2 Kọrịntịapụ 6 - Ibani New Testament

¹ Wamịnị na Tamuno na nwángị gbólomaarị fịrị ma, wamịnị ọ tẹ́ghẹ̄m, ọmịnị Tamuno tọ́rụ́kụrụkụ́rụ́ nyánámaapụ ḅẹẹ ọmịnị anị guluguluma ma.

² Ọ náa Tamuno dughonyẹ, <> O pughu mị́sa anịị ọ Tamuno tọ́rụ́kụrụkụ́rụ́ nyáná na ibi sáá; mịmgba éné anịị ḅọ́rọ́ma éné ma.

Pọl Ori Jẹa Tọ́rụ́siarị

³ Wa bigha gbẹ́rẹ́ḅọ sọ irima nyẹ árị wámịna fịrị ḅụ, anịgo wamịnị sọ wa ḅụ́kọ́rọ́maarị wamịnị asọ mgbẹsẹnyẹ sọ gbẹ́rẹ́ḅọ sọ pịrịbịgha ḅara.

⁴ Kụ́ma wa mịẹarịnyẹ gonyẹ́ gonyẹ́ ḅụ, wamịnị wa ḅụ diearị ḅẹ́ wamịnị Tamunofịrị nwángịapụ, wa ḅụḅáláḅálá na ḅụ́kụro na ḅụdányẹ ngịrịmaarị ḅara.

⁵ Nnị fom nyẹ pa wa fomam, nnị wa pa ikólibie suam, túminị́ wa gbiri ikelema sị wa fom nnị ịnyọfama fịrị pa wa fịrịmam, wa múno pa wa tọ́rụ́ḅámam pịghị ḅuru pa wa ḅáma.

⁶ Wa wámịna ḅụ fiafiama ḅụ ḅọ́rọ́ wámịna níminyẹ, ngịrịma na ibiamịẹnyẹ wa wámịna ḅụ diemam ḅẹẹ wamịnị Tamuno fịrịnwangịapụ Tamuno Tọ́ntọ́ Tẹ́mẹ́ ma ḅụ ḅọ́rọ́ pịghị wámịna karakárá ḅẹlẹma,

⁷ Wámịna karakárá oku na pịghị Tamuno kụ́rọ ḅụ ḅọ́rọ́. Wa karakárá ibiamịẹnyẹ nyánam wa pa ọ́mụ́gbinyẹ, amaḅara ḅụ na pịghị ẹ́rẹ́ḅara ḅụ.

⁸ Nnị wa sághị sóghólomam pịghị wa ḅụ́gịrịrịma, nnị wa wirim pịghị wa túminí, nnị epeletiapụ pa wa siim, anịsọ wa pa karakárányẹ ma dughom.

⁹ Wa túminị́ nímighaapụ fịnị ḅara fịnịm, anịsọ kị́nị́mamgba wánimim, wa fịịmaapụ kịkam kụ́ma ọmịnị árị ḅara ḅụ, wa pa dumafịnịm, nnị wa pa tọ́rụ́siarịmam kụ́ma nnị wa ḅagha.

¹⁰ Nnị wa biesimam, wa pa sámámgba bieḅẹlẹarị, wa igonyinapụ kịkam, kụ́ma wa tọgha tọghaapụ pa álásọ́maarị, wa ḅẹnyẹ ḅẹnyẹ nyánágháapụ kịkam, anịsọ wa nyẹ gonyẹ́ gonyẹ́ nyánam.

¹¹ Ị́yẹ́ Kọrịntị ibi nangwọapụ wa karakárá ḅara pa ẹ́gẹ́rẹ́kọọ ọ pịrịmam, wa pịghị wámịna tẹ́mẹ́bie findimam.

¹² Wa minigha wa tẹ́mẹ́bie gbẹ́ẹ̄ ọ pịrịapụ, kụ́ma ọmịnị anị ọmịna tẹ́mẹ́bie ịkasị wa pịrịapụ.

¹³ A ẹ́gẹ́rẹ́kọọ ọ pịrịarị soḅọ́rọ́ ọmịnị furobie a yii awọ: pa wa die wa nyáná ọ pịrị gbẹ́rẹ́ ḅẹlẹma ma, ọmịnị ọmịna tẹ́mẹ́ findi wásámáa.

Tamunonimigha Túminị́ Dighiḅọ Bẹ Birinụ́nụ́

¹⁴ Mini mininighaapụ na fịrịnwangị gboloma ma bẹ ọmịnị nnị na gbasịm, anị ine ọkọfịnịbịgha. Karakárányẹ na irima nyẹ na tọrọ́ pa gbẹ́rẹ́nyẹ mịẹbẹ. Baá na kánákáná na n tọrọ́ pa gbẹ́rẹ́ angaá ngaa bẹ?

¹⁵ Krais na Ẹ́kpẹ́dua na nna bịpị tọrọ́ pa gbẹ́rẹ́nyẹ fie bẹ? Mininiḅọ na mininighaḅọ ntẹ́ nyẹ nyáná gboloma?

¹⁶ Tamuno wárị na nkára tamuno nnị tẹ́ mịẹnyẹ nyáná gboloma bẹ. Wamịnị anị dúmagbámásó Tamuno ma wárị: Tamuno ọ ḅụgbọrụ ḅẹ́ ḅara ma ḅẹẹ. A nnị na ngábẹm pịghị nna ogbobie nwángị ikelekelé, a Tamuno sọ n pịrịbẹm nnị sọ ịyẹa túminị́ sọ́bẹm.

¹⁷ Kị́nị́nyánáḅọ warị nnị ḅẹẹ, <

¹⁸ Kụrọmamgba nyáná Kị́nị́nyánáḅọ dugho ḅara, a Daa sọọ ọ pịrịbẹm ọmịnị sọ pịghị ị́yẹ́ owiapụ awọ na ị́yẹ́ ẹ́rẹ́awọ sọ́bẹm.>>