1 Timoti 3 - Ibani New Testament

Sịbịdaapụ Tamuno Kubiri Ogbobie

¹ Mịị tụ́ma dughonyẹ: ḅọ́rọ́ tumḅọ tẹ́mẹ́bie ibima dọ́ghụm ḅẹ́ nḅọ Tamuno kubiri ogbo sịbịdáḅọ sọọ, nḅọ túminị́ osigha pa pịrịbẹ fịrị dọ́ghụm.

² Tamuno kubiri ogbo sịbịdaḅọ ori fiesima nẹ́ngị na fiam; gbẹ́rẹ́ táaḅọ ngéré nyáná, ori álála bieoḅughaa, ine ḅụ ọlọ ḅo, kị́nị́ osigha nyáná pịrịḅọ, ine igoniapụ datéréma n ḅo wárị; ine nyẹ́die bẹḅọ;

³ N ḅo iru ḅuu tọ́rụ́ ḅámábịgha, owitẹ́mẹ́bie pa nyẹ́ mịẹgha, kụ́ma tẹ́mẹ́ ọfịrịgha tumḅọ, kamsọsọghaḅọ; ori igbii ḅẹ́lẹ́mabịgha;

⁴ Ori ine ibima ọ wárị tákúbiri na fiam mịẹsị ori awọ osigha ḅụ ọ bịpị púghú.

⁵ Ḅẹẹ, ḅọ́rọ́ tumḅọ ine amịna wárị tákúbirigha nḅọ tọrọ́ pa ọrụtọ Tamuno kubiri ogbo ma pịrịbẹ?

⁶ Ori ịwọma Krais nimiḅọ na fiagha, ori opu ibiamịẹnyẹḅọ mịẹbịgha ḅara sị abana findii sị sóóró kóró ẹ́kpẹ́dua sóóro kóró ḅẹ́rẹ́kọ ma ḅụ.

⁷ Ori ibi ẹ́rẹ́ nyáná na ibim nụ́ngọ bieapụ fịnịanga, nnị ọ ḅụ́gịrịrịmabịgha ḅara sị ori ẹ́kpẹ́dua dia ma bie sóóro kóró.

⁸ Tamuno kubiri ogbo ḅárásúapụ anịị túminị́ osigha nyáná pịrị na fịaapụ, oḅori pa kị́nị́ sịịghaapụ; nnị opuma iru ḅuubịgha anịgha ngara ḅụ ḅo igbii ḅẹlẹma;

⁹ Minini ma ḅụ n pa n diepágháma póghóló tụ́manyẹ ma nnị fíafía tẹ́mẹ́bie ḅụ anị ọlọọ sẹ́ma na fiam.

¹⁰ Nnị parị n daádighibẹm, nnị bẹnyẹ bẹnyẹ dọghụḅogha n bẹ ḅẹẹ nna ḅụ, nnị n wáriso n fịrịnwangịị ḅárásúapụ ḅara.

¹¹ Nna taapụ sọ anịị túminị́ osigha pa pịrị na ḅụ́gbẹ́ ẹ́rẹ́, nnị jẹ́apụ pa ẹ́gẹ́rẹ́bịgha; tọ́rụ́ diinapụ, túminị́ pịghị nna ḅụ biegbana nyánam nyẹ gonyẹ́ gonyẹ́ ḅụ.

¹² Tamuno kubiri ogbo ḅárásuaḅọ gbẹ́rẹ́ táaḅọ ngéré anịị n ḅo nyáná bẹnyẹ, n ḅo pịghị ine n ḅọ awọ taa kubiribẹm pịghị ibima n ḅo warị táa kubiri na fiam.

Wámịna Minini Ma Ḅụ Fịnị Opu Ḅọghunyẹ

¹³ Anị ḅárásúapụ ma, ibima nna fịrị ma nwángịarịapụ ibi ẹ́rẹ́ nyánáḅoo n ḅụ pịrịm, n pịghị ine ḅáláfaghaa ḅara pa nna minini dugho pághámabẹm Krais Jizọs ḅụ.

¹⁴ A mịị ábálálá ma gịẹ ị pịrịarị, tẹ́mẹ́ gbánā ḅẹ́ ḅọlọgha sa a ḅoo ị́yẹ́ árịbẹm.

¹⁵ Kụ́ma a ḅọ́rọ́ sáá ngúma ngúma, mịị ábálálá ma pa o diebẹm túminị́ ḅara warị nyẹ́ mịẹ na ibiḅara Tamuno túminị́ ma kubiri ogbo, anịị dumafịnị Tamuno ma Tamuno kubiri ogbo ma, agalaba sị na anị sughusághị, Tamuno karakárá ma dighinyẹ.

¹⁶ Karakárányẹ ḅụ, wámịna minini ma ḅụ fịnị ḅọghunyẹ opuma dụḅam, Krais mẹnịsua tuminikiri ḅom, Tẹ́mẹ́ ma diepághámam ḅẹ́ siiamịẹnyẹ ọ ḅụ ofori, sookumuapụ ori arịm, sẹ́ sẹ́ sẹ́ ḅụ nnị o gbolomanyẹ dugho wásámam, tuminikiriapụ ọ ḅụ mininim, nnị ipine ḅụ ọsịakị sọ́mum.