2 Kọrịntịapụ 13 - Ibani New Testament

Kunema Birinụ́nụ́

¹ Mịị ị́yẹ́ tẹ́rẹ́ kárámá sa, a ḅo o dighinyẹ. Tọ́ndiri ma bie n gịẹ kórómam ḅẹẹ, <<Ḅẹ́rẹ́ pa jụghọ sịbị sẹarịḅọ gonyẹ́ gonyẹ́ mmẹẹ́ anịgha tẹ́rẹ́ onyésẹ̄ḅọ nyánábẹm, anịsa, anịị anị kundu nyáná bẹnyẹ.>>

² A ọ birinụ́nụ́ dọ́ghụm ọmịnị ḅọ́rọ́maa sa siinyẹ mịẹapụ, na pịghị jẹ́apụ jẹ́apụ, a parị ḅo sáá a anị gbolomanyẹ dughom, ị́yẹ́ mmẹẹ́ kárámá ḅo, a pịghị sima anị dughobẹm mị́sa a mịnga ofori sáá: ḅẹ́ a jẹ́ pa ḅo bẹ sáá fomḅara ọ gbarịbịgha.

³ Ọ dọghụ ilíghíma gonyẹ́ gonyẹ́ ọmịnị árịbẹm ḅẹ́ Krais i bịpị pa ẹ́gẹ́rẹ́kọarị, ori ọ nana mịẹarị sáá, ori kụ́rọ nyanagha ḅọ kịkagha, anịmanakaragha ori ọrẹ kụ́rọ diearị ọmịnị ogboku bie.

⁴ Karakárányẹ ḅẹ́ Krais kụ́rọ ḅụ faá ḅụ nnị ọ ḅaupálịm, kụ́ma mị́sa Tamuno kụ́rọ ḅụ ḅọ́rọ́ Krais dumafịnịm. Wamịnị sọ ọ nana gbẹ́rẹ́nyẹ mịẹ ḅụ, wa ḅo kụ́rọ nyánágháapụ dighim. Kụ́ma wamịnị na ọ nana mịẹgbólóma ḅụ wa Tamuno kụ́rọ ma nyánábẹm ori duma bie.

⁵ Ọmịnị ọmịna ḅụ pa daádighi ma ḅụ sua ọ ḅẹ́rẹ́kọ ọmịna ḅụ pịrị, sị o nimi bẹ ḅara ọ ḅọ́rọ́ pa minini ma ḅụ duma kọọarị. Ọmịnị árịbẹm ḅẹ́ Jizọs Krais ọmịna bie ḅụ imii, ḅọ́rọ́ ọmịnị epeletigha tigha ḅẹ́ ọmịnị ọ ḅụ mininim.

⁶ A tẹ́mẹ́kụ́rọ nyánam ḅẹẹ ọ dọghụ pághámaḅobẹm ḅẹẹ wa bịghịgha:

⁷ Wa Tamuno tẹ́ghẹ́arị ḅẹ́ ọ gbẹ́rẹ́ irima nyẹ sọ mịẹma. Wa mịma mịẹghaa pa die ḅẹ́ wamịnị sáḅá ḅọ́rọ́mam, kụ́ma ọ karakárányẹ ma mịẹbẹ ḅara, tụ́manyẹ ḅẹẹ túminị́ tórúku, wa bịghịmaapụ dighi sọọ.

⁸ Tegó wamịnị ine gbẹ́rẹ́nyẹ sọ mịẹ karakárányẹ ma pụ́nụ́mabịgha, kụ́ma wa nyẹ mịẹ karakárányẹ ma pịrịbẹm.

⁹ Wa bieḅẹlẹm ḅẹẹ wámịna tẹ́mẹ́ oḅuu sáá gonyẹ́ gonyẹ́, ọmịnị kụrọm. Anịgo wa pịghị tẹ́ghẹm ḅẹẹ, nyẹ gonyẹ́ gonyẹ́ ḅụ ọ kpain.

¹⁰ Anịị a go mị diri ma gịẹnyẹ a ọmịna ḅụ ḅọlọanga fịnị sáá; sị a ḅo láabẹ sáá, a mịnị kụ́rọ na ọmịnị na mịẹbịgha ḅara. Kị́nị́nyánáḅọ mịị kụ́rọ ma pa i pịrị pa ọ mịẹ sẹnịmaa, pa ọnụ́nụ́ka bẹ nyẹ́gha.

Kunema Sịbịpị

¹¹ Kunemaá, i Daa awọ, ọmịnị ibima fịnịị, asọ nwángịị kpain ḅụ, ị́yẹ́ tẹ́ghẹ̄ẹ̄ bịpị ma pughuu, ọ gbẹ́rẹ́ tẹ́mẹ́ nyáná, o diin ḅụ ngaa, diin na ḅẹlẹma nyáná Tamuno ma ọmịnị na fịnịị.

¹² Tọ́ntọ́ ḅụ ọ jụghọ jụghọ ḅoloo.

¹³ Tamuno túminị́ mamgba fịrịmam ḅẹ́ wamịnị o bii.

¹⁴ Wámịna Nyánáḅọ Jizọs Krais tọ́rụ́kụrụkụ́rụ́, Tamuno ḅẹlẹma, na Tọ́ntọ́ Tẹ́mẹ́ ma mịẹgbólóma, ọmịnị kị́nị́mamgba na fịnịị.