2 Kọrịntịapụ 8 - Ibani New Testament

Ḅáráfindi Nyẹ́die

¹ I Daa awọ, wa bim ḅẹ́ o nimi Tamuno tọ́rụ́kụrụkụ́rụ́ nwángịmáa fịrị mamgba Masidoniya ḅụ fịnị sọsị mamgbabie.

² Nnị tụ́ma daádighi arịm, nnị n pa tulu ḅọ́rọ́ ḅụḅáláḅálá gosi, kụ́ma nna bieḅẹlẹ nna ḅụ nẹngịm mịẹsị nnị nna nyánányẹ pịrịm balagha ḅara ḅụ, karakárányẹ ḅẹẹ nnị siminiapụ.

³ A onyẹ́sẹ n pịrịm, nnị, nnị ineḅara pa pịrịm, n pịghị nna ịnyọ nẹ́ngịma ḅara pa pịrịm, kị́nị́ n sumágha pa.

⁴ Nnị wa tẹ́ghẹ̄m ḅẹẹ, nnị sọ pịghị gbẹ́rẹ́apụ sọ, diekiri nyáná bẹapụ, anịị ḅárásua Tamuno túminị́ ma pịrị Judiya ḅụ fịnịapụ ma.

⁵ Nnị wa tọ́rụ́ pa dighi ḅara mịẹghaa, kụ́ma parị nnị nna ḅụ pa Kị́nị́nyánáḅọ pịrịm, n pịghị n ḅụ pa wamịnị sọ pịrịm anịị Tamuno tọ́ḅára ḅụ.

⁶ Anịgo wa Taitọs tẹ́ghẹ̄m ḅẹẹ ori fịrị ma sághịḅọ ma, ori anị nwángị tórúku mú, sị ọ ḅárásua ọ pịrị sị ọ mị tụ́ma ḅẹlẹma fịrị ma nwángị fama.

⁷ Ọmịna nyánányẹ gonyẹ́ gonyẹ́ ḅụ ọ mịnị opuma anị nyanam; minini ḅụ, ẹ́gẹ́rẹ́ pụghọ ḅụ, na pịghị níminyẹ ḅụ, ọ mịnị ịnyọ pa ḅárásua dọghụ ḅara, ọ pịghị pa wa ḅẹlẹma ḅara. Wa pịghị bim ḅẹ́ mị ḅẹlẹma fịrị ma ḅụ ọ ḅara findi balagha ḅara ḅụ.

⁸ A ólóghó sua ọ pịrịgha, kụ́ma pa o die jẹapụ kụrọma biiarị ḅara sị n ḅárásua. A ḅụ́kọ́rọ́maarị a pa nimi ḅẹ́ ḅara ọmịna ḅẹlẹma anị karakárá fịnị ḅara.

⁹ Ọ kọkọ wámịna Nyánáḅọ Jizọs Krais tọ́rụ́kụrụkụ́rụ́ nimi; ori ọrẹ opu láa ḅara balagha kụ́ma ọ ḅụ siminimam ọmịna sịbị go, sị ọrẹ simini ḅụ ḅọ́rọ́ ori ngọ pa ọkọọma bẹ ḅara.

¹⁰ Mịị ḅẹ́rẹ́ ma gbolomanyẹ mịị ị́yẹ́ againma, anị ibiḅaa ọ pịrị ḅara. Ḅọ́rọ́maa kụ́rá ọmịnị anịị parị nyẹ pịrịapụ, anịma ngéréghaa kụ́ma anị pịghị ọ pụghọ tárịm ḅẹ́ ọ nyẹ pịrịị.

¹¹ Ọmịnị anị mịẹ tórúku mú sị fịrị ma nwángị famáa! Ḅẹ́ anị kụrọma ọ tarị anị mịẹfáma ọḅụ fịnị ḅara ọmịnị anị ọrụtọarị sa, ḅẹ́ ọ pịghị mị́sa ọ nyánányẹ pa fịrị ma nwángị.

¹² Anị ḅọ́rọ́ ọ́taárịarị ḅẹẹ ọ nyẹ pịrị, Tamuno ọmịna pịrịnyẹ ma daákịbẹm, ọmịnị nyáná sị pịrị bi ḅara, ọ nyanagha nyẹ ḅụghaa.

¹³ Wa binyẹ mịmagha anịị ḅẹẹ a ikúnyẹ dighi sií jẹ́apụ sịbị, sị pa ọmịna ọgọ́nọ́ gbánā, kụ́ma ọmịnị pịrịarịnyẹ na jẹ́apụ pịrịarịnyẹ gbasi bẹ ḅara.

¹⁴ Anịsa nyẹ ọ ḅụ kụ́rọ sa, nnị sọ warị nyáná bima, nnị sọ warị ḅárásua ọ pịrịbẹ ḅara. Mị ḅara ma ọmịnị ine karakárá ḅara pa ḅárásua ọ́rụ́ḅọ ọ́rụ́ḅọ pịrịbẹm.

¹⁵ Tọ́n diri ma dugho ḅara bẹ, <>

Taitọs Na Ọrẹ Ogboapụ

¹⁶ A ịmịẹḅam pa Tamuno ḅẹm, anị pa Taitọs tẹ́mẹ́bie suaḅọ anị i tẹ́mẹ́bie fịnị ḅara anịị ḅárásua ọ pịrị ḅụ.

¹⁷ Wamịnị ọ ḅara binyẹ ngéréghaa o mịẹnyẹ, kụ́ma kị́nị́ osumagha pa, anị ọ tarịarị bẹ ọ ḅárásua anị o go ọ damaḅo nyẹ.

¹⁸ Wa ori na, wámịna gbẹ́rẹ́ mị́naḅọ owitụ́wọ fịrịma ḅoarị sọsị mamgba opuma osigha nyáná pịrịḅọ, ọrẹ fịrị ḅụ, ọ Tamuno ẹ́gẹ́rẹ́ ma kọọ wásámaarị ḅara.

¹⁹ Anịma pa angásá warị, sọsị gbọrụ ma ọ sẹ́lẹ́akịmam pịghị ọ tọ ḅẹ́ ọ wamịnị na munyẹ ma muu, wa ḅẹlẹma dienyẹ ma dighi sị Tamuno fịrị ma nwángịarị ḅara na pịghị die ḅẹẹ wa ḅárásua dọ́ghụm.

²⁰ Wa pịghị wámịna ḅụ ẹ́biarị gbẹ́rẹ́ḅọ sọ dughonyẹ nyánábịgha ḅara wa ḅara warị mị opu diepịrịnyẹ ma na nwángikọarị ḅara.

²¹ Wa biiarị ḅẹẹ, wa karakárányẹ ma mịẹ, Kị́nị́nyánáḅọ tórúku ngéréghaa, kụ́ma túminị́ tórúku sọ.

²² Pa anị ḅụ sua, wa wámịna mị́naḅọ owitụ́wọ na nnị na fịrịmaarị, wa pịghị dọghụ pághámaḅomam tọgha sa na pịghị asọ kirikiri ḅụ, arịḅo ḅẹẹ sámámgba anị ọ tarịarị ọ ḅara warị ḅárásua bẹ ḅara. Bẹ mị́sa ọ pịghị opuma biekpọ nyána ḅara ma ọmịna ḅụ, anị ọ tarị mị ḅara nẹ́ngimamam ori ine ḅárásua bẹ ḅara.

²³ Ori Taitọs ori ị́yẹ́ árụ́ḅọ, ori i nana nwángịarị wa ḅárásua ọ́ pịrịbẹ ḅara, isi mịná owiapụ ma ọ nana muarịapụ ma nnị sẹ sọsị gbọrụ ma pịrịm n pịghị boma akuoo Krais pịrịarị.

²⁴ Ị́yẹ́ ḅẹlẹma pa n die, anị sọsị sọsị mamgba ḅụkoro sị pịghị nimi ḅẹ́, wamịnị ọmịnị pa bịpịkpọ ma karakáram.