1 Timoti 6 - Ibani New Testament

Ómóniapụ

¹ Ómóniapụ gonyẹ́ gonyẹ́ ḅụ́gbẹ́ osigha pa nna nyánáapụ pịrịị, gbẹ́rẹ́ḅọ sọ Tamuno ẹrẹ ma anịgha wámịna dienyẹ ma dughosimabịgha ḅara.

² Ómóniapụ, Krais ḅụ mininiapụ nyánáapụ nna nyánáapụ ḅara, osigha nyanagha ḅara pa nnị na ngaa ma ḅẹ́ nnị sọ mịnaapụ gosi. Tụ́ma nnị ibiḅaa ḅara pa fịrịnwangị n pịrị tegó nna fịrị ma ḅụ sọnyẹ fịarịapụ nnị sọ mininiapụ na n pịghị ḅẹlẹmaapụ. Mịnanyẹ ịrị anị diebẹm pịghị anị dugho wásámáa n pịrịị.

Iruo Dienyẹ Na Tụ́ma Ngọọ

³ Jẹ́ kịrị dienyẹ dieḅọ fịnịfịnị sị pịghị wámịna Nyánáḅọ Jizọs Krais karakárá ẹ́gẹ́rẹ́ ma na kuragha nyẹ na pịghị wámịna Tamuno minini dienyẹ ma diegha ḅọ

⁴ opuamịẹnyẹ anị n ḅọ sịbị kpórómáarịnyẹ n ḅọ ḅẹnyẹ ḅẹnyẹ nimigha. Nnị kụ́rọ pụghọ nyánam sị nyẹ ḅụ ófórigha nyẹ gosi nyẹ nụná pịghị kam sọọ, mịma warị tẹ́mẹ́ akụ, nụná, wiri núme, si ẹ́rẹ́ pa kị́nị́ sị, sitẹ́mẹ́ biegbáná nyanagha jẹ́apụ ḅụ,

⁵ pịghị sámámgba nna tẹ́mẹ́bie ịlọlịapụ na ḅẹrẹ kpángịrị, mịnị tọ́ntọ́ ẹ́gẹ́rẹ́ ma karakárá nyánágháapụ. Nnị kórómaarị ḅẹ́ Tamuno nimi ma anịị ḅọ́rọ́ igbii nyána asọ.

⁶ Tamuno nimi na tumḅọ nyánányẹ fúrōbi anịị opu sọnyẹ.

⁷ Wa ḅẹnyẹ ḅẹnyẹ pa tuminikiri ma ḅogha, wa pịghị ḅẹnyẹ ḅẹnyẹ dighi sobịgha.

⁸ Anịgosi, wa ḅọ́rọ́ fị́nyẹ na sua bẹ bịtẹ nyána anịma wa fúrōbii.

⁹ Kụ́ma igbii nyána biiapụ daádighi bie sọsọm n warị pịghị mánámāná ojumẹnị tarịarị oḅori nyẹ na nyẹ pa túminị́ láama bẹ dia ḅụ koro, n nụ́nụ́ kiri kórómaarị nyẹ sị pịghị n guluguluma.

¹⁰ Ḅẹẹ, igbii ḅẹlẹma anịị tọ́rụ́kịrịkị́rị́ siinyẹ mamgba dighiḅoarị nyẹ. Jẹ́apụ igbii pụghọ tarị ma mịẹmam nnị asọ ịrị minini ma ḅụ, n warị pịghị tọgha tọgha tẹ́mẹ́ sima nyẹ pa nna kúkúbie fom kaamam.

Pọl Dugho Kọ́rọ́ma Timoti Pịrị Ẹ́gẹ́rẹ́

¹¹ Kụ́ma ịrịị, Tamuno tumḅọ ịḅụ darịma mịnanyẹ mamgba ḅụ, karakárá ibiamịẹnyẹ dọghụ pa sịbị sághị, Tamuno nimi, minini, ḅẹlẹma, ngịrịma na diin mịẹnyẹ.

¹² Minini ibi owu ma sọọ, gbámásó duma ma ọlọ sẹ́ma ịḅụ pịrị, mị duma ma goo anị Tamuno goo ị siinyẹ ị́ ị́yẹ́ minini dugho wásáma sáá tọgha onyésẹapụ tórúku.

¹³ Tamuno ma tórúku, duma pa nyẹ gonyẹ́ gonyẹ́ pịrịarị ḅo na pịghị Krais Jizọs tórúku, ori sẹ sị ori minini dugho pághámaḅo Pọntiyọs Paileti tórúku, a tọ́ọ ị pịrịm

¹⁴ ḅẹẹ ị mịị ologho ma warị, fu ịḅụ gbologha anịgha bịpị ịḅụ laagha pa, akị mú wámịna Nyanaḅọ Jizọs Krais ọ ḅụ die sáá láa,

¹⁵ Tamuno mịẹbẹnyẹ anị ḅoo kiriakị ori sáá ma láa sáá n boma ḅọ pịghị Táarịḅọ ma ngéré, ámányánáapụ mamgba ḅụ Ámányánáḅọ, kị́nị́nyánáapụ mamgba ḅụ Kị́nị́nyánáḅọ,

¹⁶ ori ngéré anịị fịịbịgha Tamuno ma ori anịị tumḅọ ine sọma mú láabịgha baá ma bie angaá ḅoo. Gbẹ́rẹ́ḅọ sọọ na jẹ́ éné ori arịgha, gbẹ́rẹ́ḅọ sọọ ine ori arịbịgha. Kuu na ịnyọ fịnị ọ pịrị mú gbámásó láa! Anị ọkọ fịnịị.

¹⁷ Kụrọ ḅara pa dugho mị tuminikiri ngọ ma nyánáapụ pịrịị ḅẹ́ nnị opuamịẹnyẹ mịẹma, anịgha tẹ́mẹ́ gbánā dima dima koroarị nyẹ ḅụ, anịị tuminikiri ngọ kụma Tamuno ḅụ, nyẹ gonyẹ́ gonyẹ́ pa wásáma wa pịrịḅọ sị wamịnị anị pa wa ḅụ tii.

¹⁸ Kụ́rọ ḅara pa dugho n pịrị ḅẹ́ nnị ibi nyẹ mịẹ, nnị opuma ibifịrị nwángị, n ḅara findi wásáma, sámámgba n tẹ́lẹ́ma jẹ́apụ na nyẹ die ḅụ.

¹⁹ Mị ḅara ma nnị tụ́ma ngọ koko nna ḅụ pịrịarị, karakárá sughu isé nyẹ so n pịrịbẹnyẹ ḅoarị sáá ma ḅụ. Anịsáa anịị nnị ine tụ́ma duma nyáná ḅo bẹnyẹ anịị duma ma.

²⁰ Timoti, pa ibima wárị n pa ị ḅárabie suanyẹ ma. Ịḅụ sií kuu pa Tamuno pịrịgha ẹ́gẹ́rẹ́ ḅụ na pịghị oḅori nyẹ nụná ḅụ, túminị́ irima ḅara pa <> sị nyẹ.

²¹ Jẹ́apụ bịpịkpọman ḅẹẹ nnị mịị níminyẹ ma nyánam anị ḅụ ḅọ́rọ́ nnị minini asọ ma ḅụ irimamam. Tamuno tọ́rụ́kụrụkụ́rụ́ ọmịnịkịnị mamgba na fịnị.