2 Kọrịntịapụ 7 - Ibani New Testament

¹ Ị́yẹ́ ibi nángwọ́apụ mịnanyẹ mamgba n minini pa wa pịrịm, anịgo wa wámịna ḅụ mịẹ fiafiama, wámịna oju anịgha wámịna tẹ́mẹ́ ịlọlịma bẹnyẹ gonyẹ́ gonyẹ́ ḅụ, wa pịghị káara ḅara ḅụ tọ́ntọ́ duma kọọ Tamuno ḅụ.

Pọl Bieḅẹlẹ

² Ọmịnị asọ tẹ́lẹ́ma wa pịrị ọmịna tẹ́mẹ́bie. Na wa gbẹ́rẹ́ḅọ so irimagha, wa pịghị gbẹ́rẹ́ḅọ sọ mbasịgha, anịgha gbẹ́rẹ́ḅọ sọ inoma.

³ A mịma dughogha ḅẹẹ a ḅẹ́rẹ́ pa ọmịna ḅarasima, a parị dughomaaḅara ma ḅẹ́ ọmịnị opuma wámịna ḅụ nyẹ́lam ḅẹ́ sámamgba wamịnị na ọmịnị na imi, wa duma o wa fịị o.

⁴ A opu biekpọ nyanam ọmịna ḅụ, a pịghị ó pa opuma bịpịkpọm, wámịna ḅụḅáláḅálá mamgba ḅụ, a opu biekụ́rọ nyánam, ị́yẹ́ bieḅẹlẹ kunema nyanagha.

⁵ Wa ḅo Masidoniya la sa, sọ, wa ịnyọ́sárá nyanagha, ḅụḅáláḅálá ngámámgba ḅụ, jẹ́apụ na kamkoro, ḅáláfa wámịna tẹ́mẹ́bie.

⁶ Kụ́ma Tamuno biesííapụ biediinmaḅọ, wa biedịịnmam Taitọs ḅo la sa.

⁷ Ori ḅo ma ngéré wa bieḅẹ́lẹ́magha kụ́ma o dugho sị ọmịnị ọ tẹ́mẹ́kụ́rọ ma ḅara, o dugho wa pịrịm ọ dọghụ ḅara sị ọmịnị ị́yẹ́ arịị. Anị ọ ḅụ mịẹḅara, ọ pịghị sẹ kụ́rọ ḅara sị isibi fọ́nyá, anịma go mị́sa ị́yẹ́ bieḅẹlẹ ma parị angaá nyẹ ma nẹngịm.

⁸ Ḅọ́rọ́ a gịẹ ọ pịrị diri ma o biesimam, a balagha ḅẹ́ a anị gịẹm, a baladọghum a arịḅo sa ḅẹẹ anị ọmịna biesimam gbẹ́rẹ́ kálá sa tụọ ḅụ.

⁹ Kụ́ma mị́sa i bieḅẹ́lẹ́arị, ḅẹgha ḅẹ́ ọmịna biesiimam gosi, kụ́ma ọmịna biesii ma Tamuno anị pa fịrị nwángịm anịgo wa nyẹ pa ọ lamagha.

¹⁰ Tamuno ḅara saghị ḅo biesii sii ḅụ pịghị dighiḅọ dighiḅom mịẹsị tumḅọ dụaḅọ́rọ́ma nyána, nyẹ́mọ́ni ofori anị bie, kụ́ma tuminikiri biesii fịị dighiḅọ dighiḅom.

¹¹ Dighi Tamuno ọmịna biesii ma pa mịẹnyẹ, anị mịẹsị ọ saghị nyẹ́ pa nyẹ́ simam anị ọ pụghọ tárịarị ḅara ḅẹẹ o die ḅẹẹ ọmịna ḅara fiafiam, ọkọfịnị igani, ọkọfịnị silé ọkọfịnị pụghọ tárịarị nyẹ, ọkọfịnị fịrịnwangị ịnyọ, ọkọfịnị tọ́rụ́ pa siiarịma irima nyẹ pịrị. Nyẹ gonyẹ́ gonyẹ́ ḅụ ọmịnị ọmịna ḅụ diemam ḅẹẹ irima ọmịna ḅụ ofori ḅẹ́rẹ́ mamgba ḅụ.

¹² Anịsọnị ḅẹ́, a mị diri ma gịẹm, irima ḅo gosigha anịgha kị́nị́ irima ḅo gosi. Anịmanakaragha a anị gịẹm pa mịẹ findi Tamuno tórúku, ọmịna fịrịnwangị ịnyọ wámịna ḅụ póghóló la ḅara.

¹³ Mịnanyẹ mamgba mịẹm wa tẹ́mẹ́kụ́rọ nyáná. Wa ḅụbie saghị ḅo tẹ́mẹ́kụ́rọ ḅụ sua, anị opuma wa tọ́rụ́ ḅẹ́lẹ́mam, wamịnị árị sa Taitọs bieḅẹlẹ láa ḅara, ọmịnị kị́nị́mamgba ḅárásua sị ọ tẹ́mẹ́ mịẹ sághịma ḅara.

¹⁴ A i pa bịpịkpọ ọ pịrịm, ị pịghị ḅụgịrịrịmaghaa. Sámámgba wa karakárá ma dugho ọ pịrịmam, anị gbẹ́rẹ́ ḅara ma, wámịna bịpịkpọ Taitọs tórúku ḅo karakárányẹ sọmam.

¹⁵ Anịma go ọ nyáná ọ pịrị ḅẹlẹma warị sághị sẹnị kụ́rọ, o biekóróma sa ḅẹ́ ọmịnị kị́nị́mamgba ọmịnị ori againma akị bim, ọ pịghị ḅáláfama na osigha ḅara pa ọ daa kóróma ḅara.

¹⁶ Ị bie opuma ḅẹlẹm ḅẹ́ a ine ọmịna ḅụ káara biekpọ nyánábẹm.