2 Kọrịntịapụ 4 - Ibani New Testament

Tẹ́mẹ́ Ngọ Ọ́rọ Átụ́ma Ḅẹlẹbie

¹ Tamuno ọrẹ lolomakúkúbie ḅụ mị fịrị ma pa wa pịrịmam ḅẹ́ wa nwángị, anịgo gbẹ́rẹ́nyẹ sọ mịẹbịgha si wámịna tẹ́mẹ́ oḅudáa.

² Wa ḅọghu na pịghị ḅụ́gịrịrịma fịrị mamgba sịghịmam, anịmanakaragha wa karakárá mamgba dughom túminị́ tórúku anị fịnị na ibiḅara, sị túminị́ wa nimi bẹ ḅara, pịghị nimi nna tẹ́mẹ́bie ḅẹ́ wa kọọ ẹ́gẹ́rẹ́ ma karakárányẹ Tamuno tórúku.

³ Ḅọ́rọ́ wa dugho pághámaarị ẹ́gẹ́rẹ́ ma ḅọghu angaá imi, anị ḅọghu angaá fịnị faarịapụ ma pịrịm.

⁴ Mịị tuminikiri tamuno ma mininighaapụ ma kóróma tọ́rụ́pụ́mamam anịgo nnị ine baá ma arịgha anịị Krais ipine gboloma sị ibi oku ma ḅụ sághị ḅoarị baá, ori ma anị gbẹ́rẹ́sa Tamuno ma na kịkaḅọ.

⁵ Wa wámịna ḅụ dugho wásámagha, kụma wa Krais dugho wásámaarị ḅẹ́ ori anị Kị́nị́nyánáḅọ sị wamịnị, ọmịna fịrịnwangịapụ Jizọs ẹrẹ́sị.

⁶ Dugho Tamuno ma ḅẹẹ, <> Mịị gbẹ́rẹ́ Tamuno ma anị mịẹsị ọri baá bia wámịna tẹ́mẹ́bie sọọ nyẹ. Mịma ḅụ ḅọ́rọ́, wa Tamuno ipine nimi ḅụ sághị ḅoarị baá ma nyanam biarị nyẹ Krais tọ́rụ́ ogbo.

⁷ Kụ́ma wamịnị mị ngọ ma nyánam ọ́rọ átụ́ma ḅẹlẹbie pa diepágháma ḅẹ́ kụrọmamgba nẹ́ngị kụ́rọ Tamuno ḅara sághị ḅom, wámịna ḅara sághịḅogha.

⁸ Sa ḅụ akị mú sa la, ḅụḅáláḅálá wa lam asọ gonyẹ́ gonyẹ́ ḅụ kụ́ma ḅụḅáláḅálá ma wa gbẹḅagha, jẹ́ sa wa tẹ́mẹ́bie mmẹẹ́ mmẹẹ́ mịẹm; kụ́ma wa jighegha wámịna biekpọ ḅụ.

⁹ Nnị wa pa tọ́rụ́siarịmam kụ́ma Tamuno wa dighi tọ́rụ́sigha; nnị wa fomu gbim kụ́ma wa gulugulumagha.

¹⁰ Sámámgba wa wámịna mẹnị oju ḅụ Jizọs fịị ma dighi ikelekelearị, Jizọs duma ma anị ḅụ diepágháma bẹ ḅara wámịna ḅụbie.

¹¹ Wámịna duma éné mamgba fịị wamịnị na imi Jizọs gosi, sị túminị́ ori duma árị bẹ ḅara wámịna mẹnị oju ma ḅụ.

¹² Mịma dughoarị ḅẹ́ fịị fịrịwangịarị wámịna duma bie, kụ́ma duma fịrịwangịarị ọmịna bie.

¹³ Tamuno diri ma dughoarị ḅẹ́, <> Anị gbẹ́rẹ́ tẹ́mẹ́ minini ma, wamịnị ẹ́gẹ́rẹ́kọọm wa mininim gosi.

14 Wa nimim ḅẹẹ, Tamuno, Kị́nị́nyánáḅọ Jizọs sághị duma bie suaḅọ pịghị wamịnị na Jizọs saghịmabẹm, n pịghị wamịnị na ọ́ nana kobirịbẹm ọ tórúku.

¹⁵ Mịị mamgba ọ ọmịna sịbị go, sị Tamuno tọ́rụ́kụrụkụ́rụ́ mú tọgha tọghaapụ la sa, nnị tọgha tẹ́ghẹ̄ ịmịẹḅam pa Tamuno ḅẹbẹm ọrẹ ipine ḅụ.

Minini Ḅụ Duma Kọọ

¹⁶ Mịma go anị wámịna tẹ́mẹ́bie kụrọmagha sọ, wamịnị ọkọ minighaa, karakárányẹ ḅẹẹ wámịna ojumẹnị kẹ́lẹ́kẹlẹ ḅụrụarị, kụ́ma wámịna tẹ́mẹ́bie duma ma anịị ene gbọrụ gbọrụ ḅụ nnị anị mịẹ iwomaarị.

¹⁷ Ḅẹ́ mị kálá sáátụọ ḅụ wámịnị arịarị tọ́rụ́siarị ma, dụḅa wásáma gbámásó boma akuoo wa pịrịbẹm wamịnị árị ḅụḅáláḅálá ma nẹ́ngịbẹm.

¹⁸ Wa wámịna tọ́rụ́ pa wamịnị arịarị nyẹ ḅụ gbánāgha kụ́ma tọ́rụ́ arịgha nyẹ ḅụ, tọ́rụ́ arịarị nyẹ ma fịnị ḅọlọgha kụ́ma tọ́rụ́ arịgha nyẹ ma fịnị gbámásom.