2 Kọrịntịapụ 1 - Ibani New Testament

Pọl Gịẹ Kọrịntịapụ Pịrị Mmẹẹ́ Kárámá Diri

¹ Irị Pọl, Jizọs Krais fịrịmaḅọ, na pịghị wámịna numboru owitụ́wọ Timoti anịị mị diri ma gịẹ ọ fịrịmaarịapụ, ọmịnị Tamuno sọsị ma Kọrịntị ma bie fịnịapụ na pịghị Tamuno awọ mamgba Akaya gbọrụ ḅụ fịnịapụ.

² Tamuno wámịna Daḅọ na pịghị wámịna Nyánáḅọ Jizọs Krais, tọ́rụ́kụrụkụ́rụ́ na diin pa ọ pịrị.

Biedịịnma Tamuno

³ Túminí fịnị Tamuno ma pịrịị na pịghị wámịna Nyánáḅọ Jizọs Krais Daḅọ, lolomakúkúbie nyáná Daḅọ, biedịịnma mamgba sághị ḅara ḅoarị Tamuno,

⁴ biedịịnma pa wa pịrịarịḅọ wámịna ḅụḅáláḅálá mamgba ḅụ, wamịnị sọ pịghị ine tọ́rụ́kịrịkị́rị́ ḅụḅáláḅálá bie fịnịapụ bie diinma bẹ ḅara, wa Tamuno ḅara nyáná ḅo biedịịnma ḅụ ḅọ́rọ́.

⁵ Wa diekiri nyáná ḅara ma Krais mánámāná tọ́rụ́siarị ḅụ, anị ḅara ma anị wa pịghị Krais ḅụ ḅọ́rọ́, diekiri nyána ḅara Tamuno opu biedịịnma ḅụ.

⁶ Wa ḅọ́rọ́ tọ́rụ́siarịrị, anịị ọmịna biedịịnma pịghị ọmịna dụaḅọ́rọ́ma, wa ḅọ́rọ́ biedịịnma nyáná nyáná, ọmịnị sọ biedịịnma nyanam n pịghị mgịrịma ịnyọ ma pa ọ pịrịm sị ọmịnị sọ ine wamịnị arịarị tọ́rụ́siarị ma daa bẹ ḅara.

⁷ Anịgo wámịna tọ́rụ́ dighinyẹ ọ fịnị angaá jéné n jéné jighegha, wa nimim ḅẹẹ ọmịnị wa mịná tọ́rụ́siarị ḅụ diekiri nyáná ḅara ma anịị ọmịnị sọ wa nyáná ḅo biedịịnma ḅụ diekiri nyáná ḅara.

⁸ I Daa awọ, wa dọ́ghụm o nimi wa la ḅụḅáláḅálá Esiya ḅẹrẹtọ yọ. N dighi wamịnị ọgọnọ kóróma ikúnyẹ ma, opuma dụḅam pịghị opuma ikum ḅẹẹ wa sịgha ḅẹ́ wa dumabẹm.

⁹ Anị wa ḅụ fịnị ḅara anị n fịị ḅẹ́rẹ́pẹ́lẹ́ pịrịapụ nna sịbị ọ́gọ́nọ. Mịma go kiriakịnyẹ ọ́ wa wámịna ḅụ tẹ́mẹ́kụ́rọ nyánábịgha ḅara, kụ́ma Tamuno ḅụ ori ngéré fịịapụ sághịmaarịḅọ.

¹⁰ Kụ́rọ ḅáláfama fịị kụ́rọ ḅụ ọ wa ḅọ́rọ́mam ọ pịghị wa ḅọ́rọ́mabẹm, wa pịghị wámịna tọ́rụ́ dighinyẹ pa ọ ḅụ gbánām ḅẹ ọ pịghị sima wa ḅọ́rọ́mabẹm,

¹¹ ọmịnị ọmịna tẹ́ghẹ̄ pa ḅárásua wa pịrịarị gosi. Tọghaapụ Tamuno túmíníbẹm wámịna sịbị, ọ nyána wa pịrị ibi gosi, anịị tọgha túminị́ wa sịbị go tẹ́ghẹ́arị tẹ́ghẹ̄ ma gosi.

Pọl Ọ Tọ Mịẹ Dọghụnyẹ Dima Ḅara

¹² Wa bịpịkpọm ḅẹẹ wámịna tẹ́mẹ́bie kụ́rọ kúkúbie pa wa pịrịm ḅẹẹ wámịna duma mị tuminikiri wa pịghị ibima ó nana nyáná gboloma mịẹnyẹ ma, ọ́ Tamuno ḅara sághị ḅo karakárá, na gbụ́nụ́nụ́ na Tamuno tọ́rụ́kụrụkụ́rụ́ kụ́rọ ḅụ ḅọ́rọ́ tumḅọ nyẹ́nimi ḅụ ḅọ́rọ́gha pa.

¹³ Wa jẹ́ ịwọ diri gịẹ ọ fịrịmagha kụ́ma ọ́ o goo sị akanyaḅo bẹnyẹ, a mininim ḅẹ́ ọmịnị akanyaḅo mú kunema lábẹm.

¹⁴ Ọmịnị sọ pịghị kálá ḅara pa wamịnị akanyaḅo ḅara, ḅẹ́ wamịnị go anị o go bịpịkpọ na ibii nyẹ, ọmịnị ma pịghị wámịna nyẹ ḅara ma Wányánáḅọ Jizọs Krais sima ḅo bẹ éné.

¹⁵ I tẹ́mẹ́kụ́rọ mịnanyẹ mamgba pịrịm anị a go ọrụtọ nyẹ parị ma ḅụ sị á ọ fịnịanga ḅo sị mmẹẹ́ karịiḅi ọmịna nyẹ sọọ bẹ ḅara.

¹⁶ A tọọm ḅẹ́ a ọ fịnịanga ḅobẹm, a ḅọ́rọ́ Masidoniya múuarị sa, a pịghị ḅọ́rọ́ sooarị sa, sị a ọ ḅara ḅárásua nyánábeḅara a ḅọ́rọ́ Judiya muu bẹ sa.

¹⁷ A mịma tọarị sa, a sárásárá ḅara pa ịḅụ warịị́? A iyẹ nyẹ tọarị sa a tuminikiriapụ ḅara pa anị tọ́ọ, sị tẹ́lẹ́ma fịnị sị <> na <> ḅẹ́ anị gbẹ́rẹ́sa ma ḅụ?

¹⁸ Tamuno karakárá ḅụ fịnị ḅára ma a minini ọ pịrịnyẹ ma <> na <>

¹⁹ Ḅẹ́ Jizọs Krais Tamuno Tụwọ, Sailas na Timoti na ịrị ma dugho wásáma ọ pịrịḅọ ma, ori <> na <> kụ́ma ọ ḅụ Tamuno <> ngéré ḅẹm.

²⁰ Ori anị <> ma sị pa Tamuno minini nyẹ mamgba pịrị. Mịma go Tamuno Jizọs Krais ḅụ sámámgba <> ḅẹm, wa anị ḅẹ́ pa Tamuno bomaarị.

²¹ Wamịnị na ọ́ nana miẹgbolomaarịḅọ anịị Tamuno ori ma anị pịghị pulo pa wa sịbị saramaá ḅọ.

²² Ori anịị ọrẹ ilíghíma suamaá ḅọ wámịna ḅụ, pịghị Tọ́ntọ́ Tẹ́mẹ́ ma pa wa pịrịmaá ḅo wámịna tẹ́mẹ́bie, mịma anị ọ pa wa tẹ́mẹ́kụ́rọma ọ nyáná kóróma wa pịrịnyẹ.

²³ A Tamuno siim ị́yẹ́ onyésẹ̄ḅọ ori i tẹ́mẹ́bie nimim! A ḅụḅáláḅálá pa ọ pịrị dọghụgha ḅara gosi, anị a goo mịnị Kọrịntị ḅogha nyẹ.

²⁴ Ḅẹgha ḅẹ́ wa dugho ọ pịrịarị ḅẹ́ ọ minini, wa nimim ḅẹ́ ọ sẹ kụrọm ọmịna minini ḅụ, Anịmanakaragha wamịnị ó nana nwángị gbólomaarị ọmịna bieḅẹlẹ bẹ ḅara.