1 Timoti 2 - Ibani New Testament

Nyẹ Mịẹbẹ Ḅára Tamuno Kobiri Ogbobie

¹ Nyẹ mamgba ḅụ parị nyẹ, a dugho kụ́rọ́mam ḅẹ́, kubiri ogbo nyẹ́bii, tẹ́ghẹ̄ kọ, jẹ́apụ sịbị tẹ́ghẹ̄, pịghị ịmịẹḅam pa Tamuno ḅẹ́ kị́nị́mamgba sịbị,

² ámányánáapụ na pịghị sịbịdaapụ mamgba sịbị, si wamịnị ine yaghúu na diin duma kọọ bẹ ḅara osigha nyáná Tamuno pịrị na pịghị karakárá mịẹnyẹ ḅụ.

³ Mịma anị ibim pịghị Tamuno wámịna Dụaḅọ́rọ́maḅọ ma ḅụ ḅẹ́lẹm,

⁴ biḅọ ḅẹ́ kị́nị́mamgba dụaḅọ́rọ́ma nyáná sị n ḅoo pịghị karakárá ma nimii.

⁵ Ḅẹ́ gbẹ́rẹ́ Tamuno ngéré anịị iminyẹ, gbẹ́rẹ́ ogboku sẹ ḅọ anịị Tamuno na túminị́ na akuo gbólómáarịḅọ, anị tumḅọ ma anịị n Krais Jizọs pa sịḅọ ma,

⁶ ọ ḅụ pa pịrịḅọ túminị́ mamgba dụaḅọ́rọ́ma goo. Mịma anị Tamuno pa tuminikiri gbọrụ fịrịma oku ma anị karakárá sáá ma ḅụ.

⁷ Anịị Tamuno goo i sẹlẹakị sị i fịrịma nyẹ ori oku dugho wásámā ḅọ ḅara na pịghị nfịrịmaḅọ ḅara ḅẹ́, a mịị minini na tụ́manyẹ ma oku ma pa Juughaapụ ma die! A karakárányẹ ma dughoarị a iruo kọgha.

⁸ Tamuno kobiri gonyẹ́ gonyẹ́, a bim ḅẹ́ owiapụ ma tẹ́ghẹ̄ kọọ, tọ́ntọ́ ḅụ ḅara sághị so daa sị tẹ́ghẹ̄, bie akụgha ḅụ anịgha kị́nị́ na kamsọgha ḅụ.

⁹ A pịghị bim ḅẹ́ ẹ́rẹ́ámáapụ ḅụ́gbẹ́ ḅara pa nna bịtẹ sua; fíafía na pịghị akanyaḅo nyáná ḅara ḅụ, nna ḅụ́birima sịbị kpeebịegha, anịgha odoḅala nyẹ sua anịgha áwụ áwụ bia ọkụta anịgha opuma nyẹ́laa bịtẹ sua.

¹⁰ Kụ́ma ibiamịẹnyẹ fịrị pa nna ḅụ́birima, anịị anị karakárá n pịrị ḅara dughoapụ ma ḅẹ́ nnị Tamuno tẹ́ghẹ̄arị ẹrẹ.

¹¹ Ẹ́rẹ́ámáapụ ḅụdiinma ḅara pa nyẹ dáwọ pịghị karakárá ḅara pa ḅụ sitéréma.

¹² A mịnị ẹ́rẹ́ámáapụ pịrịgha ḅẹ́ nnị nyẹ́die anịgha sịbịdá owiapụ pịrị, nnị n bịpị gbẹ́ẹ̄ warị.

¹³ Tegó Adam anịị n parị tẹ́mẹ́ḅọ, anịsáa ḅọ́rọ́ sáá Ivu.

¹⁴ Adamugha nnị oḅori pa sịḅọ, ọ́rụ́ḅọ ma anịị nnị oḅori pa siiḅọ sị a muu Tamuno ologho kóóró.

¹⁵ Kụ́ma ọ́rụ́ḅọ ma dụaḅọ́rọ́ma nyánábẹm awọ yii ḅụ, a ḅọ́rọ́ minini ḅụ sẹ kụ́rọ bịpị muu ḅẹlẹma ḅụ, tọ́ntọ́ ḅụ na pịghị bịpị ḅụ laagha ḅara ḅụ.