2 Kọrịntịapụ 3 - Ibani New Testament

Ịwọ Ọḅọọ Ma Fịrịnwangịapụ

¹ Jẹ́apụ mịẹarị ḅara ma, wa wámịna mịẹnyẹ gboloma diri akuo ọ pịrị ḅẹ́, wamịnị ọ damaḅo sáá, anịgha wa ọmịna ḅara diri mpara bii, kụ́rọ pa wa pịrịarịnyẹ ḅẹ́ wamịnị ọ damaḅo.

² Ọmịnị anịị wámịna diri wa gịẹnyẹ wámịna tẹ́mẹ́bie, kị́nị́mamgba árị sị pịghị anịgoo.

³ Ḅọghugha, ọmịnị anịị Krais ọ ḅara na gịẹ diri sị pa wamịna ḅara ḅụ fịrịma, Nyẹ́gie ḅuruma pa anị gịẹgha, kụ́ma dumafịnị Tamuno ma Tẹ́mẹ́, n pịghị dapịrị ọ́gọ́nọ anị gịẹgha kụ́ma túminị́ tẹ́mẹ́bie.

⁴ Wa go mịma dughonyẹ, Krais ḅụ ḅọ́rọ́, wa Tamuno ḅụ biekpọ nyanam.

⁵ Wámịna ḅụbie ḅẹnyẹ ḅẹnyẹ ofori, mịẹsị wa go ine dughoarịnyẹ ḅẹẹ, wa ine mị fịrị ma nwángịbẹm. Wa nyáná ịnyọ ma Tamuno ḅara anị́ị́ anị sághị ḅo nyẹ.

⁶ Ori anị wa mịẹ kụrọma sị wamịnị ine fịrịnwangị ịwọ ọ ḅoo ma pịrịnyẹ, mị ịwọ ọḅọọ ma, anịị n gịẹ kóróma ịwọ ólóghó nyánágha, kụ́ma Tẹ́mẹ́ ma angaánye, n gịẹ kóróma ólóghó ma, fịị dighiḅom; kụ́ma Tẹ́mẹ́ ma duma pịrịm.

⁷ Ólóghó ma dapịrị ọ́gọ́nọ anị́ị́ nnị anị sughu kórómanyẹ, Tamuno ipine pịghị anị ḅụ diem, nnị ólóghó ma ḅọ́rọ́ma pịrị sa, karakárányẹ ḅẹẹ Mosis tórúku gbẹ́ẹ̄ ipine ma sághị ẹmẹfaarị, anị pa opuma kụrọm, sị Izirẹlịawọ ine nna tọ́rụ́ pa Mosis tọ́rụ́ ogbo dighigha. Ḅọ́rọ́ fịị dighi ólóghó ma ọkọfịnị ipine akuom anị fịrịnwangịarị sa.

⁸ Anịsa fịnị Tẹ́mẹ́ fịrị ma pịrịbẹ ipine, anị dụḅa tọrọ́ láa bẹ?

⁹ Ḅọ́rọ́ fịị ḅẹ́rẹ́pẹ́lẹ́ akuoarị nyẹ ma ipine nyanam, anịsa mịẹsị Tamuno wa daákịarị ọḅọọ ma anị ipine tọrọ́ fịnị bẹ?

¹⁰ Parị sa opuma ipine nyánányẹ pa mị́sa kụrọma biaarị ipine ma na tọ́ma sa, tumḅọ ine dughobẹm ḅẹ́ parị nyẹ ma ipine nyanagha.

¹¹ Ḅọ́rọ́ ẹmẹẹfáarị nyẹ ma ipine na ḅom, anịsa fịnị gbámásó ọḅọọ ma anị ipine dụḅa tọrọ́ la bẹ!

¹² Wa mị tọ́rụ́ dighinyẹ ma nyánam gosi, wa kị́nị́ dighigha.

¹³ Wamịnị wa Mosis fịnị ḅara fịnịgha tórúku gbẹbịtẹ pa ọ tórúku gbẹẹḅọ sị Izirẹlịawọ ọrẹ baá ma árị anị ḅuruḅuru si pịghị ẹmẹẹfáa.

¹⁴ Kụ́ma, nna kóróma pụ́ụ́m, sị ḅo mịmgba éné ma láa, n pa bịtẹ pa nna kóróma gbẹm, nnị olom ọḅọọ ma diri gooarị sa. Nnị bịtẹ ma nụ́nụ́ sịbẹm tumḅọ amịna ḅụ pa Krais na gbẹ́rẹ́nyẹ mịẹ sa ngéré.

¹⁵ Mịmgba éné sọ, n Mosis ólóghó ma goo sa gonyẹ́ gonyẹ́, tọ́rúkugbe bịtẹ ma pa nna kóróma gbẹarị.

¹⁶ Kụ́ma tumḅọ amịna sii ḅụ pịghị sị Kị́nị́nyánáḅọ ma dua sa, tórúku gbẹ́ẹ̄ bịtẹ ma nnị anị nụ́nụ́siim.

¹⁷ Mị́sa <> ori anịị Tẹ́mẹ́ ma, Kịnịyánáḅọ Tẹ́mẹ́ ma fịnị angaá gonyẹ́ gonyẹ́ asọ pụ́ma nyẹ oforiofori.

¹⁸ Wamịnị kị́nị́mamgba tórúku gbẹ́gha pa Kị́nị́nyánáḅọ ipine ma arịm anị bia wámịna tọ́rụ́bie sọọ ḅara, wa pịghị dima dima si pịghị okịkaarị ḅara, sámámgba ḅụ sẹnịarị ipine Kị́nị́nyánáḅọ ḅara saghị ḅo nyẹ ori anịị Tẹ́mẹ́ ma.