2 Kọrịntịapụ 9 - Ibani New Testament

Ọ Nyáná Tamuno Túminị́ Pịrịbẹ Ḅárásua

¹ Nnị pa Tamuno túminị́ ma fịrịmaarị ḅárásua ma Judiya ḅụ, a arịgha a go diri gịẹ ọ fịrịma bẹnyẹ anị sịbị go.

² A nimim ḅẹẹ ọmịna tẹ́mẹ́bie ọ biarị ḅẹẹ ọ ḅárásua, a pịghị ọ pa bịpịkpọ Masidoniyaapụ ma pịrịmam. A ḅẹm ḅẹẹ, <> Anị ọ tẹ́mẹ́bie álála ḅara ma, mú nna ḅụ tọghaapụ timi sághịmamam.

³ Mị́sa amịna owiapụ awọ ma fịrịmaarị, sị wamịnị ọ pa kpọ bịpịkpọ ma papanyẹ sọbịgha ḅara, kụ́ma a dugho ḅara ḅụ, o tẹ́lẹ́ma fịnịbẹ ḅara ọmịna ḅárásua ḅụ.

⁴ Anị fịnị ḅara ḅọ́rọ́ Masidoniyaapụ ma ịnáná ḅo ḅo sị arịḅo ḅẹẹ nịị ọ tẹ́lẹ́maghaa, anị tọ́rọ́fịnị ḅụ́gịrịrị dighiḅọ wa pịrịbẹ, anị pịghị dighiḅọ ọ pịrịbẹ ḅụ́gịrịrị wa biekpọma nyána ḅara ma ọmịna ḅụ.

⁵ Anịgo a sịbịbie kịẹ anị pịrịm ḅẹẹ anị ibibẹm ḅẹ́, mịná mininiapụ ma tarị tarị ọ damaḅo ịḅụ, sị mú ọ ḅárafindi pịrịdọ́ghu nyẹ ma tẹ́lẹ́ma warị sị a ḅo láa ḅẹ́ sáá anị tẹ́lẹ́ma fịnịbẹm, mịma diebẹm ḅẹẹ ọ pịrị bim, mịnị ologho ḅara ḅụghaa.

Nyẹ́die Ma Ḅụ Fịnị Karịibima

⁶ Biekóróma ḅẹ́ bogha sịmgbọlụ dipiḅọ pịghị bogha sịmgbọlụ sughubẹm; opuma sịmgbọ́lụ dipi ḅo pịghị tọgha sịmgbọlụ sughubẹm.

⁷ Anịgo ọ́rụ́ḅọ ọ́rụ́ḅọ pịrịị tẹ́mẹ́bie n ḅo tọ́ọ pẹ́lẹ́máa ḅara, nyẹ́mọ́ni ḅugha, anịgha ḅẹẹ a anị mịẹ nyánam gosi, tegó Tamuno bieḅẹlẹ ḅụ nyẹ pịrịarịḅọ gonyẹ́ gonyẹ́ ḅẹlẹma ḅẹ́lẹ́mam.

⁸ Tamuno ma pịghị ine o bi ḅara nẹ́ngị nyẹ mịẹ ọ pịrịbẹm. Si o bii nyẹ gonyẹ́ gonyẹ́ sámámgba ọmịnị anị nyáná ọ ḅụ pịrịbẹ ḅara, pịghị anị nyáná wásáma sị pa ibifịrị gonyẹ́ gonyẹ́ nwángị.

⁹ Tọ́ndiri ma dugho ḅara, <>

¹⁰ Tamuno ori sịmgbọlụ pa dụadipiḅọ pịrịarịḅọ na pịghị fịtúrú pịrị fị́nyẹ ḅụ, pịghị pa ọ pịrịbẹm o bi sịmgbọlụ gonyẹ́ gonyẹ́, ọ mịẹbẹm anị sẹ́nị sị opuma nyẹsua ọ ḅara findi pịrịarị ḅara ma gosi.

¹¹ Ọ mịẹbẹm ọmịnị opuma ngọ nyána sámámgba ḅụ, sị ị ine ḅara findi sị nyẹ pịrịbẹm sị tọghaapụ anị ḅụ ḅọ́rọ́ ịmịẹḅam pa Tamuno ḅẹẹbẹm, n wámịna ḅara nyána ḅo dienyẹ gosi.

¹² Ḅẹẹ mị́sa ọ nwángị fịrị ma Tamuno túminị́ ngéréghaa ọmịnị nnị pálịma nyẹ mịẹ pịrịapụ, kụ́ma anị ḅụ ḅọ́rọ́ tọgha boma ḅọ́rọ́ mú Tamun laarị.

¹³ Ọ nwángị fịrị ma nyána sị die pághámaarị nyẹ gosi tọghaapụ boma pa Tamuno pịrịbẹm ọmịnị Krais ibi ọkụ́ ma osii ḅara, ọ pịghị dugho pághámaarị nyẹ, ọ pịghị ḅara findi nnị na diearị ḅara na pịghị kị́nị́mamgba na.

¹⁴ Anịgo opuma póghóló ḅẹlẹma ḅụ, nnị tẹ́ghẹ̄ ọ pịrịbẹm Tamuno diepághámamaá kịrị tọ́rụ́kụrụkụ́rụ́ ọmịna ḅụ.

¹⁵ Túmíní fịnị Tamuno pịrịị, ọ pa wa pịrị sị tumḅọ ine anị dughofindi bigha dienyẹ!