịma nyáná ọ pịrịm, dọghụgha gbẹ́rẹ́ḅọ sọ papa fịịfaa, o bim ḅẹ́ kị́nị́mamgba nna sii ḅụ pịghịị.

¹⁰ Kị́nị́nyánáḅọ ma pịghịma ḅoo bẹ éné ḅobẹm fúrúḅọ ḅara ma. Anị éné ma ḅụ, so ma ẹmẹẹ́fábẹm, sobie fịnị a nyẹ ma kọrịfịnị ḅụ dọghụfámabẹm, tuminikiri ma na anị bie fịnịnyẹ mamgba paghaḅụ pa fịnịbẹm.

¹¹ Mịnanyẹ ma mị ḅara pa gulugulufama bẹ ḅara ma, ọmịnị anịị tọ́rọ fịnị túminị́ ḅara? Ọ tọ́ntọ́ duma kọọ, pịghị ọmịna ḅụ saghị Tamuno ḅárásua,

¹² ọ pa Tamuno ene ma kúruarị sa, ọ mịẹnyẹ mịẹsị anị álála ḅoo. Anị éné ma, sotọrụ ma dọghụbẹm fịnịbie pịghị guluguluma, sotọrụ fịnịnyẹ ma gonyẹ́ gonyẹ́ fịnị ọwụ ma anị sanimabẹm.

¹³ Kuma wa Tamuno minini nyẹ ma kurum, ịwọ so ma na ịwọ tuminikiri ma, karakárá ibiamịẹnyẹ taa bẹ angaá.

¹⁴ Anịgo ị́yẹ́ ibi nangwọapụ, ọmịnị anị éné ma kúruarị sáá, ọmịnị ọmịna ịnyọ láa ḅara mịẹsị ọmịna ḅụ mịẹ kpainma warị, bịpị ḅụ laagha pa Tamuno tórúku, pịghị ọ nana diin ḅụ fịnị.

¹⁵ Kị́nị́nyánáḅọ ingịrịma ma ákị, sọ́ḅọ́rọ́ o findi ị pịrị ḅụ́pọ́ ọ pa ḅọ́rọ́ dụaḅọ́rọ́ma nyáná, wámịna ibi mị́naḅọ Pọl, Tamuno pa ọ pịrị níminyẹ pa ábálálá gịẹ ọ fịrịma ḅara.

¹⁶ Pọl mịị ḅara ma pa gịẹ gịẹm ọrẹ ábálálá mamgba ḅụ, mịnanyẹ ma gbólómanyẹ ḅụ. Jẹa nyẹ imi ọrẹ a diri ḅụ, ḅụdáa nyẹ akanyaḅo ḅụ, ḅẹnyẹ ḅẹnyẹ nímighaapụ na pịghị kụrọ sẹghaapụ Krais gboloma dienyẹ, irima ḅara pa mịnanyẹ ma daa dughoarị, n Tọ́ndiri ma bie jẹa nyẹ na mịẹarị ḅara, mịị ḅara ma n guluguluma dighiḅọ nna ḅụ pịrịarị.

¹⁷ Kụ́ma ọmịnị ị́yẹ́ ibi nángwọ́apụ ọ tarị mịma nimimáa sáá, ọmịnị ọ tọ́rụ́ findi si ólóghó kokoghaapụ ma ọ daa irimagha, si o sóórókoro ọ sẹ ibi ngaa ḅụ.

¹⁸ Kụ́ma ọ pa senị́ị́ Wányánáḅọ na wámịna Ḅọ́rọ́maḅọ Jizọs Krais tọ́rụ́kụrụkụ́rụ́ na ori níminyẹ ḅụ. Ipine fịnị ọ pịrị mị́sa akị mú ḅẹsá ḅẹsá la. Anị ọkọ fịnịị.