2 Kọrịntịapụ 12 - Ibani New Testament

Pọl Ori Tọ́rụ́siarị Na Kị́nị́nyánáḅọ Jizọs Pa Ọ Dienyẹ

¹ Anị pa i mịẹibi ofori, kụ́ma a pa bịpịkpọbẹm, mị́sa a múnogha ḅụ kọ dáwọ Kị́nị́nyánáḅọ ọ ḅụ gboloma sị ọ pa i dienyẹ.

² A gbẹ́rẹ́ Krais asọ duarị owitụ́wọ nimim, ḅọ́rọ́maa oyi ínia kụ́rá findi ḅụ, nnị dighi akị sóghóloḅa so ma múm, mịma duma ḅụ anị kiriakị-o, múnogha dáwọ ḅụ kiriakị-o, a nimigha, Tamuno ngéré anịị nimiḅọ.

³ Kúru a sima dugho, a nimim ḅẹ́ mị owitụ́wọ ma nnị ọ dighi akị paradaisị múm, anịị Tamunofịnịkiri ma, mịma duma ḅụ kiriakị-o múnogha dáwọ ḅụ kiriakị-o a nimigha Tamuno ngéré anị nimiḅọ,

⁴ anị ngá a nyẹ́ naam tumḅọ dughobịgha nyẹ n mịnị túminị́ pịrịgha sị nnị anị dugho.

⁵ A ọkọfịnị tumḅọ pa bịpịkpọbẹm, kụ́ma a ịḅụ pa bịpịkpọbịgha, tụ́ma diearịnyẹ ma sima ḅẹ́ i tẹ́mẹ́ oḅuum.

⁶ A ḅọ́rọ́ bịpịkpọ dọghụ, a oḅoriḅọ sọbịgha tegó a karakárányẹ ma dughobẹm. Kụ́ma a bịpịkpọbịgha tegó a bigha túminị́ jẹ́ tụ́ma ḅara pa i dighi, nnị árịnyẹ na pịghị i bịpị nnị náanyẹ ḅụ ḅọ́rọ́.

⁷ I mịẹsị a opuma opuamịẹnyẹ mịẹbịgha ḅara, a árị tọgha ḅụ́gbérépuma nyẹ ma ḅụ. Nnị gbẹ́rẹ́ nangi pa i pịrịm ị́yẹ́ oju bie, Satanị oku muu ḅọ, ori i fom sị a mịnị opuamịẹnyẹ mịẹbịgha ḅara.

⁸ A tẹ́rẹ́ a sa pa Kị́nị́nyánáḅọ tẹ́ghẹ̄m ḅẹẹ, ori anị si ị́yẹ́ oju bie.

⁹ Kụ́ma ori i pagharam ḅẹẹ; <<Ị́yẹ́ tọ́rụ́kụrụkụ́rụ́ anịị ị bii nyẹ, ḅẹ́ iyẹ kụrọ anị ḅụ die kụrọma kụ́rọ́mam, ị́yẹ́ kụ́rọ ịrụ sáá.>> Anịgo i bieḅẹlẹm ḅẹ́ a bịpịkpọ ị́yẹ́ ịnyọ ịrụ la ḅara pịrị sị Krais kụ́rọ i gbẹ́ẹ̄ bẹ ḅara.

¹⁰ Anịgo, Krais sịbị go i bieḅẹlẹm ị́yẹ́ tẹ́mẹ́ oḅuu ḅụ, wirinumo daa, ḅụ́kụro árị, tọ́rụ́siarị arịị, ḅụḅáláḅálá arịị, Krais gosi. Ḅẹẹ i tẹ́mẹ́ oḅuu sáá, anịsáa anịị a kụrọnyẹ.

Pọl Tẹ́mẹ́ Ḅụḅáláḅálá Pa Ọ Pịrịm Kọrịntị Ḅụ Fịnị Sọsị Ma Go

¹¹ A oḅori ḅara pa nyẹ mịẹarị, kụ́ma ọmịnị anịị ị mịẹnyẹ, ọmịnị anịị i túminí na ibinyẹ, a ḅọ́rọ́ ḅẹnyẹ ḅẹnyẹ ḅụ ofori sọ, ọmịnị pa opuma <> sịapụ ma, nnị gbẹ́rẹ́ asọ ḅụ sọ ibi inẹ́ngịgha.

¹² A ọmịnị na fịnị sa a tọgha pághányẹ mịẹm, ḅụ́gbérépuma nyẹ na ḅụ́gbérépuma fịrịnwangị, inema ḅara ḅụ. Mịma diem ḅẹẹ, ịrị nfịrịmaḅọ.

¹³ A ị́yẹ́ ḅụḅáláḅálá pa ọmịna ḅụ gbánāgha sima, a tẹ́ sii ḅara pa ọ́ nana ngaa kịrịnyẹ, a pa isi sọsị sọsị ma na ngagha nyẹ?

¹⁴ A tẹ́lẹ́mamam ḅẹẹ a ḅo ọ nana dona, mị tẹ́rẹ́ kárámá sáá, a ọ ḅarabie ḅẹnyẹ ḅẹnyẹ bibịẹgha, kụ́ma ọmịnị anịị a binyẹ, ọ nyáná nyẹ́ghaa, ọ́ kọ́kọ́ nimi ḅẹẹ awọamaapụ nna nyingiapụ siḅe na ibighaa, kụ́ma nyingiapụ anịị nna awọ siḅe ḅẹnyẹ.

¹⁵ I bieḅẹlẹbẹm a nyánányẹ gonyẹ́ gonyẹ́ fama pighi ị ḅụgbọrụ, sị a pa ine ḅárásua ọ pịrịbẹ ḅara. Mịma anị mịẹbẹ sị ọ kálá ḅara pa i ḅẹlẹma a opuma ọ ḅẹ́lẹ́mam gosi?

¹⁶ Ọ́ kọ́kọ́ i nana minini ḅẹ́ a ḅụḅáláḅálá pa ọ pịrịgha, kụ́ma jẹ́apụ ḅẹbẹm ḅẹẹ a aka ḅara pa oḅori pa ọ́ sịm.

¹⁷ A mịnaapụ ma fịrịma ọ damaḅo sa, o sii ḅẹẹ a n fịrịmaḅom a ọ ḅarabie mịẹ dọghụ sọnyẹ go?

¹⁸ A Taitọs tẹ́ghẹ̄m ḅẹẹ ori ọ damaḅo, a pịghị isi mị́naḅọ owitụ́wọ fịrịma ọ ḅụ suam. Anịsáa, o ḅẹ́ bẹ ḅẹẹ Taitọs ọ ḅarabie sọ́nyẹ mịẹm? Ịrị na ọ nana wa gbẹ́rẹ́ tẹ́mẹ́ pa nyẹ́ mịẹgha? Pịghị gbẹ́rẹ́ ḅara pa asọ nwángị.

¹⁹ O sị ḅẹẹ mị́sa mamgba wa wámịna ḅụ pighiarị ọmịna toruku. Anị ọkọ fịnịgha Tamuno ị́yẹ́ onyésẹ̄ḅọ ḅara, a karakáráma dugho ọ pịrịm Krais ómóniḅọ ḅara. Wa pịghị mịẹarịnyẹ gonyẹ́ gonyẹ́ mịnaapụ, anịị pa ḅárásua ọ pịrị!

²⁰ Ḅáláfa ịḅụ imi ḅẹẹ a aningáa láa bẹ sa a bi ḅara ọmịnị ọkọfịnịbịgha, ọmịnị sọ pịghị dọghụ ḅara a ọkọfịnịbịgha. Ḅáláfa ịḅụ imi, bẹ kam sọ, na jụghọ nyẹ mọnị, na ọfịrị kúkúbie, na ngéré fịị, jẹ́apụ dughosima, na opu ibiamịẹnyẹḅọ na nyẹ mịẹ gálágálá ma, anịị a árị bẹnyẹ.

²¹ Ḅáláfa ịḅụ imii ḅẹẹ, a aningáa la bẹ sa parị sáá mịẹnyẹ, pịghị sima mịẹbẹm Tamuno i siminimabẹm ọmịna toruku. Ḅáláfa ịḅụ imi ḅẹ́ a owubẹm parị sa pa ịlọ́lị duma kọ́arịapụ gosi, na pịghị ḅụ́gịrịrịma duma kọ́arịapụ gosi.