2 Kọrịntịapụ 5 - Ibani New Testament

Wámịna Sobie Wárị

¹ Mị́sa wa nimim ḅẹ́ ḅọ́rọ́ wa bie angaá wárị ma mịẹ tuminikiri kaaka, wa Tamuno ḅara saghị ḅo wárị nyánam sobie, túminị́ ḅara pa namaghaa nyẹ, sị fịnị mú gbámásó la bẹnyẹ.

² Mị́sa wamịnị inighiarị, wa pụghọ tarịarị ḅẹ́ nnị wámịna sobie wárị ma pa wa suaa.

³ Tegó nnị mịị wárị ma pa wa sua sa, wa mịnị pápáḅụ ḅụ fịnịbịgha.

⁴ Wa mị tuminikiri wárị ma ḅụ fịnịarị sa wamịnị iniigharị nnị pụ́nụ́maarịapụ ḅara ma, ḅẹgha ḅẹ́, wa mị tuminikiri ojumẹnị ma wárịso dọ́ghụm, kụ́ma wa bim ḅẹ́ nnị sobie anganyẹ ma pa wámịna ọgọnọ sua, sị duma fịị bẹnyẹ ma dima.

⁵ Tamuno anị wa tẹ́lẹ́ma mị dima ma pịrịarịḅọ ọ pịghị ọ Tẹ́mẹ́ pa wa pịrịm sị anị sẹpịrịḅọ sọ wa pịrị, ọ nyáná kóróma wa pịrịnyẹ mamgba pịrị.

⁶ Anịgo sámámgba wa biekpọ nyánam, wa nimim bẹ wa tuminikiri ojumẹnị ḅụ fịnị sa gonyẹ́ gonyẹ́, wa ḅọlọ angaá ḅụ imi Kị́nị́nyánáḅọ wárị ma ḅụ.

⁷ Wa minini pa dúmakọm, wa tọ́rụ́ pa arịnyẹgha.

⁸ Wamịnị opuma biekpọ nyánam tụ́ma biiarị ḅẹ́, wa mị tuminikiri ojumẹnị wárị ma wáriso sị mú ámáọ́gọ́nọ Kị́nị́nyánáḅọ na fịnị

⁹ Nyẹ́ mamgba nẹ́ngị nyẹ, wa bim ḅẹ́, wa ọ tẹ́mẹ́ miẹḅẹ́lẹ́ma mịnga oju ma bie anịgha fịị sị so oju ma bie.

¹⁰ Wamịnị kị́nị́mamgba gbarịgha ḅara ḅụ Krais ḅẹ́rẹ́kọ siri ḅụ sẹbẹm, sị ọ́rụ́ḅọ ọ́rụ́ḅọ amịna fịrị fịnị ḅara ḅụ gbẹ́ẹnyẹ nyánábẹm, anị ibii-o, anị sii-o, n ḅo duma bie.

Mininiapụ Krais Ḅụ Ḅọ́rọ́ Tamuno Na Nangwọ Sọọ

¹¹ Wa nimim Kị́nị́nyánáḅọ dighi ḅáláfa dughoarịnyẹ, anịgo, wa ḅụ́kọ́rọ́ma túminị́ tẹ́ghẹ̄m. Tamuno káara ḅara pa wa nimim, ọmịnị sọ pịghị wa nimim.

¹² Wa pịghị mị́sa sima wa ḅụ túminí ọ pịrịgha, tụ́ma wa pa ọ pịrịarị ọ go wa pa bịpịkpọ bẹnyẹ. Si ọmịnị sọ ine n pagharaa bẹ ḅara, bịpịkpọ nnị tọ́rụ́ pa árịarị nyẹ pịrịarịapụ, sị túminị́ tẹ́mẹ́bie fịnịnyẹ wárịso.

¹³ Ḅọ́rọ́ wámịna sịbịbie karakáragha? Tamuno gosi anịị anịgo karakáragha nyẹ, anịgha ḅọ́rọ́ wámịna sịbịbie karakárá? Anị karakáram, ọmịna sịbị go.

¹⁴ Krais ḅẹlẹma anịị wa sumaarịnyẹ tegó anị wa ḅụ korom ḅẹ́ gbẹ́rẹ́ owitụ́wọ fịị kị́nị́mamgba pịrịm mịma dughoarị ḅẹ́ nnị kị́nị́mamgba fịịm.

¹⁵ Ọ fịị kị́nị́mamgba pịrịm, sị dumaapụ mịnị duma nna ḅụ pịrịbịgha, kụ́ma n duma ọ pịrịbẹm, fịị sị pịghị fịị ḅụ saghị ḅo nna sịbị go.

¹⁶ Wa mịnị kị́nị́ sịbị ḅẹ́rẹ́kọgha tuminikiri ólóghó ḅara ḅụ karakárányẹ bẹ gbẹ́rẹ́sa biri wa tuminikiriapụ ólóghó pa Krais sịbị ḅẹ́rẹ́kọm, wamịnị jẹ́ pa ọkọ mịẹbịgha.

¹⁷ Anịgosi, Krais na gbẹ́rẹ́nyẹ mịẹḅọ gonyẹ́ gonyẹ́, n ḅọ ịwọma nnị tẹ́mẹ́ḅọ sọmam olom nyẹ ma somam, iwọnyẹ ma ḅomam.

¹⁸ Mịmámgba, Tamuno anịị Krais ḅụ ḅọ́rọ́ anị mịẹarịḅọ, iruonaapụ ḅọ́rọ́ma ọrẹ a nángwọ́apụ pa wa mịẹḅọ fịrị ma pa wa ḅárábie sua.

¹⁹ Wámịna oku dughoarị ḅẹẹ Tamuno Krais ḅụ ḅọ́rọ́ tuminikiri gbọrụ pa ọrẹ nángwọ́apụ mịẹarị Tamuno nna sii kịẹ kubirigha, kụ́ma ori oku ma pa wa pịrịmam, dugho pághámaarị nyẹ ọ ḅara warị nangwọapụ pa nnị mịẹarị ḅara.

²⁰ Wamịnị anị mị́sa sẹ Krais pịrịarịapụ sọ́ḅọ́rọ́ Tamuno wa ḅụ ḅọ́rọ́ túminị́ tẹ́ghẹ̄arị. Wa Krais sịbị go ọ tẹ́ghẹ̄arị; ḅẹẹ Tamuno iruonaapụ ḅụ ọ pịghị mú ọrẹ nangwọapụ sọọ.

²¹ Krais, sii ḅụ ofori ḅọ, Tamuno mịẹm o siiḅọ sọọ wa pịrị sị ọ ḅụ ḅọ́rọ́ wa ḅo Tamuno karakárá ibiamịẹnyẹ sọ́bẹm.